བྱམས་དང་སྙིང་རྗེ་བྱང་ཆུབ་སེམས་མཆོག་གིས། །
ཐུགས་རྒྱུད་ཡོངས་གཏམས་ཉམས་ལེན་སྙིང་པོ་ཡི། །
གདམས་པས་འགྲོ་རྣམས་འཁོར་བའི་གཡང་ས་ལས། །
སྐྱོབ་ལ་མཚུངས་བྲལ་རྟོགས་ལྡན་བླ་མ་མཁྱེན། །

བདག་ཅག་སྙིགས་འགྲོ་ཆོས་ལ་བློ་མིག་ཕྲ། །
ཕྱིན་ཅི་ལོག་ལ་རྣམ་དཔྱོད་བློ་གྲོས་འབར། །
སྡིག་སྤྱོད་ཀུན་ལ་ཞུམ་མེད་སྒྲུབ་ཕོད་ཅིང་། །
རང་རྒྱུད་མི་བརྟག་ཇི་མི་སྙམ་ལ་གཟིགས། །

ཁ་མིན་དོན་གྱི་ངེས་འབྱུང་སྙིང་ལ་སྐྱེས། །
བཟོད་དུ་མེད་པའི་སྙིང་རྗེས་གཞིར་བྱས་པའི། །
བྱང་ཆུབ་སེམས་ལས་ནམ་ཡང་མི་གཡེལ་བར། །
ཉམས་ལེན་རྣལ་མ་ནུས་པར་བྱིན་གྱིས་རློབས། །

ལས་ཉོན་མཚོན་ཆ་རྩུབ་མོས་གཟིར་བ་ཡི། །
རྣམ་སྨིན་སྒྱུ་མའི་ལུས་ཀྱིས་བཟོད་དཀའ་ཕྱིར། །
བྱིན་བརྒྱུད་དགོངས་པའི་རྩལ་ཆེན་རྫོགས་པ་ཡི། །
ནང་གི་བདེ་ཆེན་མྱུར་དུ་སྦར་བར་མཛོད། །

གསར་རྙིང་གི་གྲུབ་མཐའ།

མཁས་དབང་ཚུལ་ཁྲིམས་བློ་གྲོས་ཀྱི་གསུང་བཤད་ཟིན་བྲིས།

ཟིན་འདེབས་པ། ཀར་ལ་ནག་ཚུབ།

ཕ་མེས་ཀྱི་གསར་རྙིང་གི་གྲུབ་མཐའ་གང་ཡིན་ཡང་དེ་གཙོ་བོར་འཛིན་གྱི་གལ་ཆེ། གྲུབ་མཐའ་སོ་སོ་ལ་དད་པ་ལེགས་པོ་བྱེད་དགོས་ན་ཡང་དགོན་པ་གྲུབ་མཐའ་གཞན་དང་གཞན་དུ་བསྒྱུར་ན་ཉོག་དྲྭ་མང་པོ་ཡོང་ཞིང་། མང་ཚོགས་མང་པོའི་འདུན་པ་ལ་ལྟོས་དགོས་པ་ལས་རང་གི་ཞེ་འདོད་དང་བསྟུན་ནས་གང་དྲན་དྲན་བྱེད་རྒྱུ་རྩ་བ་ནས་མེད། འོ་ན་སྒར་འདི་གྲུབ་མཐའ་གང་དུ་གཏོགས་ཤེ་ན་རྙིང་མར་གཏོགས་ཟེར་དགོས་པ་ཡིན་མོད། གྲུབ་མཐའ་སོ་སོའི་གཞུང་ལུགས་སྦྱང་རྒྱུ་ཡོད་པ་འདི་རེད། དེ་བས་སོ་སོ་ཕ་ཡུལ་དུ་འགྲོ་དུས་ཀྱང་རང་དགོན་གྱི་གྲུབ་མཐའ་གང་ཡིན་པ་དེ་གཙོ་བོར་བྱེད་རྒྱུ་ལས་ས་སྐྱའི་དགོན་པ་ལྟ་བུ་ཞིག་རྙིང་མར་བསྒྱུར་རྒྱུ་མེད། རྒྱུ་མཚན་ནི་ས་གནས་དེའི་མང་ཚོགས་མང་ཆེ་བས་གཙོ་བོ་དད་པ་བྱེད་ཡུལ་གྲུབ་མཐའ་དེ་ཡིན་པས་མི་གཅིག་ལ་སྒྱུར་རྒྱུའི་དབང་ཆ་མེད།

