༄༅། །ཀུན་མཁྱེན་འཇིགས་མེད་དབང་བོའི་སློབ་གཉེར་བསླབ་བྱ་བཞུགས་སོ།།

བསླབ་པར་བྱ་བའི་གནས་ཀུན་མཐར་ཕྱིན་ཏེ།།
ཚུལ་དེ་གཞན་ལ་འདོམས་མཛད་དགེ་བའི་གཤེས།།
སྨྲ་བའི་དབང་ཕྱུག་གང་དེར་གུས་བཏུད་དེ།།
བསླབ་བྱའི་འཕྲེང་བ་མདོ་ཙམ་བརྗོད་ཀྱིས་ཉོན།།

སྔོན་བསགས་ལེགས་སྤྱད་མཐུ་ལས་དལ་འབྱོར་རྟེན།།
རྙེད་འདི་ཉིན་མོའི་སྐར་མ་བཞིན་དུ་དཀོན།།
དོན་མེད་ངང་དུ་ཟད་ན་ཤིན་ཏུ་འཁྲུལ།།
དོན་ཆེན་སྙིང་བོ་བླངས་ན་མི་ལེགས་སམ།།

ཐོས་བསམ་སྒོམ་པས་ཤེས་རྒྱུད་མ་སྦྱངས་པར།།
རྣམ་འདྲེན་རྒྱལ་བའི་གོ་འཕང་ཇི་ལྟར་འཐོབ།།
རྨོངས་པའི་མུན་པ་ཀུན་ཏུ་སེལ་བའི་ཕྱིར།།
ཐོག་མར་ཐོས་པའི་སྒྲོན་མེ་བསྟེན་པ་གཅེས།།

བློ་གྲོས་ཉམ་ཆུང་སྦྲང་བུའི་གཤོག་རླབས་ཀྱིས།།
གཞུང་མང་ནམ་མཁའི་ཕ་མཐའ་ཇི་ལྟར་གཞལ།།
གསུང་རབ་ཀུན་གྱི་གནད་བསྡུས་བཀའ་པོད་ལྔར།།
སློབ་པ་སྔོན་བྱོན་མཁས་པའི་ལུགས་སྲོལ་ཡིན།།

དེ་ཕྱིར་ཡུམ་མཆོག་སྦས་དོན་མངོན་རྟོགས་དང་།།
དངོས་བསྟན་སྟོང་ཉིད་ཤེས་བྱའི་གཞི་ལྔའི་ཚུལ།།
འདུལ་བའི་བཅས་མཚམས་ཕྲ་རགས་སྟོན་པ་ཡི།།
དབུ་ཕར་འདུལ་མཛོད་གཞུང་ལ་ཞིབ་ཏུ་སྦྱོངས།།

མ་རྟོགས་ལོག་རྟོག་ཐེ་ཚོམ་འཁྲུལ་བ་ཀུན།།
བཟློག་ཕྱིར་སྡེ་བདུན་མདོ་དང་བཅས་པ་སོགས།།
ཚད་མའི་གཞུང་ལའང་འབད་པས་ལེགས་སྦྱངས་ཏེ།།
རིགས་པ་སྨྲ་བའི་དབང་པོར་འགྱུར་བར་མཛོད།།

ཐལ་འཕྲེང་ཚིག་དོན་ལེགས་པར་ངེས་པ་ན།།
དེ་ནས་སྤྱི་དོན་ཊཱིཀྐ་སོགས་བལྟས་པས།།
ཉི་མའི་ཟེར་དང་འཕྲད་པའི་པདྨོ་བཞིན།།
བློ་གྲོས་འཇུག་པ་མཆོག་ཏུ་རྒྱས་པར་འགྱུར།།

དེ་ལས་གཞན་དུ་སྐབས་སུ་གང་བབས་པའི།།
ཐལ་འཕྲེང་ཟུར་བཀོལ་ལྟ་བ་ཡལ་བོར་ནས།།
དཔེ་མང་ལྟ་བ་ཤེས་རབ་འཆལ་བའི་རྒྱུ།།
དེ་ཕྱིར་ཐད་ཀའི་གཞུང་ལ་གཅིག་ཏུ་དྲིལ།།

དཔེ་ཆ་མི་འཛིན་དཔེ་ཀློག་ཙམ་ལ་རེ།།
རྩོད་གྲྭ་མི་ནུས་ཆོས་གྲྭར་དོན་མེད་འདའ།།
སྐྱོར་སྦྱངས་མི་ནུས་གཉིད་དང་འདུ་འཛིར་ཆགས།།
འདི་དག་སློབ་གཉེར་གེགས་ཀྱི་གཙོ་བོ་ཡིན།།

