ལྟ་བས་ཆོག་མི་ཤེས་པའི་ཁྱེད་སྐུ་ཡི།།
མཚན་དཔེའི་ལང་ཚོ་དངོས་སུ་མ་མཇལ་ཡང་།།
བདག་ནི་སྐལ་ཆད་ནང་ནས་སྐལ་བཟང་སྟེ།།
ཁྱེད་གསུང་བདུད་རྩི་འཐུང་བས་རེ་ཞིག་འཚེངས།།

མདོ་ལུང་བརྒྱ་ཕྲག་བཅུད་ཀྱིས་རབ་བལྟམས་པའི།།
གཞུང་བཟང་འདོད་འབྱུང་གཏེར་གྱི་བུམ་པ་ཆེ།།
བརྩེ་བའི་ཕྱག་གིས་བསྣམས་པའི་སེམས་དཔའ་དེས།།
བདག་རྒྱུད་རླན་པའི་ཆུ་ཐིགས་འགའ་ཡང་འཐོར།།

བདག་ནི་རྨོངས་པའི་སྨག་ལ་གཞའ་ཆེས་པས།།
བླང་དང་དོར་བའི་རྐང་ལམ་ཆེར་མ་མཐོང་།།
ཁྱེད་ཉིད་མཁྱེན་རབ་རྫོགས་པའི་རྟ་བདུན་དབང་།།
སེམས་ཀྱི་ངོགས་སུ་འཕྲོས་པས་ཕྱོགས་ཙམ་མཐོང་།།

ཁྱེད་སྐུ་གངས་ཀྱི་ལྷུན་པོ་གཡོ་མེད་ཅིང་།།
ཕྲིན་ལས་ཉི་ཟླའི་རྣ་ཆ་ཕྱོགས་ཀུན་ཏུ།།
མཛེས་ཤིང་འཇིག་རྟེན་རྒུད་པའི་མུན་པ་ཆེ།།
རྟག་ཏུ་སེལ་བའི་སྒྲོན་མེ་བྱེད་པར་ཤོག།

སྦྲ• སྐལ་རྡོར།

སྐབས་ཐོག་འདིར་ངས་བདུད་བྷེའི་གླུ་ལ་ཉན་ཞོར།“ཐང་རྒོད་” ཀྱི་པར་རིས་དག་ལ་མཚར་ལྟ་བྱེད་ཀྱིན་ཡོད། བླ་མ་ཐར་གྱིས་ད་གཟོད་ང་ལ་པར་རིས་ཞེས་པ་འདིར་ཡང་མིག་ཉུལ་ཙམ་གྱིས་མི་ཆོག་པར། ནན་ཏན་དང་གཟབ་ནན་གྱིས་ལྟ་དགོས་པའི་གོ་རྟོགས་ཅུང་ཙམ་སྐྱེ་རུ་བཅུག ད་ནངས་ཞོགས་པའི་པར་རིས་འདི་ཉིད་དར་དཀར་ཡུག་གཅིག་གི་ཚབ་ཏུ་ཕུལ་བའོ།།
感谢诗人拉玛太寄来的画册“荒野”[玫瑰]#南杰的镜头# https://t.cn/R2WxDfa

ན་མོ་གུ་རུ།
བྱམས་དང་སྙིང་རྗེ་བཟོད་པའི་ཕུབ་ཆུང་འཁུར།། ཉོན་མོངས་དུག་ལྔ་འཇོམས་ཕྱིར་ཤ་ཁྱི་འཁྲིད།། སྟོང་ཉིད་ཐབས་ཤེས་ཟུང་འབྲེལ་མདའ་གཞུ་ཐོགས།། འབྲུག་སྨྱོན་ཀུན་དགའ་ལེགས་པའི་ཞབས་ལ་འདུད།།