ལོ་མགོ་ཚུན་ནས། ཡར་མར་གྱི་བྲེལ་འཚུབ་དང་གཡེང་བ་སོགས་ཀྱིས་རྐྱེན་བྱས་ནས། སེམས་ལྷོད་མོའི་སྒོ་ནས་གློག་བརྙན་ཡག་པོ་ཞིག་ལ་བལྟ་ཁོམ་བྱུང་མ་སོང་། ཁ་སང་ཕྱི་དྲོ་ཞིག་ལ་ཁོམ་སྐབས་ཀྱི་གླགས་ནས《མཛེས་པའི་ཨ་མ》ཞེས་པའི་གློག་བརྙན་ཞིག་ལ་བལྟས་པ་ཡིན།

ཕ་མ་ཞེས་པའི་མིང་བྱང་དེ་ཕྲག་ཏུ་བཟུང་ཉིན་ནས། འཚོ་བ་རོལ་སྟངས་དང་བསམ་པའི་འཛིན་སྟངས་སོགས་ལ་འགྱུར་བ་འདྲ་མིན་སྣ་ཚོགས་ཡོང་ས་རེད། ཕ་མ་སུ་དང་སུ་ཡིན་རུང་། རང་ཉིད་ཀྱི་གཅེས་ཕྲུག་ལ་ཤ་ཚ་ཚ་དང་སྙིང་ཉེ་ཉེ་མི་བྱེད་མཁན་གཅིག་ཀྱང་མེད་པ་ནི་སྨོས་མེད་རེད། བྱིས་པ་གཉོར་སྐྱོང་ཟེར་བ་འདིའང་ཕ་མས་མི་ཚེ་གང་པོར་འབད་དགོས་པའི་བྱ་གཞག་ཅིག་རེད་ཟེར་ན་མི་ཆོག་རྒྱུ་མེད་པས། དེ་ནི་དཀའ་ཚེགས་མང་པོ་ལྡན་ལ། བདེ་སྐྱིད་ཀྱང་ཆེས་མང་པོ་མྱོང་ཐུབ་པའི་ལས་ཀ་ཞིག་རེད།

