དྲན་པ་གཏམ་ལ་སྦྲན།
༦—༢༠

རླུང་བུ་དལ་གྱིས་ལྡང་བའི་རི་སྒང་ན།།
མིག་ཟུང་སྤྲིན་མཐར་གཏད་པའི་རི་གྲོང་དུ།།
ཞེན་ཆགས་རྒུ་ཚིགས་དཀྲིས་པའི་ཕ་ཡུལ་ཡང་།།
དྲན་པའི་མེ་ལོང་ངོས་སུ་ལམ་ལམ་གཡོས།།

རྟ་ནོར་རི་ལུང་བཀྲམ་པའི་འབྲོག་སྡེ་ན།།
རྫིང་དྲི་ལུས་ལ་བགོས་པའི་འབྲོག་མོ་ཚོས།།
བཞོ་དབྱངས་ངག་ལ་འཐེན་པའི་སྙན་འགྱུར་ཡང་།།
དྲན་པའི་འཆར་སྣང་ཞིག་གི་སྣེ་མོར་གྱུར།།

མཐིང་སྨུག་སྦྲ་ནག་ཕུབ་པའི་གཞིས་ཁྱིམ་དུ།།
མ་བཅོས་བརྩེ་བས་ཁེངས་བའི་ཕ་མ་གཉིས།།
རི་ཟོམ་ལྗོན་པ་འདི་ཡི་གྲིབ་འོག་ནས།།
དྲན་གདུང་རྟ་རྒོད་གཅིག་གིས་འཕག་ཚག་རྒྱུག།

འདས་དོན་རྡོ་རིང་བསླངས་བའི་གཏམ་རྒྱུད་དག།
ད་ལྟ་ཕལ་ཆེར་གནའ་གཏམ་ཞིག་ཏུ་གྱུར།།
སུམ་གཉིས་ས་ཡི་ལྟེ་བ་དབང་ཞེས་སྐད།།
དེ་བས་ད་ལྟ་བསམ་ན་འགྱོད་པས་མནར།།

སྐྱོ་བས་ཡིད་ཁམས་ཟོས་པའི་ལོ་ཟླའི་ཕྲེང་།།
རེ་སྒུག་ཉི་མ་བལྡེབ་པའི་དུས་ཚོད་ནང་།།
སུན་སྣང་ཨང་ཕྲག་ན་བའི་མནར་གཅོད་དག
བརྗོད་ན་ཚར་རྒྱུ་མེད་པའི་རྣམ་ཐར་ཞིག།

ཆབ࿐ཆོས་དབྱིངས།

དབྱར་ཁ་མི་སྡོད་སྡོང་ལོ་རླུང་གིས་ཟད།།
ཆུ་མོ་མི་སྡོད་ཅ་ཅོ་རྣ་ལ་གཟན།།
དུས་བཞིའི་འགྱུར་བ་ལས་ཀྱང་མགྱོགས་པ་ཡི།།
མི་ཡི་སེམས་པ་མཐའ་ནས་མཐའ་རུ་ཡལ།།
འགའ་ཞིག་དྲན་པའི་ཀློང་ནས་བོར་ཡང་སྲིད།།
གང་ཞིག་ཚོར་བའི་གསེང་ནས་ཡལ་ཡང་ཐང་།།
ལོ་ཡིས་མི་རྒས་ཟླ་བས་མ་ཟད་པའི།།
ང་ལ་ལྷག་པ་ཅི་དང་ཅི་ཞིག་ཡོད།།
#སྦྲ་སྐལ་རྡོར།#

མི་ཁ་ཤས་ལ་མཁས་པོ་ཡོད་ཀྱང་མཛེས་པོ་མེད། མཛེས་པོ་ཡོད་ཀྱང་མཁས་པོ་མེད། མཁས་ཤིང་མཛེས་ཀྱང་སྐད་ལ་ཡག་པོ་མེད་པ་མང་། རེད་དེ་དམ་པ་འདི་མཁས་ཤིང་མཛེས་ལ་སྐད་ཀྱང་ཐོས་ན་དགའ་བ་ཞིག་རེད།
བསོད་ནམས་ཆེན་པོ་ཅན་གྱི་སྐྱེས་བུ་ལ་སྐུ་མཛེས་པོ་དང་གསུང་སྙན་པོ་དང་ཐུགས་མཁས་པོ་ཞིག་ཡོད་པ་ནི་སྟོན་པ་སངས་རྒྱས་བཞིན།

མི་ཁ་ཤས་ལ་ཤེས་ཡོན་ལྡན་རུང་གོ་ཐོབ་མེད། གོ་ཐོབ་ཡོད་ཀྱང་ཤེས་ཡོན་མེད། གོ་ཐོབ་དང་ཤེས་ཡོན་གཉིས་ཀ་འཛོམ་དུས་ལོ་ན་མཐོ་བའི་དཀའ་ཁག་དང་འཕྲད། རེད་དེ་དམ་པ་འདིར་ཤེས་ཡོན་དང་གོ་ཐོབ་ཡོད་པ་མ་ཟད་ལོ་ན་གཞོན། འཇིག་རྟེན་ན་ཁོང་བཞུགས་པ་དགའ་བ་ལ།

