࿑བློས་གཏོང་བ་ནི་མི་ཚེ་འདིར་ཆེས་ལེགས་པའི་གདམས་ཀ་ཞིག་ཡིན། བློས་གཏོང་ནུས་ཀྱང་མ་ནུས་ཀྱང་ཐོབ་པ་དག་རང་བཞིན་གྱིས་ཤོར་འགྲོ་བ་ནི་ངས་མི་ཚེའི་ཆོས་ཉིད་དུ་འཁུམས་སོ།། མི་ཚེ་གང་བོར་བློས་བཏང་ཚུལ་ཙམ་བསྟན་ཀྱང་མཐར་རེ་འབྲས་ཅི་ཡང་མ་སྨིན་པའང་ཡོད་སྲིད་པ་ཞིག་རེད། ࿐རྨ་པྲཛྙཱ་ནས།

࿑དཔྱིད་ཆར།

མདང་གི་ཆར་བས་འཛིན་མའི་ཁྱོན་ལ་འཁྲུས་ཐེངས་ཤིག་བྱས་ཤིང་། སྐྱ་ཐིང་ཐིང་དུ་ཡོད་པའི་རྒྱབ་རིའི་ཁ་དོག་དེ་ཡང་།ད་ནི་གཞི་ནས་ལྗང་གུར་འགྱུར་ཙམ་དུ་མ་ཟད་མདུན་རིའི་ངོའི་ཀྱི་མྱ་ངན་མེད་པའི་ཐིང་ཤིང་དག་ཀྱང་ནག་ནོག་དྲི་མས་མ་གོས་པར་གཙང་སིང་ངེ་བ་ཞིག་ཏུ་བཏང་འདུག བཙུགས་ནས་ལོ་འགའ་ལོན་པའི་ལྡུམ་རྭའི་ནང་གི་ཤིང་པད་མ་དང་སེར་ཆེན་གཉིས་ཀྱི་ཡལ་འདབ་རྒྱས་ཏེ།ལོ་འདབ་ཕན་ཚུན་འཐབ་པའི་ཚུལ་གྱིས་མངོན་ཤིང་མེ་ཏོག་གི་གང་བུ་མང་པོ་ཞིག་ཀྱང་མཚམས་མཚམས་སུ་ཆར་བས་བརླན་པའི་མགོ་བོ་ཅུང་ཟད་ཐུར་དུ་འཕྱང་བ་ནི་དཔྱིད་ཀྱི་ཆར་བས་ཚིམ་པ་ཞིག་དང་ཀུན་ནས་མཚུངས། དེའི་མཚོན་ཁོར་ར་ཁོར་ཡུག་ཀུན་གྱི་སྐྱེ་དགུ་རྣམས་ལ་སྔར་ན་མེད་པའི་བཀྲག་མདངས་དང་སྐྱེས་སྟོབས་ཀྱི་དཔལ་ཡོན་ཅིག་ཅི་དགར་བསྩལ་བྱུང་ལ།སྟོད་ཀྱི་རི་སྒང་རྣམས་སུ་ཟླ་བཤོལ་གྱིས་ད་དུང་ཡང་ཁ་བའི་གོས་ཀྱིས་ཡོངས་སུ་གཡོགས་འདུག ད་ནི་ནམ་རྒྱུན་ནང་བཞིན་གུང་གསེང་གི་ཆ་ལ་གཡེང་ཤིང་ཉི་མར་ལྡེ་བཞིན་དཔྱིད་ཀྱི་དཔལ་ཡོན་འདི་ལ་རོལ་བ་ཡིན།དེ་དུས་སེམས་ཀྱི་འཆར་སྒོ་ལ་རྟོག་འགྱུ་སྣ་ཚོགས་ཤིག་ཤར་ཞིང་།སོས་དལ་བག་ཕེབས་འདི་འདྲ་གནང་མཁན་དག་གི་བཀའ་དྲིན་དྲན་བཞིན་རྗེས་སུ་ཡི་རངས་དང་།ལྷག་པར་སྤོབས་པའི་ཁེངས་བས་ལུས་ཀྱི་བ་སྤུ་གཟེངས་ཏེ་གང་ལ་འཇུག་པའི་ལས་ལ་འབད་པ་བརྒྱ་འགྱུར་ཅིག་ཅིས་ཀྱང་བྱེད་དགོས་སྙམ་པ་ཞིག་སེམས་ཀྱི་གཏིང་ནས་འཕྱུར་བྱུང་།
ལྷོ་སྤྲིན་བཅུད་དུ་ཆགས་པ་མཐོན་མཐིང་གི་གཞི་ནས།།
ཉམས་འགྱུར་གར་གྱི་སྒྱུ་འཕྲུལ་གང་འདོད་དུ་སྤྲོས་དང་།།
བདུད་རྩིའི་བཅུད་ལ་དགའ་བའི་རྐང་འཐུང་གི་ཚོགས་རྣམས།།
རེ་ས་སྦྲང་ཆར་བསིལ་མ་ཁྱོད་རང་ལས་མི་འདུག།