དེའི་རྐྱེན་གྱིས། ང་རང་གིས་འདི་ལྟར་འདོད་དེ།

ཕ་མའི་ནང་ན་ཕ་མ་རིགས་མང་པོ་ཡོད་པ་ནང་བཞིན། ཕ་མས་བྱིས་པ་གཉོར་སྐྱོང་བྱེད་སྟངས་མི་འདྲ་བ་རིགས་མང་པོ་ཡོད། དེ་བཞིན་ཕ་མའི་ནང་ན་འགན་འཁུར་མཁན་དང་འགན་མི་འཁུར་མཁན་རིགས་སྣ་ཚོགས་འདུག དྲང་མོར་བཤད་ན། དེང་དུས་སྤྱི་ཚོགས་ཀྱི་འགྱུར་བ་དང་འཚོ་བ་དང་ལས་ཀའི་གོམས་གཤིས་སོགས་ཀྱི་དབང་གིས། བྱིས་པ་གཉོར་སྐྱོང་ལ་སེམས་ཚེགས་དང་ལུས་ཚེགས་མང་པོ་གཏོང་མཁན་ཇེ་ཉུང་ཡིན་པ་འདྲ། སྒོས་སུ་འཇིག་རྟེན་གྱི་ཟིང་ཟིང་སྣ་ཚོགས་ལ་གཡེང་ནས་བྱིས་པ་སྣང་མེད་དུ་འཇོག་མཁན་གྱི་ཕ་མའང་མང་པོ་མཐོང་། དེང་དུས་བྱ་བའི་དགོས་དབང་གིས། ཕ་མ་མང་ཆེ་ཤོས་ལ་བྱིས་པ་གཉོར་སྐྱོང་བྱེད་པའི་དུས་ཡུན་ནི་ཐུང་བས། བུ་ཕྲུག་གཉོར་སྐྱོང་གི་ལས་ཚེགས་ཨ་མེས་དང་ཨ་ཕྱི་སོགས་རྒན་རབས་ལ་མི་སྤྲོད་ག་མེད་རེད། དགོད་བྲོ་བ་ཞིག་ལ། སྔོན་ཆད་བྱིས་པ་ལྔ་དྲུག་གཉོར་མྱོང་བའི་ཨ་ཕྱི་དང་ཨ་མེས་མང་པོ་ཞིག་གིས། ད་སྐབས་བྱིས་པ་གཉོར་སྐྱོང་བྱེད་རྒྱུ་དེ་ཅི་འདྲའི་དཀའ་བ་ལ། སེམས་ཚེགས་ཆེན་པོ་འདུག་ཟེར། རང་ཉིད་ཀྱིས་བྱིས་པ་ལྔ་དྲུག་ཙམ་གཉོར་རུང་། དེ་འདྲའི་དཀའ་སྣང་ཡོང་མ་མྱོང་ཞེས་པ་ནི་ཀུན་ལ་གཅིག་མཐུན་དུ་སྣང་བཞིན་ཡོད་པ་འདྲ།
ལོ་ན་གཞོན་པའི་ཕ་མ་དེ་ཚོས་རང་ལ་བྱིས་པ་སྐྱོང་བའི་དུས་ཚོད་དང་ཁོམ་ལོང་མེད་བཞིན་དུ། བྱིས་པ་རྒན་རྒོན་ཚོས་གཉོར་སྐབས། བྱིས་པར་ཁ་ནས་ཟ་མ་སྦྱིན་ན་ནད་འདྲ་མིན་འགོ་ཡོང་བ་དང་ཐད་ཀར་དུ་མཆུ་སྒྲོས་ལ་འོ་བྱས་ན་མི་འགྲིག་པ་སོགས་འགྲིག་ལམ་འདྲ་མིན་སྣ་ཚོགས་འཇོག་གིན་འདུག འདི་ནི་དེང་རབས་ཀྱི་འགྲོ་ཕྱོགས་ཤིག་ཡིན་སྲིད་ལ། ཕ་མ་དེ་ཚོའི་མིག་ལ་མཛེས་བཞིན་མེད་པའང་ཡིན་སྲིད་མོད། གལ་ཏེ་ཕ་མ་དེ་ཚོ། སྔར་སྲོལ་གྱི་བྱིས་པ་གཉོར་སྟངས་ལ་དེ་འདྲ་མི་འཐད་པ་དང་། དེའི་ཁྲོད་ཀྱི་འགྲོ་ལུགས་མང་པོ་ནི་སྐྱོན་དུ་མཐོང་ན། དེའི་ཁྲོད་ཀྱི་འགྲོ་ལུགས་མང་པོ་ནི་སྐྱོན་དུ་མཐོང་ན། དེའང་མཐའ་གཅིག་ཏུ་ཡང་དག་པར་ཡང་མ་ངེས་ཏེ། ནུབ་ཕྱོགས་དང་ཉི་ཧོང་སོགས་ཀྱི་བྱིས་པ་གཉོར་སྐྱོང་སྐོར་གྱི་དེབ་མང་པོར། དེ་ལས་ལྡོག་སྟེ་འུ་ཅག་གི་སྔོན་ལུགས་འགྲོ་སྲོལ་མང་པོ་དང་མཐུན་པའི་དཔེ་མང་པོ་མཐོང་། དཔེར་ན་བྱིས་པར་བྱིལ་བྱིལ་མང་པོ་བྱས་ན། ནར་སོན་དུས་བྱིས་པར་བརྩེ་བ་ཡོད་ཅེས་བྲིས་ཡོད་པ་ལྟ་བུ་རེད་ལ། ཡང་དེབ་འགའ་རེར་བྱིས་པ་ནི་ཅུང་ཟད་རྫོབ་པའི་ཁོར་ཡུག་ནས་ནར་སོན་ན་ལེགས་པ་ལས། གཙང་ཆེ་ན་ཆེན་པོ་ཆགས་དུས་རིམས་ནད་འགོག་པའི་ནུས་པ་སོགས་གཞན་ལས་ཞན་སྲིད་སོགས་ཟེར།
ཆེས་ཡག་ཤོས་བྱུང་ན《མཛེས་པའི་ཨ་མ》ཞེས་པའི་གློག་བརྙན་ནང་གི་ཨ་མ་དེ་ནང་བཞིན། འཚོ་བའི་དཀའ་སྡུག་གང་ལ་འཕྲད་ཀྱང་། རང་གིས་བྱིས་པ་རང་གིས་གཉོར་སྐྱོང་བྱེད་རྒྱུ་ནི་ཆོས་ཉིད་དང་མཐུན་པ་ཞིག་ཡིན་པ་དང་།

