࿑ ཁྲུང་ཁྲུང་ལྷོ་ལམ་ལ་འཕུར་ཤིང་ཁ་བའི་འདབ་མ་

首页发布

࿑ ཁྲུང་ཁྲུང་ལྷོ་ལམ་ལ་འཕུར་ཤིང་ཁ་བའི་འདབ་མ་དག་ཐ་ཐོར་རུ་འབབ་པའི་གསེར་མདོག་གི་སྟོན་ཚུགས་འདིར་ཁོ་བོས་ནང་བསྟན་རིག་གཞུང་གི་སློབ་ཐུན་གྱི་བར་གསེང་ནས་༼དབུས་བཟའ་མཁའ་འགྲོ་འམ་དབུས་མོ་བདེ་སྐྱོང་དབང་མོའི་རྣམ་ཐར༽་ཆ་ཚང་ཞིག་ཀློག་པ་ཡིན། སེམས་ཚོར་རུ།
སྐྱེ་ཡུལ་དབུས་ཀྱི་བུ་མོ། །
སྐྱེལ་སྐྱེམས་ཆང་གི་མ་བཟི། །
ཆུང་གྲོགས་ཞེ་ལ་ཐོགས་ནས། །
གོམ་ཆུང་ལ་མོ་རྒལ་སོང་། །
ཐོབ་ཆེན་དཔོན་ལ་མ་འཁྲེང་། །
མནོག་ཆེན་ནོར་ལ་མ་ཆགས། །
སྒྱུ་འཕྲུལ་ལས་རླུང་གཅིག་གིས། །
ཤར་ཕྱོགས་སྲིན་ཡུལ་འགྲིམ་སྐད། །
རག་འཇམ་དར་གོས་མ་ནབ། །
རིན་ཆེན་རྒྱན་གྱིས་མ་སྤུད། །
སྐྱེ་ཡག་ལྷན་སྐྱེས་ཞལ་སྒོ། །
རིགས་འཛིན་གྲོགས་ལ་ཕུལ་སྙམ། །
བཅུ་དྲུག་ལུས་ཀྱི་ལང་ཚོ། །
སིལ་མ་རླུང་ལ་སྐུར་ནས། །
ཡིད་འབྱུང་ངག་གི་བརྡ་གླུ། །
མ་བཅོས་ཤུགས་ཀྱིས་རྡོལ་སོང་། །
ལྷུ་དྲུག་ལུས་ཀྱི་ལྗོན་པ། །
བཀྲེས་སྐོམ་ཚ་བས་སྐམ་ཀྱང་། །
ཟབ་གཏེར་ཙིན་ད་མ་ཎིས། །
ནང་གི་དབུལ་བ་སེལ་ཡོད། །ཅེས་བྲིས་པ་ལགས།

࿑ མི་ཚེ་ད་ལ་ཐུག་པའི་དབར་དུ་སྙན་ངག་རོབ་ཙམ་བཀླགས་མྱངས། སྲོལ་རྒྱུན་དང་། དེང་རབས། མི་རིགས་གཞན་གྱི་སྙན་ངག་མི་འདྲ་བ་སྣ་ག་ཞིག་ལ་སློབ་སྦྱོང་ཐན་ཐུན་རེའང་ཚོད་ལྟ་བགྱིས་པའི་ཟོལ་བསྟན་མྱངས། ཕལ་ཆེར་རིག་པའི་ཚུན་ཆད་དང་། ཤེས་པའི་ཚུན་ཆད་ཀུན་པོ་མ་བལྟས་པ་དང་། མ་བཀླགས་པ་ཞིག་མེད་སྙམ། མ་གཞི་ཁོ་བོ་སྙན་ངག་ཀློག་པར་ཤིན་ཏུ་མོས། འོན་ཀྱང་། གཞན་དང་བསྡུར་ན་བཀླགས་གྲངས་ཁྱབ་ཆུང་ཤོས་ཤིག་ལས་མིན་པ་བདེན་དུ་འཆི། དེ་ལྟ་ནའང་། དུས་ད་ལྟའི་དབར་དུ་ཁོ་བོ་རང་གིས་མཇལ་བའི་བརྩམས་ཆོས་དང་། རྩོམ་པ་པོ་ཀུན་ལས་རྩོམ་མཁན་ཕུལ་དུ་བྱུང་ཞིང་། བརྩམས་ཆོས་ཀྱིས་ཡིད་ཀྱི་བརྟན་པ་ཅིག་ཅར་དུ་ཕྲོགས་པ་ཞང་ཞུང་ཆོས་དབང་གྲགས་པ༼༡༤༠༤-༡༤༦༩༽ལས་གང་ཡང་མི་འདུག སྔ་མོ་མཁས་དབང་དགེ་ཆོས་ལགས་ཀྱི་རྩོམ་གཤིས་ཤིན་ཏུ་ལེགས་པར་སྙམ། འོན་ཀྱང་། ཞང་ཞུང་ཆོས་དབང་གྲགས་པའི་གསུང་ཐོར་དག་བཀླགས་རྗེས་དགེ་ཆོས་ཀྱི་རྩོམ་དག་དེ་ཙམ་རེད་སྙམ། དེ་ནི་ཞང་ཞུང་ཆོས་དབང་གི་སྙན་ངག་ཤིན་ཏུ་སྙན་པ་དང་། ལེགས་པའི་རྒྱུ་མཚན་གྱིས་ལོས་ཡིན། ཞང་ཞུང་ཆོས་དབང་གི་སྙན་ངག་གི་སྒྱུ་རྩལ་དང་། ཁྱད་ཆོས། མཛེས་ཉམས། ཚིག་རྒྱན། རྟོག་ཡུལ་མཛེས་པ་སོགས་ཀྱི་ཕྱོགས་ནས་ཅིའང་གླེང་བའི་ཟོལ་མི་བསྟན་པར་ཁོང་གི་དུས་འཁོར་གྱི་ཆེད་བརྗོད༼བདེ་ཆེན་ང་རོ།༽གཅིག་པུའི་ཡིག་ཕྲེང་དང་། འབྲི་སྟངས། ཚགས་བར་བཅས་ཀྱིས་ཧ་ལས་ཤིང་། དྲན་པ་ཤོར་ཏེ་ཧོན་ཡང་འཐོར་སོང་། གཞན་ཡང་ཞང་ཞུང་ཆོས་དབང་ནི་ཕུན་སུམ་ཚོགས་པའི་ཉམས་འདོན་པ་ལའང་མཆོག་ཏུ་གྱུར་པ་ཞིག་རེད། གང་ལྟར། དངོས་གནས་ད་ལ་ཐུག་པའི་དབར་དུ་ཁོང་ལྟ་བུའི་རྩོམ་མཁན་མཆོག་ཏུ་གྱུར་པ་ཞིག་བྱུང་མེད་པ་འདྲ། མ་མཐའང་ཁོ་བོས་ཁོང་ལས་མ་མཐོང་། མ་རིག མ་ཤེས་སོ། །

