སྤྲིན་པ་གྱོན་པའི་ཟླ་བ་ཡིད་ཀྱིས་མྱངས། །
ཚེ་ཕྱེད་འདས་ཀྱང་སེམས་པ་སྟོང་ཤུར་ཤུར། །
ག་ལེར་ལྗོན་པའི་གསེང་ལ་གཅིག་བུར་ཉུལ། །
གྲིབ་མ་མཐོང་བས་སྙིང་གཏམ་བཤད་ན་སྙམ། །

དབྱར་ཟླ་དྲུག་པའི་སྤང་ལྗོངས་ངོགས་སུ།།
འཛུམ་ཆུང་མེ་ཏོག་འཇའ་བཞིན་ཡལ་ན།།
གང་ལ་སོང་ཡང་གང་ནས་བསྡད་ཀྱང་།།
ཅི་ཞིག་བོར་སོང་ལྟ་བུའི་ཚོར་བས།།
སྐྱིད་པོའི་སྐབས་ཤིག་ནམ་ཡང་མ་བྱུང་།།

སྐྱོ་སྣང་གི་ར་རོར་གྱུར་བའི་ཕྱི་དྲོ་ཞིག་ལ།
རྩྭ་ཐང་གི་ཉི་ནུབ་ནི་ཧ་ཅང་ལྷིང་འཇགས་ཞིག
ཁ་བའི་འདབ་མ་ལས་སེམས་པ་སྙི་བའི་རང་ཉིད་ནི།
སྨྲ་བ་མེད་པའི་ས་སྲོད་རེ་རེའི་ཤུལ་དུ་ལུས།

ཁྱེད་རང་ཉི་ནུབ་བཞིན་རྒྱང་དུ་གྱེས་རུང་།
རང་དབང་གི་ཉི་མ་ཞིག་ལ།
རེ་སྨོན་གྱི་ལག་བརྡ་གནང་ཚུལ་ཡང་།
ཅི་འདྲའི་ཡིད་དུ་འོང་བ་ཞིག

ད་ལྟ་ཕ་ཡུལ་དུ་དབྱར་ཁ་ཚེས་པས།
རྩྭ་ལྗང་གི་མཛེས་པ་དག་ནི།
ཨ་མའི་ཞལ་རས་ལྟར་ཡིད་ལ་འཁོར་རུང་།
གྱིས་བྲལ་ནི་བཟློག་ཏུ་མེད་པ་ཞིག
དེ་བཞིན་སེམས་ཁམས་སྨྲེང་བའི་གཏམ་རྒྱུད་ཀྱང་རྫོགས་མཐའ་མེད་པ་ཞིག་གོ །

མ་ལི་ཀ[月亮]