གང་གི་དྲིན་གྱིས་དགེ་བློ་འབྱུང་། །
འཇམ་པའི་དབྱངས་ལ་ཕྱག་འཚལ་ལོ། །
གང་གི་དྲིན་གྱིས་བདག་དར་བ། །
དགེ་བའི་བཤེས་ལའང་བདག་ཕྱག་འཚལ། །

རྒྱས་སྲས་ཆེན་པོ་ཞི་བ་ལྷས།

ཅི་ནས་རང་གི་སེམས་ལ་མི་ཕན་པའི།།ཆོས་དེ་ཁ་ཆོས་ཡིན་གྱི་དོན་ཆོས་མིན།།རང་གི་སེམས་ལ་ཁྱད་པར་མི་འདུག་ན།།ལོ་བརྒྱར་མཚམས་སྒྲུབ་བྱས་ཀྱང་ངལ་བའི་རྒྱུ།།——རྫ་དཔལ་སྤྲུལ་ནས། 只要无法助益于自心此法乃是语法非真法如若自觉对此无所别即使百年闭关也白搭——华智仁波切

བོད་ཀྱི་བརྡ་སྤྲོད་ཀྱི་བསྟན་བཅོས་ཆེན་པོ་བརྒྱད།

དེའང་པཎ་ཆེན་ཆོས་ཀྱི་ཉི་མའི་(1883—1937)སུམ་ཅུ་བའི་སྙིང་བོ་མདོར་བསྡུས་ཅེས་པར། “སློབ་དཔོན་གྱིས་ཡི་གེའི་སྦྱོར་བ་འདི་དག་བསྟན་བཅོས་བསྒྱུར་བ་དགོས་པའི་གཙོ་བོར་བཟུང་བ་དེའི་ཕྱིར་ལེགས་སྦྱར་གྱི་བསྟན་བཅོས་དང་སྒོ་བསྟུན་ཏེ་མཛད”པར་གསུངས་པ་བཞིན་རྒྱ་གར་གྱི་བསྟན་བཅོས་ལ་དཔེ་བྱས་ཏེ་བོད་ལ་བརྡ་སྤྲོད་བསྟན་བཅོས་བརྒྱད་བརྩམས་པར་གྲགས་པ་སྟེ།

དེའང་ཐོན་མིའི་ཞལ་ལུང་དུ་“གྲངས་བརྒྱད་ངེས་པའི་དོན་ལ། རྒྱ་གར་ན་སྒྲའི་བསྟན་བཅོས་ཆེན་པོ་བརྒྱད་ཡོད་པ་དང་ཆོས་མཚུངས་པར་བརྩམས་ཞེས་སྡེ་སྲིད་སངས་རྒྱས་རྒྱ་མཚིའི་གཡའ་སེལ་སོགས་སུ་གསུངས་ལ་”ཅེས་པ་ལྟར་ད་སྔ་ལོ་རྒྱུས་དང་མཁས་པའི་གསུང་སྒྲོས་སོགས་སུ་འདི་བཞིན་དུ་གྲགས་ནའང་། ཐོན་མིས་བརྡ་སྤྲོད་ཀྱི་བསྟན་བཅོས་ག་ཚོད་མཛད་ཡོད་མེད་ལ་མཁས་པ་སོ་སོའི་བཞེད་ཕྱོགས་མི་མཐུན་པ་དུ་མ་ཞིག་ཡོད་དེ།

རྒྱལ་རབས་གསལ་བའི་མེ་ལོང་དུ་“འདི་ནི་ཟུར་ཙམ་ཡིན་གྱིས། རྒྱས་པར་ཤེས་འདོད་ན་ཐོན་མིས། དང་པོ་ཡི་གེའི་རྣམ་འགྱུར་གྱི་བཟོ་བརྩམ། ཀ་སྨད་སུམ་ཅུར་བསྒྱུར། སྡེ་སྦྱོར་བསྒྲིག་པའི་གཞི་མ། ཐོན་མི་མདོ་རྫིའི་སྒྲ་མདོ་བྱ་བ་ཡོད་ཀྱིས་དེ་དག་ལ་གཟིཊ་ཤིག”ཅེས་ཐོན་མིའི་མཛད་པའི་བསྟན་བཅོས་ཁ་ཅིག་གི་མཚན་བྱང་གསུངས་ཡོད་ལ།