རིགས་པས་བདར་ཤ་མ་བཅད་གཞུང་དོན་ལ།
ཚིག་སྤྱིའི་གོ་བ་ལམ་ཙམ་ཡོད་ན་ཡང་།།
བརྒལ་ཞིང་བརྟགས་ཚེ་བྱེ་མའི་ཆང་བུ་ལྟར།།
འགྱུར་ཕྱིར་རིགས་པའི་གསང་ཚིག་ཞིབ་ཏུ་སློབས།།

འཕྲལ་དུ་ཤ་ཚ་སྙིང་ཉེ་ལྟར་སྟོན་ཀྱང་།།
ཡུན་རིང་འགྲོགས་ཚེ་ཡོན་ཏན་ཚོགས་འགྲིབ་ལ།།
རྣམ་མང་སྐྱོན་གྱིས་གོས་པར་འགྱུར་བ་ཡི།
སྡིག་པའི་གྲོགས་པོ་གང་ཡིན་རིང་དུ་སྤོངས།།

སྒོ་གསུམ་བག་ཡོད་སྤྱོད་པས་རྟག་ཏུ་འཚོ།།
ཁྲེལ་ཡོད་ངོ་ཚ་ཤེས་ཤིང་ཕྱི་ཐག་རིང་།།
གང་བརྩམས་ལས་རྣམས་མཐའ་རུ་འདོན་པ་ཡི།།
ཡ་རབས་སྐྱེ་བོའི་སྤྱོད་ཚུལ་དང་དུ་ལོངས།།

སྐྱིད་སྡུག་ལེགས་ཉེས་ཇི་ལྟར་གྱུར་ན་ཡང་།།
བླ་མ་དཀོན་མཆོག་གསུམ་ལ་བློ་ཕུགས་གཏོད།།
གདུགས་ཤེར་སྒྲོལ་མ་ཚེ་གཟུངས་འཕྲིན་བཅོལ་སོགས།།
གེགས་སེལ་རིམ་གྲོ་འབད་དེ་བསྒྲུབ་པར་འཚལ།།

དབུས་གཙང་དག་པའི་ཞིང་དུ་ཕྱིན་ན་ཡང་།།
སློབ་གཉེར་མེད་པར་རང་ཡུལ་ལོག་པ་ནི།།
དེད་དཔོན་འགའ་ཞིག་རིན་ཆེན་གླིང་སོན་ཏེ།།
ལག་པ་སྟོང་པར་རང་ཁྱིམ་འོངས་པ་བཞིན།།

དེ་ཕྱིར་དོན་མེད་གཡེང་བ་རྒྱང་བསྲིངས་ཏེ།།
སྔོན་བྱོན་མཁས་པའི་རྣམ་ཐར་ཇི་བཞིན་དུ།།
གཞུང་ལུགས་རྒྱ་མཚོའི་དགོངས་དོན་མ་ལུས་པ།།
ཁོང་དུ་ཆུད་ཕྱིར་སྙིང་རུས་ལྕག་གིས་བྲོབས།།

བསླབ་བྱའི་རིམ་པ་རྒྱ་མཚོ་ལྟ་བུ་ལས།།
མདོར་བསྡུས་ཆུ་ཐིགས་ཚུལ་དུ་བརྗོད་པ་སྟེ།
ཕན་པའི་གདམས་ངག་འདི་ལས་གཞན་གང་ཞེས།།
མ་བརྗེད་སྙིང་གི་དཀྱིལ་དུ་འཇོག་པར་མཛོད།།

བློ་གྲོས་ལུས་སྟོབས་རྒྱས་པའི་རྐང་དྲུག་ཁྱོད།།
ཐུབ་བསྟན་པདྨོ་རྒྱས་པའི་དགའ་ཚལ་དུ།།
ཐོས་བསམ་ཀུན་དགའི་རྩེད་དགའ་མཐར་ཕྱིན་ཏེ།།
ལུང་རིགས་སྨྲ་བའི་དབང་པོར་འགྱུར་བར་སྨོན།།

ཞེས་པ་འདི་ནི་རང་གི་གམ་དུ་ཉེ་བར་འཁོད་པའི་ཞབས་དྲུང་གྲགས་པ་རྒྱལ་མཚན་དབུས་ཕྱོགས་སུ་སློབ་གཉེར་ལ་བརྫང་བའི་ཚེ་བསླབ་བྱ་འདི་ལྟ་བུ་ཞིག་དགོས་ཞེས་བསྐུལ་ངོར། ༧བཙུན་པ་དཀོན་མཆོག་འཇིགས་མེད་དབང་བོས་སྨྲས་པའོ།། །།
​

༄༅། །དགེ་སྦྱོར་ལ་བསྐུལ་བའི་བསླབ་བྱ་མདོར་བསྡུས།
མཛད་པ་པོ། གུང་ཐང་བསྟན་པའི་སྒྲོན་མེ།

