明报OL：梁家辉永不言休 最高纪录1年拍13部戏 获封“千面影帝”

由马时亨主持的访谈式节目《马时亨 香港情》，昨（13日）晚播出第四集，主题是“电影”，马时亨邀来偶像梁家辉担任嘉宾。

屹立影坛40年的梁家辉，原来拍了140多部电影，他透露当年最疯狂的日子，是一日3组戏、一年接拍13部电影：“嗰时咩都想试下，造就咗我有3年时间不断係咁拍戏，1年拍13部，基本上係冇瞓过。因为每一日要走3组，每组8个钟、组接组，主要喺组过组嘅时间休息；但香港地方细，过组最多半个钟头车。”梁家辉表示当年卖命，有部分是为家人：“因为当年两个女出咗世，对于一个打工仔係好大开支，所以要不断接戏，嚟维持当时家庭。”

谈到拍摄需时最长的电影，梁家辉笑言是《东邪西毒》，并亲解该片与喜剧电影《东成西就》千丝万缕的关联：“《东邪》本身係两集，但因为拍咗3年赶唔切交片，就衍生咗《东成西就》，因为嗰时所有东南亚院商，都买咗部戏准备做贺岁片，唯有焗拍《东成》出嚟应付片商。

当时所有华人影迷都好奇怪，点解香港可以出动咁多大明星，走去拍一部咁神怪咁荒诞嘅戏嚟代替《东邪》？可能我哋喺唔知应该点样嘅绝境入面，被压榨咗3年，所以就掏心挖肺咁将入面最疯狂嘅一面展现喺观众面前，变成后来嘅经典，我觉得呢两部戏，算係我电影生涯好难遇到嘅两部电影。”

梁家辉指拍戏令他著迷之处，是可以透过角色，经历各种人生，他表明“永不言休”：“梁家辉只可以有一个人生，但通过做演员，我经历咗140几个唔同嘅人生，我唔会退休，我希望能够有机会继续追求唔同人生，如果可能嘅话，一日仲有人愿意睇我，我都会继续做戏。”

在家辉的140多个人生之中，不得不提他个人的3个代表作，分别是《垂帘听政》、《监狱风云》及《情人》，而《垂帘听政》令他在26岁夺金像奖影帝殊荣。

谈到当年封帝，梁家辉谦称全是导演李翰祥功劳，并笑指当年新入行的自己，完全跟指示做戏：“作为一个新人，点会知咩叫做戏啫！有样嘢好经典，场戏讲我喺大戏台肚痛，唔舒服要走，我问导演应该点做，佢就话：‘Tony，我家坐呢度，我叫你做咩就做咩啦’，当年唔係现场收音，咁一action我就行，佢就：‘低头、回头、看我，再低头’，真係咁样拍咗部戏出嚟。”梁家辉又指当年因自己的超烂普通话，令当时的刘晓庆“反晒面”，2人因“言语”问题多番NG，最后要靠导演解决难题，十分有趣。

至于为何能挥低全球众多强劲对手、争取《情人》男主角席位，梁家辉爆笑透露全因自己够Weak，他说：“《情人》个导演係法国人，当时佢走匀全世界搵《情人》入面嘅越南华侨角色，佢喺外国搵极搵唔到，佢嚟到香港，见面第一句就同我讲‘Oh！you can be my boy’，我问点解，佢就话‘You are as weak as I wish！’同埋因为我背脊线条亮丽，又冇乜毛好光滑，当时喺法国都係用‘光滑无瑕嘅优美线条’做宣传。”

经典电影《监狱风云》最让家辉难忘的，是当时所有临时演员都坐过监：“所以我喺现场学到好多嘢，佢哋会话：‘老衬（第一次入监狱叫老衬）！你入到嚟唔好咁戙起隻脚呀，去到洗手间唔好执番枧呀’，佢哋係会教晓你监狱嘅规矩，人同人相处係点，监狱同出面世界有乜唔同。”

菊梓喬（Hana）即將迎來第三個個人演唱會，自言為了一改「沉悶」的形象，決定來個大蛻變。無論歌曲編排及造型方面都來個大反轉，給大家新衝擊之餘，希望大家能重新認識真實的自己。回顧出道的7年，Hana得到大量工作機會，更成為「劇集歌王后」，但原來同好多打工仔一樣，Hana都曾經陷入低潮，靠著「食得鹹魚抵得渴」這句話捱下去。

採訪、攢文：關穎賢
攝影：葉志明

積極準備第三個演唱會的Hana透露今次會作出極大反差的改變，造型及表演上都會令大家有耳目一新的感覺，擁有極多慘情歌的她更自嘲：「首首都咁慘，所以想用一啲表演嘅模式去令慘歌唔一定要唔開心，有好多歌會重編過。」至於如何為觀眾帶來新衝擊，Hana預告服裝方面會有機關，亦會作大膽的性感演出。

提到距離對上一次演唱會已有4年多，Hana直言唔想悶親人，所以想透過歌曲來呈現最真實的自己：「我其實好想大家重新認識我，睇過2019年演唱會嘅朋友都會覺得我淨係企喺度唱唔郁，但我今次唔會再畀大家呢種感覺。」