࿑ སྤྱིར་བཏང་། ལོ་རྒྱུས་ལ་བལྟས་ཚེ་རང་རེའི་ལྗོངས་ལ་སྔ་མོ་ནས་ལམ་ཡིག་འབྲི་མཁན་ཤིན་ཏུ་མང་། འོན་ཀྱང་། དེ་དག་གི་བརྗོད་བྱ་དང་། རྗོད་བྱེད་སོགས་གཙོ་བོ་ནང་ཆོས་ཀྱི་བྱུང་བ་ཤུགས་ཆེ་ཤོས་བགྱིས་ཡོད་པ་ལས་ཡུལ་སའི་མཐོང་ཐོས་མྱོང་གསུམ་གྱི་གནས་བབ་འབྲི་མཁན་ཤིན་ཏུ་ཉུང་བ་སྙོན་མེད་ཡིན། དེ་བས། ཡུལ་སའི་གནས་བབ་ཇི་བཞིན་འབྲི་བའི་རྩོམ་པ་པོ་འདི་དང་། འདི་ལྟ་བུ་ཚོས་ཟིན་ཐོ་ལས་རི་བོ་ཧི་མ་ལ་ཡའི་ཕར་ཚུལ་གྱི་སྤུན་ཟླ་མང་ཤོས་ཀྱི་བདེ་སྡུག་དང་། གནས་བབ། རིག་གནས། གོམས་སྲོལ། མིང་བརྡ། ཆོས་ལུགས་སོགས་ཕྱོགས་མང་ཤོས་ཤིག་ནས་རྒྱུས་མངའ་རྒྱུན་ཤེས་ཙམ་ཞིག་ཤེས་རྟོགས་བྱུང་ཐུབ་པ་དེབ་འདིའི་ཡང་སྙིང་གཞན་ཞིག་ཅི་ལ་མིན། ལྷག་ཏུ་དམ་པ་གོང་མ་རྣམས་ཀྱིས་མཛད་པའི་སྔོན་གྱི་ལོ་རྒྱུས་དང་རང་གི་མཐོང་ཐོས་མྱོང་གསུམ་ཟུང་དུ་འབྲེལ་ཏེ། འདྲ་རིས་དང་བཅས་པ་དེབ་གཟུགས་སུ་དགོད་ཐུབ་ན་ཅི་འདྲའི་ལེགས་ཨང་། སྐྱ་བོའི་འཁྱམ་སྐྱོད་དེབ་གསུམ་པོ་འདི་ཁོའི་གསང་བ་དང་། གློའུ་མོ། སེ་ལེན་ལས་ཡག་ལ། ལྷག་ཏུ་བཅད་རྩོམ་ལས་ལྡབ་འགྱུར་གྱིས་ཡག་སྣང་བྱུང་། མ་གཞི་ཁོའི་བཅད་རྩོམ་སྙན་ངག་དག་ལ་བྲོ་བ་ཞིག་ལར་ནས་མི་འདུག སེམས་སྡུག་སྤྱད་ཅིག་རེད། [呲牙] ཁོའི་ཟིན་ཐོ་ལས་དམིགས་བསལ་གྱི་ཁྱད་ཆོས་ཤིག་ཡོད་པ་ནི་རང་གི་ཚོར་བ་གཙོ་བོར་བཟུང་ནས་བྲིས་པ་དེ་ཁོ་ན་རེད་སྙམ། དེབ་འདི་དག་ལས་རྒྱལ་རོང་གི་སྐོར་ནས་བྲིས་པ་དེ་ཚོས་ཁོ་བོར་མཁོ་ཤིན་ཏུ་སོད་པའི་ཚོར་སྣང་བྱུང་། གཞན་ཁོ་དང་། ཁོ་ལྟ་བུའི་བོད་ཡིག་ནམ་ཞར་འཁོལ་བཞིན་པ་ཚོས་འདོད་པ་དོན་ལ་ཁེལ་ཞིང་། ལམ་ལྷོང་ཡོང་བར་སྨོན་ནོ། །