昨夜的春雨洗涤了大地的灰尘，让万物复苏的情景随处可见，
昨夜的春雨洗涤了心灵深处的无数烦恼，此时此刻感悟颇深。
[太阳][太阳][太阳] https://t.cn/R08xaRT

࿑ བག་ཡོད་པར་གདམས་པ།

གང་ཞིག་རིན་ཆེན་གསེར་འོད་འཕྲོ་བ་ཡི། །
དོན་གྱི་བདག་ཉིད་ཆེ་དག་གཙུག་ཏུ་མཆོད། །
མི་འདོད་རྒུད་པའི་རླུང་འཚུབ་ཉེར་ཞི་བའི། །
དགེ་ལེགས་འབྲུ་ཆར་འབབ་པའི་རྒྱུར་གྱུར་ཅིག །

ཤེས་བྱའི་གྲོང་དུ་ཚུལ་བཞིན་འགྲིམས་པ་དང་། །
ཡང་དག་དགེ་བའི་བཤེས་གཉེན་བསྟེན་པ་སོགས། །
ཆོས་གཞུང་རིག་པའི་འགྲོ་ལུགས་མི་བརྒྱུད་པའི། །
རྩོམ་འཆད་གཟུགས་བརྙན་ལེན་པའི་ཁྲམ་པའི་ཚོགས། །

ཆེད་དུ་གཏོར་བཤིག་གཏོང་མཁན་བསྐོས་པ་ལྟར། །
རང་གར་ཧམ་པ་ཕོ་ཚོད་ཡོད་པ་འདི། །
ཡ་རབས་དག་མའི་རྗེས་ནི་མ་ཆོད་པས། །
སྤྱི་ཚོགས་གནོན་ཤུགས་མ་ཁྱོག་སྨྱོ་གར་ཡིན། །

དེ་འདྲའི་རིགས་ཀྱིས་འཁྲབ་སྟོན་བྱེད་པའི་ཚེ། །
སེམས་ཁམས་འཁྲུག་པའི་སྦྱོར་བ་མི་རྩོམ་པར། །
ཇི་བཞིན་མལ་དུ་བསྡད་དེ་སློབ་སྦྱོང་ནི། །
ལྷོད་ཆགས་བག་ཕེབས་ངང་ནས་ཅི་དགར་མཛོད། །

རིག་པའི་ནང་བཅུད་ཆོས་ཀྱི་བཀའ་སྲོལ་དང་། །
དེ་ཡི་མཛེས་རྒྱན་ཚན་རྩལ་དར་བ་འདི། །
སྙིགས་མའི་དུས་ལ་སྐལ་བཟང་བཞད་པ་འདྲ། །
གནས་ལུགས་འདི་དོན་རྟོགས་ན་རིན་ཐང་ཆེ། །

གཞན་དུ་ཕྱི་ཚུལ་ཆེ་རྒུ་ངོམ་པ་ལ། །
ནང་དུ་ལྟ་ས་བརྟེན་ས་ཅིར་ཡང་མེད། །
དེ་ལྟར་མེད་པར་དྲུང་དུ་ཕྱིན་ན་གསལ། །
རང་སར་བབས་ནས་རང་ངོ་ཤེས་པར་བྱོས། །

དངོས་མྱོང་འཚོ་བའི་ཁྲོད་དུ་ཡོད་པ་ལས། །
རྩེད་ཆས་ལྟ་བུ་གླུ་གར་མིན་པར་ཤོག །
སྲོག་རྩ་བཟུང་བའི་ཟས་གོས་ཡིན་པ་ལས། །
མདུན་ལམ་མེད་པའི་ཆང་རག་མིན་པར་ཤོག །

•

རྒྱལ་ཁམས་པས།