Hana初出道時得到大量工作機會，更成為「劇集歌王后」，對此Hana坦言排山倒海的工作確實是令自己有點吃不消，甚至陷入迷失之中：「都唔記得做過咩，唱緊咩歌，有少少太密，我未好好享受到每一首歌，呢個係唯一我覺得遺憾。」當然有工作好過冇嘢做，所以Hana就趁疫情期間好好休息，重新思考自己對工作上的目標。

問到會看7年前的自己，現時心態上有什麼改變？Hana指自己一向都喜歡跟著計劃走，但無奈計劃趕不上變化：「新人嘅時候乜都做，你叫做咩都做做做，你叫我講咩我都講。依家係已經唔會再有咁多限制，可以做返多啲自己。（會覺得冇咗自己？）靜止嘅時候先聽返好多大家對我嘅印象，有好有唔好，有好多人都話我好Cool，我唔係囉，只係有時候係形象。我喺音樂上好難帶到我自己畀大家睇。所以嚟緊做新嘅歌或者任何工作，好想大家重新認識我，可能好多人都未認識我添，我覺得咁樣仲好！」

Hana的音樂路看似平坦，但原來都曾遇上過低潮或者自我掙扎的時候，只能靠洗碗做家務來發洩：「我唔講咋嘛，覺得呢啲無需要講，講係冇用，你又唔可以怪人，又唔可以怪自己。（係工作上嘅嘢？）有時工作裡面有啲嘢真係唔想做，但係一句食得鹹魚抵得渴，就完咗喇。咁可以點？但又係真，每個行業都係咁，一係就唔好做。 每份工都係咁，咁咪繼續做，做到有一日到大家認可你嘅時候，就會有一定嘅話事權，就可以做一啲自己想做嘅嘢。」

問到如果擁有話事權，最想做咩？Hana直言：「所有嘢都可以畀意見，一件衫、髮型、一個妝，唔使做咗出嚟人哋鬧、人哋話都係自己做出嚟，而唔係人哋逼你做，有時做咗出嚟比人鬧，會覺得好無辜。如果係自己做嘅，我就會知道點樣去改進，但有啲嘢我改唔到， 控制唔到，我就會變得好無奈。」

工作方面Hana希望能重新出發，感情方面大家都很好奇Hana與吳卓羲撲朔迷離的關係。Hana搞笑指自己入行以來都甚少緋聞才會令外界那麼關注，但其實自己屬於絕緣體，認為對於愛情只能抱隨緣的態度。提到男方曾於內地綜藝節目上多次自稱單身，Hana即搞笑說：「恭喜佢！」

至於擇偶條件，Hana只想簡簡單單：「愛情又好友情又好，其實真實就已經好好，唔係一啲需要耍手段、機心，或者謊言嘅人，無論係咪圈中人都好，對我真就好。」更盼望自己能想林志玲一樣終有日能覓得遲來的愛情。

劉丹、單立文、滕麗名及呂慧儀等接近40位TVB處境劇《愛 回家之開心速遞》的演員今日（14日）在商場舉行母親節活動，不但在台上玩遊戲，又親自向在場的觀眾派花慶祝母親節。丹爺在台上特意提醒在場的大家愛要及時，希望人人都要向自己媽媽講出自己的愛：「如果唔係你將來一定會後悔，所以趁而家有機會一定要親口對佢講，等佢知道你嘅心意。」

年屆79的丹爺接受《香港01》訪問時透露，自己之所以如此感觸，是因為自己從來沒親口向媽媽表達愛意而感到很後悔：「我媽媽已經唔喺度喇，我每次回想起，都總係覺得自己之前對佢唔夠好，其實係可以再好啲㗎。雖然我喺行動方面做得好好，但從來都未親口講一句呢啲說話，而家後悔都無用啦，遲啦已經。」

他表示最希望能夠與天上的媽媽講一句「我愛你」，更講到一度哽咽：「我哋嗰一輩嘅人，特別係山東人，比較大男人一啲，覺得呢啲說話比較肉麻，『媽媽我愛你』呢啲說話呢，係唔敢講出口，係囉，後悔都補償唔到。」

丹爺笑言由於太太的生日就在母親節前兩天，所以之前已一併慶祝：「我好犀利啊，錫咗一啖啊，哈哈！禮物呢，我就每個月都送嘅，因為我每個月出咗糧都會畀晒佢，講出嚟你都唔信！咁多年都係咁，所以我而家有幾多錢，我真係唔知，總之冇錢使啦，就『喂，攞嚟！』，哈哈！其實老夫老妻，咁都係一個樂趣嚟嘅。」

提到孫女「小糯米」丹爺即笑容滿面，表示她精靈過自己後生時很多，經常將愛掛在嘴邊，亦透露經常「一家人一齊食飯」。至於被問到孫女有沒有很想念媽媽楊冪，會否間中視像通話，丹爺則無奈表示：「關於我屋企嘅事呢，我就唔想喺度講喇。」