མཚན་སྙན་གཏམ་གྱི་བདུད་རྩི་ཡི་ཚངས་དབྱངས།།
ལྷ་མཆོག་བརྩེ་བའི་ཟློས་གར་གྱི་ཞིང་ཡུལ།།
དད་འདུན་ཛ་ཧུའི་བུ་མོ་ཡི་ངང་ཁྱུ།།
ཅི་འདོད་དཔལ་གྱི་ཆས་བརྒྱད་ཀྱི་ཞིང་ཁམས།།
2023/7/31

རྫུན་ཕུང་གི་ཕྲག་དོག

སྨུག་ཞགས།

ལྟ་བ་རྙིང་པས་འཇིགས་སྐྲག་སྟོན་ས་མེད།།
དུས་རབས་གསར་པས་ཨ་མཚར་རྩེད་ས་མེད།།
འཛམ་གླིང་གོ་ལ་གཅིག་གི་ཡང་རྩེ་ནས།།
དབྱེ་འབྱེད་མཁས་པས་གསལ་བོ་མཐོང་གི་ཡོད།།

མི་མངོན་ལྷ་སྒྲུང་ལུང་བསྟན་གནང་ས་མེད།།
མི་མཐོང་འདྲེ་ཡི་རྫུན་ཕུང་བརྡོལ་ས་མེད།།
ཁྲ་ཁྲ་རིག་རིག་མི་ཡི་འཇིག་རྟེན་ན།།
ལེགས་ཉེས་དཔོན་པོས་ལྟད་མོ་ལྟ་བཞིན་ཡོད།།

ངོ་དགའི་འཁྲབ་སྟོན་མྱི་ཚེ་གང་ལ་བྱས།།
མི་ཆེན་རྐུབ་ལ་རང་གི་སྤྱི་བོ་སྦྱར།།
ཐོབ་བྱ་འདི་རེད་ཅེས་པ་དབེན་པའི་དུས།།
སྡུག་གྱོང་རང་གིས་བཟོས་པར་ཤེས་པར་གྱིས།།

འབྲོག་པའི་ཁྲོད་ནས་རྨོངས་གཏམ་བཤད་ས་མེད།།
གང་བྱུང་གཏམ་གྱིས་མྱི་ཁ་བརྒྱབ་ས་མེད།།
དྲང་པོ་གཤིན་རྗེ་གཅིག་གི་ཁྲིམས་ར་ན།།
ཆོས་ཀྱི་རྗེ་བོ་གཅིག་གིས་མཐོང་གིན་ཡོད།།

བློ་ལ་མ་བབས་ཁྲམ་རྟགས་བརྒྱབ་ཀྱང་རུང་།།
སེམས་པར་མ་འཐད་ཆུ་ལ་གཡུག་ཀྱང་ཆོག།
འགྱོད་བཤགས་ཡིག་སྒམ་གཅིག་གི་གཞི་ཁྱིམ་ན།།
ཁྲིམས་དང་ལུགས་སྲོལ་སྲུང་དགོས་འདྲ་འདྲ་ཡིན།།

གསུང་འབུམ་འདི་དང་འབྲེལ་བའི་རྗེས་དྲན་ཞིག
༧བླ་མ་བསེ་རྡོ་རྗེ་འཆང་གི་གསུང་འབུམ་འདི་2020ལོར་སྟེས་དབང་ཞིག་གིས་ལག་སོན་བྱུང་། ཡིན་ཡང་ལོ་གཅིག་ཙམ་ལ་དཔེ་སྒྲོམ་རུ་བཞག་ནས་སྒུལ་མ་མྱོང་།
༢༠༢༡ལོའི་ཉིན་ཞིག་ང་རང་མལ་ལས་ལངས་རྗེས་ངོ་གདོང་གཙང་མར་བཀྲུས་རྗེས་དགོང་སྔོན་མར་གྲ་སྒྲིག་བྱས་ཡོད་པའི་འབོལ་ཁྲིའི་སྟེང་ཡོད་པའི་རྒྱབ་ལྭ་ལེན་སྐབས་དེའི་ཁེན་སའི་སྟེང་བཞག་ཡོད་པའི་བོད་ཡིག་དཔེ་ཆའི་ཁྲོད་ནས་ཁོང་རྡོ་རྗེ་འཆང་གི་གསུང་འབུམ་ཁྲོད་ཀྱི་དེབ་ཞིག་ངའི་མདུན་དུ་ལྷུང་ནས་ཡོང་། ཡིན་ཡང་ང་རང་ལས་ཚོགས་ལ་རྗེས་སུ་ལུས་འགྲོ་བསམ་ནས་ལྟ་ཁོམ་མ་ཡོང་བས་ཕྱིར་བཞག་ཏེ་ལས་ཚོགས་ལ་སོང་། སྔ་དྲོར་ཆུ་ཚོད་བཅུ་གཅིག་ཡས་མས་སུ་ཁོང་རྡོ་རྗེ་འཆང་སྐུ་མྱ་ངན་ལས་འདས་པའི་ཚུལ་བསྟན་པའི་གསར་འགྱུར་ཤིག་འཕྲིན་སྟེགས་ཤིག་ལས་མཐོང་། ཉིན་དེའི་ཕྱི་དྲོར་ཕྱིར་ཁྱིམ་ལ་ཐོམ་ནས་ད་ནངས་མདུན་དུ་ལྷུང་ཡོང་བའི་དེབ་དེར་བལྟས་པ་ན་དེ་ནི་ཁོང་གི་གསུང་འབུམ་ལས་པོད་གཉིས་པ་སྟེ་ ༼

ཨ་རོལ་བློ་བཟང་ལུང་རྟོགས་བསྟན་པའི་རྒྱལ་མཚན་གྱི་རྣམ་ཐར༽ རེད།
དེབ་འདིར་དངོས་སུ་མཇལ་བའི་སྐབས་ནི་ལོ་དེའི་ལོ་མཇུག་ཡིན། རྒྱུ་མཚན་ལོ་མཇུག་ལ་ཐོན་སྐབས་བྱ་བ་ཅུང་ཉུང་བས་ཡིན། ཐེངས་དང་པོར་ཉིན་བདུན་ལ་བཀླགས་པ་ཡིན། དེབ་འདིར་མཇལ་བཤད་མི་ཤེས་པའི་དྲི་མ་ཞིམ་པོ་ཞིག་རྣ་ལམ་དུ་མཆེད་ཡོང་། ཐེངས་ཤིག་ངའི་ལས་གྲོགས་ཤིག་གིས་མོའི་སྐེ་དཀྲིས་དཔེ་ཆའི་སྟེང་དུ་བཞག་ནས་དྲི་མ་ཡལ་བས་ལྷ་ཤིང་ཤུག་པ་བདུག་ནས་དྲི་མ་སླར་གསོ་བྱས་པ་ད་དུང་ངའི་དྲན་ངོགས་སུ་ཡོད།
དེའི་རྗེས་སུ་དེབ་འདིར་ངས་ཐེངས་གསུམ་ལ་མཇལ་མྱོང་ཞིང་། དཔེ་སྒྲོམ་སྟེང་གི་དཔེ་ཆ་ལེགས་སྒྲིག་བྱེད་དུས་ཁ་ཕྱེ་ན་དྲི་མ་ཞིམ་པོ་དེ་ད་དུང་རྣ་ལམ་ལ་མཆེད་ཡོང་། དྲི་མ་དེས་ད་དུང་མཇལ་འདོད་ཀྱི་སེམས་པ་ཡང་ཡང་སྐྱེས་སུ་འཇུག[合十][合十][合十][合十]