འཚུབ་མ་སྐྱ་བོ།

​ཉི་འོད་ནང་དུ་རྡུལ་རླུང་འཚུབ་མ་འདྲེས། །
གྲིབ་མ་ཁྱ་ཁྱོག་མགོ་བོ་འདར་འདར་བྱས། །
​མེ་ཏོག་བཞད་པར་སྒུག་སས་འབྲོག་ཐང་ནས། །
རི་སྤྱང་ངུ་བའི་ཀི་ཅོ་རྣ་བར་གཟན། །

མྱ་ངམ་ཐང་ནས་རྟ་ཕོའི་བདག་པོ་བོར། །
​མིག་ཟུང་བར་ན་འཆི་མའི་འཚང་ཁ་རྒྱག །
སྨྲ་བ་མེད་པར་ངག་སྒོ་བསྡམས་ན་ཡང་། །
འཁོར་བའི་དྲེག་པས་ལྷིང་འཇགས་རབ་ཏུ་དཀྲུགས ། ​

སྡུག་བསྔལ་འཚང་བའི་འཁོར་བའི་གཅེར་བུ་ལུས། །
​འདྲེན་བྱེད་ལམ་དུ་སྐྱོ་གར་འཆམ་པ་ན། །
​ལྟ་འདོད་མེད་པས་ཡོལ་བ་འཐེན་ན་ཡང་། །
​སེམས་ཆུང་སྐྱ་བོ་འཁྱགས་ལ་འབྱར་སོང་ཟིག །

࿑ ན་ནིང་གི་ལོ་སྟོད་དང་། ད་ལོའི་ལོ་སྨད་ལ་བཀླགས་པར་གྲུབ་པའི་དགེ་རྒན་དཔལ་མོའི་སྙན་དེབ་གཉིས་ལས་སྔ་ཤོས་དེ་ཡག་སྣང་དཔེ་མེད་འདྲ་སྐྱེས་བྱུང་། སྤྱིར་བཏང་ཁོ་བོ་བོད་ཀྱི་བུད་མེད་རྩོམ་འབྲི་བ་དག་ལས་དགའ་ཤོས་ཀྱི་རྩོམ་པ་པོ་ནི་འཆི་མེད་དང་། ཚེ་རིང་དབྱངས་སྐྱིད། དཔལ་མོ་བཅས་ཡིན། དཔལ་མོའི་བསྒྱུར་བཅོས་སྒོ་འབྱེད་ཚུན་གྱི་ལོ་ངོ་༤༥རིང་གི་བོད་ཀྱི་སྐྱེས་མའི་རྩོམ་རིག་གི་གནས་བབ་གླེང་བ་ཞེས་པའི་དཔྱད་རྩོམ་དེ་དངོས་གནས་ཡག་པོ་བྲིས་འདུག་སྙམ། མདོར་ན། མོ་དང་མོ་ལྟ་བུའི་བོད་ཡིག་ནམ་ཞར་འཁོལ་བཞིན་པ་ཚོའི་འདོད་པ་དོན་ལ་ཁེལ་ཞིང་། བྱ་བ་ལམ་ལྷོང་ཡོང་བར་སྨོན་ནོ། ། [咖啡]

མཁས་པ་ལ་ཚོད་མེད་པ། བཙུན་པ་ལ་དཔེ་མེད་པ། བཟང་པོ་ལ་ཡ་མེད་པ། སུ་ལའང་མི་མཛའ་བ་མེད་པ། གང་ལའང་འཁོན་པ་མེད་པ། ཕྱོགས་དང་རིས་སུ་མི་དབྱེ་བ། ང་དང་ཁྱོད་དུ་མི་རྩོད་པ། ཡོད་ཚད་ལ་ཕན་འདོགས་པ། གདའ་ཚད་གོང་དུ་བཀུར་བ། དམན་ས་འཛིན་པ། མཐོ་ས་ལ་མི་དགྱེས་པ། འགྲན་རྩོད་ལ་ཐུགས་མུག་པ། ཟང་ཟིང་སྤོང་དག་ཕོད་པ། ལྟ་བའི་གདེང་ལྡན་པ། སྤྱོད་པའི་སྐྱོན་བྲལ་བ། མཆོག་དམན་ཀུན་དང་མཐུན་པ། ཆེ་ཆུང་ཡོངས་ལ་མཛའ་བ། ལྷག་བསམ་གྱིས་མ་ཁྱབ་པ་མེད་པ། ཐུགས་རིག་གིས་མ་མཁྱེན་པ་མེད་པ། དབང་གི་བརྒྱུད་པ་ལྡན་པ། ཁྲིད་ཀྱི་མྱོང་བ་ཟབ་པ། ལུང་གི་རྒྱུན་ཐག་ཡོད་པ། འགྲོ་བ་བྱམས་ཀྱིས་སྐྱོང་བ། བསྟན་པ་དགུང་དུ་འདེགས་པ། མཐོང་བརྒྱུད་ཀྱི་ཕྱག་ལེན་མཁྱེན་པ། ཁྲལ་མཐོང་དང་ཚོད་འཇོག་གི་སྲོལ་མེད་པ། ལོ་རྒྱུས་འཆད་པ། ཆོས་འབྱུང་འབྲི་བ། སྙན་ངག་སྨྲ་བ། བརྡ་དག་འབྱོར་བ། བཟོ་གནས་ཀྱི་ཕུལ་ཕྱིན་པ། དབང་ལུང་གི་རྒྱུན་སྤེལ་བ། མྱོང་ཁྲིད་ཀྱི་གསུང་གདལ་བ། མཚན་ཉིད་རྒྱུ་ཡི་ཐེག་པའི་གནད་མཁྱེན་པ། འབྲས་བུ་སྔགས་ཀྱི་ཐེག་པའི་གསང་མཁྱེན་པ། མཐོང་ན་མི་མཐུན་པ་མེད་པ། མན་ངག་གི་ཕུང་པོ་སྤུངས་པ། ཡི་དམ་ལྷས་ཞལ་མཇལ་བ། མི་མིན་རིག་འཛིན་གྱི་འཁོར་འདུས་པ། བདག་གི་ཚེ་རབས་ཀྱི་བླ་མ། ཁྱེད་ཀྱི་སྐུ་ལ་བསྟོད། གསུང་ལ་བསླབ། ཐུགས་ཀྱི་རྗེས་སུ་བསྒྲུབ་པས། དུས་ནམ་ཡང་དགྱེས་བརྩེའི་མེལ་ཚེ་དང་། བྱིན་རླབས་ཀྱི་དབུགས་དབྱུང་སྩོལ་རོགས་སྐྱབས་གནས་དམ་པ་ལགས།

མཁན་པོ་ཐོག་ཞུན་གྱིས།