བྱིས་པ་གཉོར་སྐྱོང་གི་བརྒྱུད་རིམ་གྱི་དཀའ་ཚེགས་ཡོངས་ལ། ངང་རྒྱུད་རིང་པོ་ཡོད་དགོས་པ་རེད།

ནམ་རྒྱུན་འཚོ་བའི་ཁྲོད་དུ་རྒན་པ་དང་བྱིས་པ་ནི་སེམས་ཁམས་དང་ནུས་ཤུགས་གང་ཐད་ནས་གཉོམ་ཤོས་ཡིན་པས། དེ་ལ་གང་ནུས་སྒོས་བརྩེ་བ་དང་བརྩི་བཀུར་བྱེད་དགོས་ལ། འདི་ནི་ང་ཚོས་ཁོང་ཅག་ལ་སྤྲོད་ཐུབ་པའི་ལེགས་སྐྱེས་ཆེས་ལེགས་ཤོས་དེ་རེད།

སློབ་གསོ་ནི་ཁ་ནས་བཤད་པ་ཙམ་ལས་ཡོང་མི་སྲིད་པར། དེ་ནི་རྒྱུན་ལྡན་གྱི་འཚོ་བའི་ཁྲོད་ཀྱི་བྱ་སྤྱོད། སྣ་ཚོགས་པ་ལས་བྱུང་བ་ཞིག་ཡིན་པས། ཕ་མ་བཟང་པོ་ཞིག་བྱེད་རྒྱུ་ནི་སློབ་གསོ་སྐྱོང་བའི་གོ་རིམ་རེད།

ཕ་མ་སུ་ཡིན་རུང་། རང་ཉིད་གྱི་བློས་བཏང་པ་ཡོད་ཚད་ལ་གདེང་ཚོད་ཆེན་པོ་མེད་རུང། སྔར་བཞིན་བྱིས་པའི་ཆེད་དུ་འབད་སྲིད་པ་ནི་ལྡོག་ཐབས་མེད་པ་ཞིག་རེད།

མི་རྗེ་མི་ཡི་ཉི་མ་སྤྲིན་པས་སྒྲིབ་རུང་།།
དྲོ་འཇམ་འོད་དང་འོད་ཟེར་བཅོམ་པ་མ་རེད།།
ཀུན་གསལ་ཚེས་རུ་ཙམ་ལས་མེད་རབ་མ་གསུང་།།
སྐར་ཚོགས་བརྒྱ་བརྒྱའི་དབུས་སུ་ལྷོང་ངེར་བཞུགས་ཡོད།།

མཁའ་ལམ་དར་གྱི་ཡོལ་བས་ཁེབ་རབས་འདུག་གམ།།
ཆུ་ཆེན་བྱེ་མའི་རི་ཡིས་འགོག་ཐབས་མེད་དཔེ།།
ཕྲག་དོག་བདུད་ཀྱི་གཡབ་མོ་ང་ལ་མ་གཡུག།
ཧཱུྃ་བཞིའི་སྔགས་ཀྱིས་བྲབ་ན་སྐྱིད་ཚོད་མ་རེད།།

མི་ཁ་མཇའ་ཚོན་རི་མོ་བཀྲ་ཡི་མ་གསུང་།།
མི་བརྟེན་འགྱུར་བའི་ལས་ལ་ཟློག་རྒྱུ་མི་འདུག།
གནམ་མཁའི་ཀུན་གསལ་ལའང་འཕེལ་འགྲིབ་ཡོད་ན།།
སྲོག་ལྡན་འགྲོ་བ་མི་ལ་བཤད་རྒྱུ་ཅི་ཡོད།།

2023。5。 16。

དུས་ཀྱི་མཐའ་འདིར་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་བ་ལ་འགྲན་ཟླ་དང་བྲལ་ཞིང་། འཆད་རྩོད་རྩོལ་གསུམ། མཁས་བཙུན་བཟང་གསུམ། བཤད་སྒྲུབ་ཉམས་བཞེས་གང་གི་སྒོ་ནས་ཀྱང་གྲགས་པ་དོན་ལྡན་གྱི་མ་ཧྭ་པཎྜི་ཏ་ཆེན་པོ་རྡོ་རྗེ་འཆང་དངོས་༧རྗེ་བཙུན་འཇམ་དབྱངས་རྒྱ་མཚོ་དཔལ་བཟང་པོ་མཆོག