རྐང་རྩེད་སྤོ་ལོ་བདེ་ཐང་ཕྱོགས་ལ་ཕན།། 
ལྒང་ལུ་འགྲན་བསྡུར་རྒྱལ་བའི་དབང་བོ་འཐད།། 
བརྙན་འཕྲིན་བལྟས་ན་འཛམ་གླིང་ཁ་ཕྱོགས་ཤེས།། 
གློག་རྡུལ་རྩེད་ཆས་བརྒྱབ་ཀྱང་མཚར་དོན་ཅི།།      

གྱང་རྩར་ཉི་མར་ལྡེ་བའི་གྲོང་རྒན་ཚོ།། 
བན་ཆུང་བསྟན་བཤིག་ཟེར་ནས་སྡིགས་པར་མཁས།།
རང་རང་ཁྱིམ་དུ་གཅེས་ཕྲུག་ཅི་ཙམ་སྨྱོ།། 
ཐམས་ཅད་བྱིས་པ་ཡིན་པས་ཁག་ཅི་ཡོད།།     

དགོན་པའི་གླིང་མཐའ་སྐོར་བའི་ཨ་ཅེ་ཚོས།། 
ཁ་བཏོན་མི་འདོན་ཚོགས་ཀྱི་སྒྲིག་ལམ་གླེང་།། 
གྲྭ་ཤག་གང་གི་ཨ་ཁུ་སུ་ཞིག་ལ།།
གནད་དོན་ཡོད་ཚུལ་གསར་འགྱུར་ཚུལ་དུ་སྒྲོག།   

འགའ་ཞིག་རང་གི་ཕོ་བ་རྒྱགས་པའི་དུས།།
བཙུན་པའི་གྲོང་ཆོག་ཟེར་ནས་དམའ་འབེབས་བྱེད།།
ཁྱེད་ཅག་འབུལ་བ་བླ་མ་ཁོ་ནར་གཏོད།།
གྲྭ་རྐྱང་འཚོ་བ་རང་གིས་གཉེར་ལས་ཅི།། 

ལྷ་བཅས་འགྲོ་བའི་གཙུག་ཏུ་བཀུར་འོས་ཤིང་།།
ཤེས་བྱའི་ལེགས་ཚོགས་བསྡུད་པའི་མ་ཎི་ཀ།
ཐུགས་མཆོག་ཉི་མའི་ཟེར་ལས་འཕགས་ཡུལ་གྱིས།།
ཡབ་མེས་དམ་པ་དག་ཀྱང་དྲན་ནས་འོང་།།

མདོ་སྔགས་བསྟན་འཛིན[月亮]

࿑ དམག་རུམ་སྟུག་པའི་གྲོག་རོང་ལམ་འདི།།

རང་ཉིད་དགའ་བའི་ཁ་ཕྱོགས་ཤིག་ཡིན།།

རླུང་གིས་ཁྱེར་བའི་ཤོག་རྟའི་དངོས་ལ།།

རེ་བའི་ལམ་ཞིག་ཆར་ཆུས་ཕབས་ཡོད།། རླུང་བུའི་རྒྱུ་ལམ་ཀྱ་ཀྱོགས་མེད་ན།།

ལྷ་ལ་ཞུས་པའི་རེ་བ་འགྲུབ་འོང་།།