ལྐོག་གྱུར་ལ་བརྒྱུས་པའི་གཏམ་རིང་མ། པོ་ཏ་ལ

首页发布

ལྐོག་གྱུར་ལ་བརྒྱུས་པའི་གཏམ་རིང་མ།

པོ་ཏ་ལའི་མྱི།

ཧ་ཅང་ལྷིང་འཇགས་ཀྱི་ཁོར་ཡུག་དམིགས་བསལ་བ་ཞིག་ཏུ་དལ་ཅག་གེར་སྡོད་དུས།
རོལ་དབྱངས་གང་ཞིག་ལ་རེ་སྒུག་གི་ཚུལ་གྱིས་རྣ་བ་གཏོད་དང་།
སྙིང་ལ་སིམ་པའི་མེ་ཏོག་ཅིག་དང་འདྲ་བར།
བསུང་ངད་འཐུལ་བའི་སྙན་ངག་ཅིག་གྱེར་བ་ནི།
ཁྱོད་ཁོ་ནས་ལོངས་སུ་སྤྱོད་ཆོག་པའི་ལོངས་སྤྱོད་ཀྱི་འཇིག་རྟེན་ཞིག་ཡིན་ལ།
ཚེ་སྲོག་གི་རྒྱུན་ཐག་ལ་དམ་དུ་སྦྲེལ་བས་སྙན་ངག་ཅིག་ཀྱང་ཡིན་ངེས།

བློ་སེམས་རྩེ་གཅིག་གིས་སྙན་ངག་དེར་རོལ་གྱིན་རོལ་གྱིན།
སྐྱོ་གདུང་མཐའ་དག་ཕྱོགས་སུ་བསྡུས་པའི་སེམས་པ་དེའང་སྙི་མོ་སྙི་མོ་ཞིག་ཏུ་འགྱུར་ངེས།
དེ་ནི།
ཚེ་སྲོག་གི་རྒྱུན་ཐག་ལ་དམ་དུ་སྦྲེལ་བའི་སྙན་ངག་གིས་བསྐྲུན་པའི་ཁྱད་ཆོས་རེད།
དེ་ནི།
ངོ་མཚར་བའི་འཇིག་རྟེན་གྱི་གསང་བ་ཞིག་ཀྱང་ཡིན་པས་རེད།
སུ་ལའང་མི་དབང་བ་ནང་བཞིན་སུས་ཀྱང་དཔོག་མི་ཐུབ་པའི་སྙན་ངག་ནི།
ཅི་འདྲའི་མཛེས་སྡུག་ལྡན་པའི་གསང་བའི་སྒྲོམ་ཆེན་ཞིག་རེད་ཨང་།

སྙན་ངག་ནི་བརྩེ་དུང་དང་ན་ཟུག་གི་འབྲི་ཆུར་བརྒལ་བའི་གསེར་ཟམ་དེ་ཡིན་ན།
ཟམ་ཆེན་དེར་བརྒལ་ཐུབ་པ་ནི་སྙིང་སྟོབས་ཡིན་ལ།
བརྒལ་ཤེས་པ་ནི་གོ་སྐབས་ཡིན།
ཁྱོད་ཉིད་སྔར་བཞིན།
སུས་ཀྱང་བདག་ཏུ་བཀུག་ནས་གཟུང་མི་སྤོབས་པའི་ལམ་ཆེན་དེར་རིམ་གྱིས་བགྲོད་དང་།
བདེན་དོན་གྱི་གནས་ལུགས་རྟོགས་པའི་ཤེས་རབ་ནི།
རླབས་ཆེན་ཚེ་སྲོག་ལ་དབང་བར་ངེས།

རིམ་བཞིན།
ཁྱོད་ཉིད་སྙན་ངག་གི་བརྗོད་བྱར་གྱུར་ཚར་བ་ནས་བཟུང་།
སྟོང་བསམ་གྱི་མིག་ཟུང་རྒྱང་ལ་ཕྱོགས་པའི་འདུ་ཤེས་དང་
བྲལ་བར་གྱིས་དང་།
དེ་དུས།
ཁྱོད་ལ་ནམ་ཡང་སྐོམ་གདུང་དང་སྐྱོ་ངལ་གནངས་མི་སྲིད། https://t.cn/8DsxPrB