མངའ་ཐང་རྒྱས་པའི་ཁྱིམ་པ་དེ།།
སྐྱིད་སྐྱིད་འདྲ་ཡང་སྡུག་པ་ཡིན།།
དཀའ་ཐུབ་བྱེད་པའི་ཆོས་པ་དེ།།
སྡུག་སྡུག་འདྲ་ཡང་སྐྱིད་པ་ཡིན།།
—- རྗེ་བཙུན་གྲགས་པ་རྒྱལ་མཚན་གྱིས།

སྐྱིད་དུས་སྐྱག་སྦྲང་བཞིན་ངང་གིས་འཁོར་ཡང་སྡུག་དུས་བུང་ཚང་གཏོར་བ་བཞིན་གར་སོང་ཆ་མེད་དུ་གྱུར་འགྲོ དཀའ་ཁག་ལ་འཕྲད་པའི་དུས་སུ་ད་གཟོད་རང་ཉིད་ལ་ཤ་ཚ་བའི་མི་དག་རང་འགུལ་གྱིས་བཀར་འོང་།

༄༅།།རེ་འདུན།།
       ཚངས་སྤྱོད་ཀྱིས།
ཞོགས་པའི་སྐྱ་རེངས་མ་ཤར་སྔོན་ལ།
ང་རང་གཉིད་ལས་སད།
རྒྱུ་མཚན། ང་ལ་དུས་ཚོད་མང་བོ་མི་འདུག
སྦྲང་མ་ཟེའུ་འབྲུ་ལ་འཁོར་བ་ནང་བཞིན།།
སེར་མོ་བ་ངས་ཀྱང་སློབ་གཉེར་ལ་བརྩོན་དགོས།

ཉི་མ་གངས་རྒྱབ་ཏུ་མ་ནུབ་སྔོན་ལ།
ངས་ཆུ་འཛིན་གྱི་ཕོ་བྲང་ལ་འོད་མདངས་ཀྱི་ཉི་མ་ཞིག་བཟོ་དགོས།
རྒྱུ་མཚན།ཉི་མ་ཤར་བའི་དུས་ཚོད་འདས་ལ་ཉེ་བའི།
ངས་མྱུར་མོ་ངང་རང་སྟོབས་ཀྱི་ཉི་མ་ཞིག་འཚོལ་འདོད།

ས་སྲོད་ཀྱི་དུས་མ་ཐོན་སྔོན་ལ།
ངས་གང་སར་བཙལ་ནས་གློ་སྒྲོན་ཞིག་འཚོལ་འདོད།
དེ་མིན་མུན་པའི་ས་ཆེན་འདི་ཡོངས་སུ་བཀབ་འགྲོ།
གལ་སྲིད་ངའི་འོད་ཐིག་འཚོལ་བའི་རེ་བ་ཧ་ཅང་ཕྲ་ནའང་།
ཁྱོད་ཀྱིས་བདག་ལ་ལམ་ཁྲིད་བྱོས་དང་སེམས་དཔའ་ལགས།