༼ནང་ཆོས་ཀྱི་གཞི་རྩའི་ལྟ་བ་དང་སྒོམ་པ་ལ་འགྱུར་བ་གཏོང་དགོས་དོན་མེད་མོད། སྤྱོད་པ་ལ་ནི་བསྒྱུར་བཅོས་གཏོང་དགོས་ངེས་ཡིན་ཏེ། ལྷག་ཏུ་དགོན་པ་འགའ་རེའི་ལམ་ལུགས་དང་སྤྱོད་པ་ལ་བསྒྱུར་དགོས་ས་མང་པོ་འདུག

༼ལྟ་བ་སྣ་མང་ཡོད་དགོས་ཟེར་བ་འདི་ཡང་ནུབ་ཕྱོགས་ནས་ཚུར་དར་བ་ཞིག་ཡིན་ལ། འདི་ལ་རྒྱུ་མཚན་གཉིས་ཏེ། གཅིག་ནི། ལྟ་བ་སྣ་མང་ཡོད་ན་རང་དབང་ཡོད་པ་མཚོན་ཏེ། གལ་ཏེ་མི་ཚང་མས་ཟེར་རྒྱུ་གཅིག་ཡིན་ན་དེའི་ལྟག་རྒྱབ་ན་ཁྲིམས་ལུགས་སམ་གནོན་ཤུགས་གཞན་ཞིག་གིས་རང་དབང་མེད་པར་བྱས་ཡོད་པར་མཚོན་ཡོད།

དེ་བས་བསམ་བློ་རང་དབང་མཚོན་ཆེད་ལྟ་བ་སྣ་མང་ཡོད་དགོས་པ་རེད། རྒྱུ་མཚན་གཞན་ཞིག་ནི་ལྟ་བ་སྣ་མང་ཡོད་ན་དེའི་ཁྲོད་ནས་ཡང་དག་པའི་བསམ་བློ་དམིགས་བསལ་བ་འབུད་ཐུབ་པའི་རྒྱུ་མཚན་གྱིས་རེད། འོན་ཀྱང་ལྟ་བ་སྣ་མང་ཡོད་ན་དགེ་མཚན་གྱི་ཆ་ཡང་ཡོད་ལ་སྐྱོན་གྱི་ཆ་ཡང་ཡོད་པ་རེད།

དེས་ན་ང་ཚོར་མཚོན་ན་ཡང་ལྟ་བ་སྣ་མང་ནི་ཡོད་ཆོག་པ་ལས་ཡོད་དགོས་ངེས་ཤིག་མ་རེད། བོད་ལ་སྔར་ནས་ཆོས་ལུགས་ལ་བོན་ཆོས་དང་བན་ཆོས་གཉིས་ལས་མེད་ལ་དེ་ཀས་མ་འཐུས་པ་གང་ཡང་མི་འདུག ད་དེའི་སྟེང་ཡེ་ཤི་སོགས་ལ་དད་པ་མ་བྱས་ན་འགྲིག་ཡོད་པ་རེད།

༼ཚན་རིག་ནི་ཧ་ཅང་ཡག་པོ་རེད། ངས་ཀྱང་ཚན་རིགས་ལ་སྦྱོང་བ་བྱས་པ་ཡིན། དེ་བཞིན་བན་ཆུང་ཆ་གས་ཀྱང་ཆོས་ལུགས་སྦྱངས་བའི་སྟེང་དུ་ཚན་རིག་སྦྱངས་ནས་གནས་ལུགས་འཚོལ་བ་ལས་ཚན་རིག་ལ་དགག་པ་རྒྱག་དགོས་དོན་མེད་དེ་ཆོས་གཞུང་དུ་རྗེས་དཔག་གིས་གཏན་ལ་ཕབས་པ་དེ། ཚན་རིག་པས་མངོན་སུམ་གྱིས་བདེན་དཔང་བྱས་ཡོད་པ་རེད།

