མདུན་རྒྱབ། རེ་དོགས་བྲལ་བ་བྱིས་དུས་ཀྱི་ནམ་

首页发布

མདུན་རྒྱབ།

རེ་དོགས་བྲལ་བ་བྱིས་དུས་ཀྱི་ནམ་ཟླ།
སྨུག་སྤྲིན་ཀློང་དུ་རྒྱབ་རི་ཡི་ཚོད་རེད།
མདུན་ཕྱོགས་ལྡང་བ་ལས་དབང་གི་རླུང་བུས།
དྲན་པའི་རྒྱབ་རི་གཡས་སྐོར་དང་གཡོན་སྐོར།

ལྷ་ཀླུས་བདག་གིར་བཟུང་བ་ཡི་རྒྱབ་རི།
ཉམ་ཆུང་བྱིས་དུས་རྨི་ལམ་གྱི་མེ་ཏོག
དྲི་བཟང་ལྷ་བསང་མཆོད་འབུལ་གྱི་ཁྲོད་ནས།
མདུན་དུ་མི་མངོན་གཟུགས་མེད་ཀྱི་ཟླ་རེད།

བརྩེ་བའི་མཚོ་མོ་རང་འཁྱིལ་དུ་ཆགས་ཀྱང་།
དུང་བའི་ཉ་མོ་གནས་མེད་དུ་འཁྱམ་ལྟར།
དྲན་པའི་རྒྱབ་རི་སྲ་བརྟན་དུ་གནས་ཀྱང་།
བཞད་པའི་མེ་ཏོག་ནམ་དུས་ནི་ཡོལ་ཟིན།

དུས་ཀྱི་བདག་མོའི་གོམ་སྟབས་རང་མྱུར་བས།
དྲན་པའི་རི་མོ་ནག་ནོག་ཏུ་གྱུར་སོང་།
མདུན་གྱི་ལམ་བུ་ཀྱག་ཀྱོག་དང་ལྡན་པས།
ཡིད་ཀྱི་བུ་ཆུང་འོ་རྒྱལ་ནི་ཆེ་སོང་།

རེ་དོགས་མེད་པའི་བྱིས་དུས་རེ་བསམ་ཚེ།
མི་ཡུལ་ཞེས་པར་བདེ་སྐྱིད་ནི་ཡོད་འདྲ།
རྟོག་འཆར་མང་བའི་ད་ཆ་འདི་མངོན་དུས།
གནས་ལུགས་ཞེས་པར་བདེན་ཁ་རང་མི་འདུག

རྩ་ཐང་དང་མཚམས་སྤྲིན་གྱི་བར་ན་རྩི་ཤིང་གི་མགོ་ལྕོག་ལྡེན་ལྡེན་གཡོ་བཞིན།རླུང་སྒྲ་དང་འུང་ཟིང་ཇི་ལྟར་རྒོད་ཡང་།ངས་མིག་རྒྱང་རིང་རིང་ཤུལ་ནས་གུ་ཡངས་དང་བག་ཕེགས་ཀྱི་གནས་མར་འཚོ་ཐབས་བྱེད།[可乐]

དྲུག་གཅིག་བྱིས་པའི་དུས་ཆེན་འཛུམ་གྱིས་བསུ།

ཤེས་བྱའི་ཚང་ཚིང་བཞད་པའི་སྐྱེད་ཚལ་ན།།
གནའ་དེངས་མེ་ཏོག་ཟེའུ་འབྲུའི་བཅུད་ཀྱིས་ངལ།།
རྣམ་རིག་གཤོག་གླུ་འགུགས་པའི་བྷྲ་མ་རའི།།
ཤེས་རིག་སྦྲང་རྩིས་བཅུད་ལ་ཅི་དགར་རོལ།།

ན་ཆུང་བྱིས་བློ་དངུལ་དཀར་མེ་ལོང་ངོར།།
ཕྱི་རོལ་ཡུལ་གྱི་སྣང་བའི་རི་མོ་དེ།།
མ་འདྲེས་གསལ་བར་ཇི་བཞིན་འཆར་བ་ལ།།
རྟོག་ངན་བློ་ཡི་བཅོས་བསླད་དེ་ལ་མེད།།

བྱིས་བློ་དྭངས་གཙང་རྫ་ཆབ་སིལ་མ་ལ།།
ལྷུང་ལྷུང་སྙན་དགུའི་གླུ་དབྱངས་འགུགས་པ་ལས།།
རྟོག་འགྱུ་འབག་ལྷད་འདམ་གྱིས་གོས་པ་མེད།།
བྱམས་བརྩེའི་གཞུར་རྒྱུན་རིང་མོ་ཡིད་གར་འོང་།།

བྱིས་བློ་རབ་ཡངས་ལྷ་ཡི་རྫིང་རིང་ངོགས།།
བཅོས་མིན་མཛའ་བརྩེ་ཆུ་འཛིན་དཀར་པོ་ལས།།
འཛུམ་མདངས་སྦྲང་ཆར་སིལ་མ་འཐོར་བ་ཡིས།།
ལྷད་མེད་བརླན་གྱིས་ཀུན་ཀྱང་དགའ་བར་བྱེད།།

འཛམ་གླིང་ཞི་བདེ་ལོ་ལེགས་སྙེ་མའི་ཕོན།།
བདེ་སྐྱིད་འབྲུ་དྲུག་འབྲས་ཁུར་དུད་པ་ལ།།
སྐྱིན་ཐང་སློབ་གསོ་ངན་པས་མི་འཇིག་པར།།
ལྷད་མེད་ལྕུག་ཕྲན་གསར་པས་མཛེས་གྱུར་ཅིག །

༢༠༢༣

༦

༡

དགོང་མོར།