མི་ཁ་ཤས་ཀྱིས་གཞུང་ལུགས་ཡག་པོ་ཤེས་རུང་སྐད་རིགས་མང་པོ་མི་ཤེས། སྐད་རིགས་མང་པོ་ཤེས་ཀྱང་གཞུང་ལུགས་ཡག་པོ་མི་ཤེས། རེད་དེ་དམ་པ་འདིས་གཞུང་ལུགས་ཡག་པོ་ཤེས་པ་མ་ཟད་སྐད་རིགས་ཀྱང་མང་པོ་ཤེས། དོན་དམ་པར་བོད་ཀྱི་ལོ་རྒྱུས་ཀྱི་སྟེང་དུ་ཁོང་ལྟ་བུ་ཧ་ལམ་བྱོན་མ་མྱོང་།

མི་ལ་ཤས་ཀྱིས་ཐུན་མོང་རིག་གནས་ཤེས་ཀྱང་ནང་བསྟན་ཡག་པོ་མི་ཤེས། ནང་བསྟན་ཡག་པོ་ཤེས་ཀྱང་ཐུན་མོང་རིག་གནས་མི་ཤེས། རེད་དེ་དམ་པ་འདིས་ནང་བསྟན་ཡག་པོ་ཤེས་པ་མ་ཟད་སྒྲ། སྙན་ངག ལོ་རྒྱུས། བྲིས། རིས་སོགས་ཐུན་མོང་རིག་གནས་མང་པོ་ཤེས། འདི་ལྟ་བུ་ཕུན་སུམ་ཚོགས་པ་ཧ་ཅང་དཀོན།

མི་ལ་ཤས་ཀྱིས་རྩོམ་སྙན་པོ་བྲིས་ཀྱང་འཆད་སྒྲོས་ཡག་པོ་མེད། འཆད་སྒྲོས་ཡག་པོ་ཡོད་ཀྱང་རྩོམ་སྙན་མོ་འབྲི་མི་ཤེས། རེད་དེ་དམ་པ་འདིའི་འཆད་སྒྲོས་ལེགས་པ་མ་ཟད་རྩོམ་པ་ལ་འགྲན་ཟླ་མེད། ནོར་བུ་རིན་པོ་ཆེའི་ཡོན་ཏན་ལེགས་པར་གཏམས་པ་རེ་རེ་ཙམ་ཡིན།

མི་ལ་ཤས་ལ་མཁས་པོ་ཡོད་ཀྱང་། ཐུགས་དྲང་པོ་སོགས་ཀྱི་ཡོན་ཏན་མེད། ཐུགས་དྲང་པོ་སོགས་ཀྱི་ཡོན་ཏན་ཡོད་ཀྱང་མཁས་རྒྱ་མེད། རེད་དེ་དམ་པ་འདི་ཤེས་བྱ་ཡོན་ཏན་ལ་མཁས་པ་མ་ཟད་ཐུགས་དྲང་པོ། གཟུ་བོ། སྤོབས་སེམས། ཆོད་སེམས། ལར་ཞེན། གུ་ཡངས། ཕུང་རྒྱང་རིང་པོ། དད་པ། སྙིང་རྗེ། སྤྱི་སེམས་སོགས་སྐྱེ་བུ་དམ་པ་ལ་ཚང་དགོས་པའི་སེམས་དང་སེམས་བྱུང་ཆ་ཚང་ལྡན། རླབས་ཆེན་གྱི་སྣེ་ཁྲིད་པ་ཞིག་ལ་འགྱུར་བར་སྨོན།

ཆ་རྐྱེན་དེ་དག་དང་ལྡན་པས། ཁོང་ལ་འཇོན་ནུས་ཡོད། ཁོང་ནི་རེ་བ་ཡིན། ཁོང་ནི་ཡིད་ཆེས་ཡིན། ཁོང་ནི་བླ་སྲོག་ཡིན། ཁོང་ནི་བློ་མིག་ཡིན། ཁོང་ནི་བླ་མ་ཡིན། ཁོང་ནི་དེད་དཔོན་ཡིན།

དེས་ན། ང་ཁོང་ལ་དགའ་ཞིང་གུས། ཁོང་གི་གསུང་ལ་དགའ་ཞིང་གུས། ཁོང་གི་ཐུགས་ལ་དགའ་ཞིང་གུས། ཉིན་དྲན། མཚན་དྲན། མི་ཞིག་གི་ནང་ནས་ངས་དགའ་གུས་ཆེ་ཤོས་བྱེད་ས་དང་དྲན་མང་ཤོས་ཀྱི་གྲས་སུ་གཏོགས།

ཁྱེད་རང་ཆེན་པོ་ཞིག་གི་སྐྱེ་བ་ཕྱི་མ་མིན་རུང་ཆོག ཁྱེད་མཐོན་པོ་ཞིག་གི་སྐྱེ་བ་སྔ་མ་མིན་རུང་ཆོག

ཁྱེད་རང་ཁྱེད་རང་ཡིན་པ་དེས་མ་ཆོག་པ་གང་ཡང་མེད་ལ། ཁྱེད་རང་ཁྱེད་རང་ཡིན་པ་དེས་མ་འཐུས་པ་གང་ཡང་མེད་དོ། །

ཁོང་གིས་ང་ཚོར་ལེགས་སྐྱེས་ཡང་ཡང་གནང་། ད་དུང་ཡང་གནང་བར་འགྱུར། ངའི་ཉིན་རེ་འཚོ་བའི་ནང་ཁོང་གི་ལེགས་སྐྱེས་དང་ཁ་འབྲལ་ཐབས་མེད།

བཀའ་དྲིན་བླ་མེད་དུ་ཆེ། ངའི་སེམས་ཀྱི་ནོར་བུ།

བན་དེ་འགྲོ་ཕན།