གལ་ཏེ་བཤད་ཚུལ་འགའ་རེ་གནས་ལུགས་དང་འགལ་ན་སངས་རྒྱས་ཀྱི་གསུང་ཡིན་ནའང་སྒྲ་ཅི་བཞིན་དུ་ཁས་ལེན་རྒྱུ་མེད། རྒྱུ་མཚན་ནང་ཆོས་ནི་བདེན་པ་དང་དོན་དངོས་འཚོལ་སྤྱད་ཅིག་ཡིན་པས་སོ།། འོན་ཀྱང་ཚན་རིག་ནི་བདེན་པ་ཡོད་ཚད་འཇལ་བྱེད་ཀྱི་ཚད་ཤིང་ཞིག་ཏུ་བཟུང་འོས་སམ་ཞེ་ན། མཐའ་གཅིག་ཏུ་ངེས་པ་མེད་དེ། འདིས་མ་རྟོགས་པའི་གནས་ལུགས་ནི་ཧ་ཅང་མང་པོ་ཡོད་པ་རེད།

བྱ་ཁྱུང་དགོན་པ་ནི། ཆོས་རྗེ་དོན་གྲུབ་རིན་ཆེན་གྱིས་ཕྱི་ལོ་ ༡༣༤༩ ལོར་ཕྱག་བཏབ་པ་ཞིག་ཡིན་ལ། དེ་ནི་མདོ་སྨད་ཀྱི་བྱང་གི་དགོན་ཆེན་བཞིའི་ནང་གི་གཅིག་ཡིན༑ དགོན་པ་དེ་རི་མཐོན་པོ་ཞིག་གི་ངོས་སུ་ཆགས་ཤིང་། རིའི་སྒང་ཐོག་ནས་བལྟས་ན་རི་དེའི་འདབས་ཀྱི་ལུང་གཞོང་ཡངས་པོའ་ི ནང་དུ་རྨ་ཆུ་དལ་གྱིས་བཞུར་བམཐོང་ཞིང་། རྨ་ཆུ་རྒྱུ་བ་དེའི་གཟུགས་བཀོད་ཀྱི་ངོས་ནས་བརྗོད་ན་སྦྲུལ་རིང་པོ་ཞིག་སྤང་གཞོང་ཆེན་པོ་ཞིག་གི་སྟེང་དུ་དལ་བུས་འགྲོ་བ་ལྟ་བུའི་སྣང་བ་འཆར་རྒྱུ་ཡོད༑ དགོན་པ་དེ་ནི་རི་དེའི་སྒང་ཐོག་ཏུ་ཤིང་སྣ་ཐར་ཐོར་ལྡན་པའི་ས་ཁུང་ཞིག་ཡོད་པ་དེར་ཆགས་ཡོད་ཅིང་། དགོན་པའི་ཆ་ཤས་ཁག་གཅིག་རིའི་སུལ་དུ་རིའི་བྲག་ངོས་སུ་འབྱར་ནས་བསྡད་པ་ལྟ་བུར་ཡོད།
དེ་ལྟ་ན་ཡུལ་ལྗོངས་མཐོང་རྒྱ་ཤིན་ཏུ་ཡངས་པའི་རིའི་དབེན་གནས་དེར། ཁྱེའུ་ཙོང་ཁ་པས་དངོས་གཞིའི་ཆོས་ཀྱི་སློབ་གཉེར་འགོ་བཙུགས་ཏེ། ལོ་བཅུ་ཙམ་གྱི་རིང་ལ་བྱ་ཁྱུང་དགོན་པར་ཆོས་རྗེའི་དྲུང་དུ་བཞུགས། དེའི་རིང་ཆོས་རྗེའི་དྲུང་ནས་གསང་སྔགས་རྡོ་རྗེ་ཐེག་པའི་དབང་ཡང་ཁག་གཅིག་ཐོབ་པ་དང་། ཆོས་རྗེ་དོན་གྲུབ་རིན་ཆེན་དང་ལྷན་དུ་མཚམས་བསྙེན་ཡང་འགའ་ཙམ་བཞུགས་གནང་༑ ཆོས་རྗེས་ཁྱེའུ་ཆུང་ཙོང་ཁ་པ་དེ་རང་གི་མིག་འབྲས་ལྟར་གཅེས་པར་བསྐྱངས་ལ། ལན་ཞིག་ཁྱེའུ་ཆུང་ནད་དྲག་པོས་བཏབ་ནས་ཡོད་པར་ཆོས་རྗེ་རང་ཉིད་ནས་ནད་གཡོག་ཀྱང་གནང་བ་སོགས་ཀྱིས་བྱམས་སྐྱོང་ཚད་མེད་པ་གནང་བར་གྲགས། ཙོང་ཁ་པ་དགུང་ལོ་བདུན་ཙམ་ལ། བྱ་ཁྱུང་དགོན་པར་ཆོས་རྗེ་དོན་གྲུབ་རིན་ཆེན་གྱིས་མཁན་པོ་མཛད་དེ་དགེ་ཚུལ་གྱི་སྡོམ་པ་བཞེས་ཤིང་། དེ་དུས་རབ་བྱུང་གི་མཚན་ལ་བློ་བཟང་གྲགས་པ་ཞེས་གསོལ། བློ་བཟང་གྲགས་པ་ཞེས་པའི་མཚན་དེ་རྗེ་ཙོང་ཁ་པ་ཉིད་ནས་རབ་བྱུང་གི་སྡོམ་པ་བཞེས་པ་ནས་བཟུང་སྟེ་སྐུ་ཚེ་རིལ་པོར་བེད་སྤྱོད་གནང་བའི་མཚན་དུ་གྱུར། དེ་ཡང་སྤྱིར་བཏང་བྱས་ན། རབ་བྱུང་གི་མཁན་པོས་བླ་མ་རང་གི་མཚན་གྱི་ཆ་ ཤས་སྔ་མ་དེ་སློབ་མའི་མིང་གི་ཆ་ཤས་སྔ་མར་གནང་བའི་སྲོལ་ཡོད་པས། རྗེ་ཙོང་ཁ་པའི་རབ་ བྱུང་གི་མཚན་ལ་ཡང་ཡོངས་གྲགས་ལྟར་ན། དོན་གྲུབ་ཆེ་གེ་མོ་ཞེས་པ་ཞིག་ཡོད་དགོས་མོད། དེ་ལྟ་ནའང་མཚན་ལ་བློ་བཟང་གྲགས་པ་ཞེས་གནང་བའི་གནད་ནི། སྔར་ཆོས་རྗེ་དོན་གྲུབ་རིན་ཆེན་རང་ཉིད་དབུས་སུ་ཡོད་པའི་སྐབས་སུ། སྣར་ཐང་གི་མཁས་པ་མཆིམས་བློ་བཟང་ གྲགས་པ་(༡༢༩༩-༡༣༧༥)དང་མཇལ་ཞིང་། མཆིམས་བློ་བཟང་གྲགས་པས་ཆོས་རྗེ་དོན་གྲུབ་ རིན་ཆེན་ལ་མ་འོངས་པར་མདོ་སྨད་དུ་རང་ཉིད་ལ་སློབ་མ་ཁྱད་པར་བ་ཞིག་འབྱུང་བའི་ལུང་ བསྟན་ཏེ། དེ་དུས་སློབ་མ་དེ་ལ་མིང་བློ་བཟང་གྲགས་པ་ཞེས་པ་འདི་སྩལ་དགོས་པའི་བསླབ་ བྱ་གནང་ཡོད་པར་བརྟེན། ཆོས་རྗེ་དོན་གྲུབ་རིན་ཆེན་གྱིས་ཀྱང་ལུང་བསྟན་དེ་གཞིར་བཟུང་ བྱིས་པ་ཙོང་ཁ་པ་ལ་རབ་བྱུང་གི་མཚན་དུ་བློ་བཟང་གྲགས་པ་ཞེས་བཏགས་པར་གནང་༑
རྗེ་ཙོང་ཁ་པ་རང་ཉིད་ཆུང་བྱིས་པའི་སྐབས་ནས་ཆོས་རྗེ་དོན་གྲུབ་རིན་ཆེན་གྱིས་བརྩི་ མཐོང་དང་བྱམས་བརྩེ། ཡ་རབས་ཀྱི་བསླབ་བྱ་ལམ་སྟོན་སོགས་ཀྱི་བཀྲིན་གྱིས་ཤིན་ཏུ་ལེགས་ པར་བསྐྱངས་པར་བརྟེན། རང་ངོས་ནས་ཀྱང་རྩ་བའི་བླ་མ་དང་པོ་དེར་བརྩི་བཀུར་དང་དད་ གུས་ཤིན་ཏུ་ཆེ་བར་མཛད་ལ། ཕྱིས་སྐུ་ན་བགྲེས་པའི་སྐབས་སུའང་ཆོས་རྗེ་དོན་གྲུབ་རིན་ཆེན་ གྱི་མཚན་ངག་ནས་བརྗོད་པ་ཙམ་གྱིས་རང་དབང་མེད་པར་དད་པའི་ཐལ་མོ་སྦྱོར་ཞིང་སྤྱན་ནས་མཆི་མ་ལྷུང་བ་སོགས་བྱུང་། https://t.cn/zRZ1rBj