དེ་བཞིན་དུ་ཞྭ་ལུ་ལོ་ཙྭ་བ་ཆོས་སྐྱོང་བཟང་པོས་མཛད་པའི་སུམ་ཅུ་བའི་རྣམ་འགྲེལ་དུ་“མུན་པའི་སྒྲོན་མེ་ནི་ཐོན་མིས་མཛད་སྲིད་ནའང་། རྒྱ་གར་གྱི་སྐད་ཀློག་ཚུལ་ཡིན་གྱི། བོད་སྐད་ལ་འཇུག་པ་མ་ཡིན་ནོ། ”ཞེས་གསུངས་བའི་ཚུལ་ལ་བསམ་ན་ཐོན་མིས་མཛད་པར་གྲགས་པའི་མུན་པའི་སྒྲོན་མེ་ཞེས་པ་ཞིག་ཀྱང་ཡོད་པར་གོ་ལ།

དཀར་ལེབས་དྲུང་ཡིག་པད་མ་རྡོ་རྗེས་མཛད་པའི་རྟགས་འཇུག་གི་མཐའ་དཔྱོད་དུ་“རང་སྐད་དང་འཚམ་པའི་བརྡ་སྤྲོད་སུམ་ཅུ་བ་དང་། རྟགས་ཀྱི་འཇུག་པ། ཀླུ་དབང་མགུལ་རྒྱན་སོགས་མཛད་དེ་ཆོས་བསྒྱུར་པིར་ཐོགས་ཡི་གེའི་སྲོད་གཏོད་མཛད”ཅེས་གསུངས་པར་གཞིགས་ན་ཐོན་མིའི་མཛད་པའི་ཀླུ་དབང་མགུལ་རྒྱན་ཞེས་པ་ཞིག་ཀྱང་ཡོད་པར་ངེས་ལ།

གཞན་ཡང་། འབྲས་སྤུངས་མཁན་ཁྲི་བསྟན་པ་བསྟན་འཛིན་མཆོག་(1917—2006)གིས་མཛད་པའི་“སུམ་རྟགས་ཉི་ཟླ་ཟུང་འཇུག”ཅེས་པར། སུམ་རྟགས་གཉིས་ཀྱི་བསྟན་ཚུལ་བཅས་ལ་དཔགས་ཏེ་བསྟན་བཅོས་བརྒྱད་པོ་ཇི་ལྟ་བུ་དཔྱད་ནས་རིགས་སྒྲུབ་ཀྱི་ལམ་ནས་གཞན་དང་མི་མཐུན་པ་ཞིག་ཀྱང་གསུངས་ཡོད།

འདི་འདྲའི་གསུངས་ཚུལ་མི་འདྲ་བ་མཆིས་ནའང་ལོ་རྒྱུས་དང་བརྡ་སྤྲོད་པའི་བསྟན་བཅོས་སོགས་གཞུང་གུང་བསྒྲིགས་ན། སུམ་རྟགས་གཉིས་དང་། ཡི་གེའི་རྣམ་འགྱུར་བཟོ་བརྩམས། ཀ་མད་སུམ་ཅུར་བསྒྱུར་བ། སྡེབ་སྦྱོར་སྒྲིག་པའི་གཞི་མ། ཐོན་མིའི་མདོ་རྫིའི་སྒྲ་མདོ། མུན་པའི་སྒྲོན་མེ། ཀླུ་དབང་མགུལ་རྒྱན་བཅས་བརྒྱད་པོ་དེ་བགྲང་བར་བྱེད་དོ། །

2150/9/4 གཡུ་སྐྱེམས།