མཁའ་མཉམ་འགྲོ་ལ་བརྩེ་བའི་དབང་གྱུར་ཏེ། །
བྱ་དཀའི་སྤྱོད་པ་དཔག་མེད་གོམས་པ་ཡིས། །
ཡོན་ཏན་ཀུན་རྫོགས་སྐྱོབ་པ་བླ་ན་མེད། །
བླ་མ་ཐུབ་པའི་དབང་པོས་དུས་ཀུན་སྐྱོངས། །

དལ་བའི་རྟེན་ཐོབ་རྒྱལ་བའི་བསྟན་དང་མཇལ། །
དམ་པས་རྗེས་བཟུང་མཐུན་རྐྱེན་འཛོམས་པའི་དུས། །
དོན་མེད་གཡེང་བས་རང་ཉིད་མ་བསླུས་པར། །
རྣམ་གཞག་གཏན་གྱི་འདུན་མ་སྒྲུབ་པར་རིགས། །

ཡ་མཐའ་གཏུགས་པ་མེད་པའི་དུས་ཤིག་ནས། །
གཏིང་ཟབ་འཁོར་བ་སྡུག་བསྔལ་རྒྱ་མཚོ་འདིར། །
ལས་དང་ཉོན་མོངས་རླུང་གིས་རབ་བདས་ཏེ། །
དབང་མེད་ཟོ་ཆུན་འཁོར་ལོ་བཞིན་དུ་འཁོར། །

ཁྱད་པར་ལྕགས་སྲེག་འབར་བའི་དམྱལ་ཁང་དུ། །
བཟོད་གླགས་མེད་པར་སྡུག་བསྔལ་འགའ་ཞིག་གི །
ངང་དུ་མཐའ་ཡས་བསྐལ་བར་གནས་པ་ལས། །
དལ་འབྱོར་ཐོབ་པ་ད་ལན་ཙམ་ཞིག་ཡིན། །

ཡར་འགྲོ་མར་འགྲོ་གཉིས་ཀྱི་སོ་མཚམས་འདིར། །
སྐྱིད་སྡུག་འདམ་ག་རང་ལ་གཏད་པའི་ཚེ། །
བརྩོན་པ་དྲག་པོས་བཙན་ས་མ་ཟིན་ན། །
སླར་ཡང་དམྱལ་བའི་གནས་དེར་འཁྲིད་པར་ངེས། །

རླུང་ནང་མར་མེ་ལྟ་བུར་གཡོ་བའི་སྲོག །
སྔོན་ཆད་མ་འགགས་བླ་མ་ལྷ་ཡི་དྲིན། །
ད་ནི་དེ་རིང་ཁོ་ན་མི་འཆི་བའི། །
བློ་གདེང་མེད་ཕྱིར་ཕྱི་བཤོལ་ག་ལ་རིགས། །

གཉེན་འཁོར་ལོངས་སྤྱོད་ཇི་ཙམ་འཛོམས་ན་ཡང་། །
རྨི་ལམ་ཇི་བཞིན་དྲན་པའི་ཡུལ་དུ་འགྱུར། །
ཕྱི་མར་འགྲོ་ཚེ་ལུས་དང་གྲིབ་མ་བཞིན། །
རྗེས་སུ་འགྲོ་བ་དཀར་ནག་ལས་འབྲས་ཡིན། །

དེ་ཕྱིར་བག་ཡོད་དྲན་ཤེས་བརྟན་པོ་ཡིས། །
སྡིག་ལྟུང་ཕྲ་མོ་ཙམ་ཡང་སྤོང་བ་དང་། །
དད་དང་ཤེས་རབ་བརྩོན་འགྲུས་ཤུགས་དྲག་གིས། །
སྒོ་གསུམ་དགེ་བའི་ལས་ལ་བཀོལ་བར་གྱིས། །

ཁྱད་པར་བསྟན་པའི་གཞི་མ་སོ་སོར་ཐར། །
བདེ་གཤེགས་གཞུང་ལམ་བྱང་སེམས་སྡོམ་པ་དང་། །
དངོས་གྲུབ་རྩ་བ་གསང་སྔགས་དམ་ཚིག་གསུམ། །
ཚུལ་བཞིན་བསྲུང་བ་ཆོས་ཀྱི་ཉིང་ཁུ་ཡིན། །

སྡོམ་གསུམ་མིག་འབྲས་ལྟ་བུར་བསྲུང་བ་ལས། །
ལྷག་པའི་ཉམས་ལེན་སྙིང་པོ་གཞན་མེད་པར། །
རྒྱལ་ཀུན་མགྲིན་དབྱངས་གཅིག་གིས་གསུངས་པས་ན། །
བསྟན་པའི་སྙིང་པོ་འདི་ལ་འབད་པར་རིགས། །

