སྟོན་པ་བླ་་མའི་སངས་རྒྱས་རིན་པོ་ཆེ།
སྤྱོད་པ་བླ་མའི་དམ་ཞོས་རིན་པོ་ཆེ།
འདྲེན་པ་བླ་མའི་དགེ་འདུན་རིན་པོ་ཆེ།
སྐྱབས་ནས་དཀོན་མཆོག་གསུམ་ལ་མཆོད་པ་འབུལ།

ཉམས་ལེན་མཐར་ཐུག་དམ་པའི་ཆོས་དྲུག་ནི། །
རྒྱབ་བརྟེན་ལུང་སྤྱོད་གཏན་ཚིགས་གཏན་ལ་ཕབ། །
མན་ངག་གནད་བསྣུན་ས་ལམ་རིམ་པ་རྫོགས། །
མཐོ་དམན་ཀུན་འདྲེན་མཐའ་འཛིན་བྲལ་བའོ། །

__མན་ངག་རིན་པོ་ཆེའི་མཛོད་ལས།

གཏམ་དཔེ་ཞིག་ཏུ། དཀའ་བའི་དུས་སུ་གྲོགས་ཀྱིས་མ་ཕན་ན། །
ཁམས་གསུམ་གྲོགས་པོ་གྱུར་ཀྱང་དོན་དགོས་ཆུང་། ། ཟེར་བ་ལྟར།
དཀའ་བའི་དུས་སུ་མི་དེས་ཁྱེད་རང་ལ་ཕན་མི་འདོག་ན་གང་དེས་ཁྱོད་ལ་གྲོགས་པོ་ཞེས་ཁ་འཇམ་ཚིག་སྙན་ཇི་ལྟར་བཤད་ཀྱང་དོན་གྱིས་གྲོགས་པོ་མིན་པ་རེད། ཡང་ལེགས་བཤད་ཅིག་ཏུ། འདི་ལྟར་གསུངས་ཡོད་དེ”ཁྱོད་ལ་ཁོ་ཚོ་མཁོ་བའི་སྐབས་སུ། ཁྱོད་སྣང་མེད་དུ་གཏོང་མཁན་གྱི་མི་དང་། ཁྱོད་ཀྱིས་རེ་སྐུལ་མ་ཞུས་ཀྱང་ཁྱོད་ལ་རོགས་བྱེད་མཁན་གྱི་མི་གཉིས་ནི་གཏན་ནས་བརྗེད་མི་རུང་།”ཞེས་པ་ལྟར། ང་ཚོ་དཀའ་ངལ་ལ་འཕྲད་དུས་ཕར་རེ་བ་མ་བརྒྱབ་གོང་ནས་ཕྱིར་རོགས་སྐྱོར་བྱེད་མཁན་ཚོ་ནི་ཁྱེད་ཀྱི་གཉེན་ཉེ་དང་གྲོགས་པོ་ངོ་མ་ཡིན་ལ། གཞན་དུ་ཁྱོད་དཀའ་ངལ་ལ་འཕྲད་དུས་ཁ་གཡར་ས་ཙག་ཙིག་རེ་བཙལ་ཏེ་ཁྱོད་ལ་བྱོལ་འགྲོ་བ་ནི་གྲོགས་པོ་མིན་ལ་གཉེན་ཉེ་ཡང་ག་ལ་ཡིན།

འཇིག་རྟེན་ཁ་དཔེ་རུ། དགྲ་གཅིག་ཡོད་ན་མང་སྟངས་དང་། ། གྲོགས་བརྒྱ་ཡོད་ཀྱང་ཉུང་སྟངས་ཡིན་ཟེར་བ་ལྟར་ལེགས་ཀྱང་། སྐབས་རེ་ཡོད་ནི་འདྲ་བ་དང་། ལན་རེ་མེད་ནི་འདྲ་བའི་གྲོགས་པོ་དང་གཉེན་ཚན་ནི་བརྒྱ་སྟོང་ཡོད་ཀྱང་མེད་པ་དང་གཅིག་པ་རེད།