རང་གིས་སྒོ་གསུམ་དགེ་བ་གང་བྱས་ཀྱང་། །
དེ་ཉིད་རྣམ་དག་ཆོས་སུ་འགྱུར་བ་ལ། །
འདི་སྣང་ཆོས་བརྒྱད་གདོན་གྱིས་མ་བསླད་པར། །
སྲིད་ལས་ངེས་འབྱུང་བསམ་པས་ཟིན་པ་གཅེས། །

མ་ལུས་འགྲོ་ཀུན་ཕ་མར་མཐོང་བ་ཡིས། །
དེ་ཕྱིར་བྱང་ཆུབ་སྒྲུབ་འདོད་སེམས་བསྐྱེད་དང་། །
དངོས་འཛིན་རྩ་བྲལ་ཤེས་རབ་ཟུང་འབྲེལ་ཏེ། །
ཐེག་མཆོག་ལམ་གྱི་དགའ་སྟོན་མྱོང་བར་བྱ། །

མདོར་ན་བྱང་ཆུབ་ལམ་གྱི་རིམ་པའི་སྒོས། །
ཐུབ་བསྟན་ཡོངས་ལ་བག་ཆགས་ཅི་ཐེབས་ཀྱིས། །
ཉིན་བཞིན་དལ་འབྱོར་དོན་ལྡན་བྱེད་པ་དང་། །
བསྔོ་སྨོན་དགེ་བའི་མཚམས་སྦྱོར་ནན་ཏན་བྱ། །

བློ་དང་བརྩོན་པའི་ནུས་པ་ཅི་ཡོད་ཀྱིས། །
སྔོན་རབས་དམ་པའི་རྗེས་སུ་སློབ་བྱེད་པ། །
དེ་ནི་སྐལ་བཟང་སྐྱེ་བོ་ཞེས་བྱ་སྟེ། །
དལ་འབྱོར་ཐོབ་པ་འབྲས་བུར་བཅས་པ་ཡིན། །

འདིར་འབད་དགེ་བའང་དོན་མེད་འཁོར་བདེའི་རྒྱུར། །
མི་སྨིན་ཁྲོ་སོགས་རྐྱེན་གྱིས་མི་གཞོམ་པར། །
སྲས་བཅས་རྒྱལ་བས་གང་དུ་བསྔོས་པ་ཡི། །
འབྲས་བཟང་མཐའ་དག་འགྲུབ་པའི་རྒྱུར་གྱུར་ཅིག །

ཅེས་པ་འདི་ནི་དད་བརྩོན་བློ་དང་ལྡན་པ་བྲག་ལུང་རི་ཁྲོད་པ་དཀོན་མཆོག་ཆོས་འཕེལ་གྱིས་དགེ་སྦྱོར་ལ་བསྐུལ་བའི་བསླབ་བྱ་མདོར་བསྡུས་ཤིག་དགོས་ཞེས་བསྐུལ་ངོར༧བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

བཀའ་བསྟན་ཚད་མ་ཡོད་བཞིན་དུ།།
དེ་དག་མི་སྦྱོང་ཁུངས་མེད་ལུང་།།
བརྩོན་པ་ཆེན་པོས་ལེན་པ་དེ།།
རྟ་ཡོད་ར་ལ་ཞོན་དང་མཚུངས།།
རྣམ་དག་རང་ལུགས་ཡོད་བཞིན་དུ།།
མི་སྦྱོང་གཞན་ལ་འགྲམ་ཆུ་ལྡང་།།
རྫས་ཀྱིས་མ་ལྷད་བཟའ་བཏུང་དག།
མི་བསྟེན་གད་སྙིགས་ཟ་དང་མཚུངས།།
དགག་དང་སྒྲུབ་པའི་དཔྱད་མཐའ་རུ།།
མཁས་པས་གུས་ཤིང་ལེན་པའི་གཞུང་།།
མཆོད་དང་ལྟ་བར་མི་བྱེད་པ།།
ལྷ་འདྲེ་གཉིས་ཀྱི་སྒྲུང་གཏམ་དག།
གུས་ཤིང་འབད་པས་ལེན་པ་དེ།།
མིག་ཡོད་དོང་དུ་མཆོང་དང་མཚུངས།།
རིགས་པས་གྲུབ་པའི་གཞུང་ལུགས་ཀུན།།
ཐོས་དང་བསམ་པས་མི་རྟུན་པ།།
དད་སྒོམ་རྐྱང་པས་བཟང་རྩི་སྟེ།།
དམངས་ལ་འཇིགས་སྐུལ་སློང་བ་ནི།།
རྟ་ལ་ལྕག་ཚན་གཤེ་དང་མཚུངས།།