#竹节寺佛学院[超话]# “ཆོས་བརྡ། ”
࿐བོད་ཟླ་གཉིས་པའི་ཚེས་ལྔ་ནས་དབུ་བཟུང་སྟེ་ཀུན་མཁྱེན་བསྟན་པའི་རྒྱལ་མཚན་ནམ་སྐྱེ་སྔ་ཡིད་བཞིན་ནོར་བུས། རྔོག་ཞེ་སྡང་རྡོ་རྗེས་མཛད་པའི་བརྟག་གཉིས་འགྲེལ་བ་རིན་ཆེན་རྒྱན་འདྲ་ལྗག་ཁྲིད་གནང་རྒྱུ་གཏན་ཁེལ་འདུག་པས་དོན་གཉེར་ཅན་དག་ཕེབས་བསུ་ཞུ།

འཕགས་པ་གསང་བ་འཛིན་གྱི་སྒྱུ་འཕྲུལ་གར། །
མཁས་དང་གྲུབ་པ་ཡོངས་ཀྱི་ཅོད་པན་འཆང་། །
ལུང་རྟོགས་བསྟ༵ན་པ༵འི་རྒྱ༵ལ་མཚ༵ན་སྒྲེང་མཛད་པའི། །
མཚུངས་མེད་བླ་མའི་ཞབས་ལ་ཕྱག་བགྱིའོ། །

མཁས་པ་རློམ་ཡང་མདོ་སྔགས་ཕྱོགས་རེ་བ། །
རབ་འབྱམས་ཟེར་ཡང་རིག་གཞུང་ཉི་ཚེ་བ། །
བཅུ་ཕྲག་རིག་པའི་གནས་ལ་དབང་འབྱོར་བའི། །
ཀུན་མཁྱེན་དུང་གི་ཟླ་གཞོན་ཁྱེད་གཅིག་པུ། །

བསླབ་ཁྲིམས་ངག་ཏུ་བཞུགས་ཀྱང་དོན་གྱིས་སྟོང་། །
སྤང་བླང་ཕྲ་རག་གོ་ཡང་འཆོལ་ཉོག་སྤྱོད། །
ཉེས་ལྟུང་ཕྲ་བས་མ་གོས་གསེར་བཙོ་མ། །
ཉེ་བ་འཁོར་གྱི་ཟླ་བོ་ཁྱེད་གཅིག་པུ། །

སྐུ་སྐྱེས་ཕལ་ཆེར་རྙེད་དང་གོ་སས་བསླུས། །
དབང་ཆེན་ཕལ་ཆེར་ངོ་བསྟོད་ལས་ལ་དགྱེས། །
ཆོས་བརྒྱད་ཆོས་ཀྱིས་མ་གོས་པདྨ་དཀར། །
རྗེ་བཙུན་ཆེན་པོའི་ཞལ་སྐྱིན་ཁྱེད་གཅིག་པུ། །

སྙིང་རྗེ་བརྗོད་པར་མཁས་ཀྱང་ཉམས་ལེན་ཟད། །
ཤ་ཁྲག་ཉེས་དམིགས་གོ་ཡང་འདོད་པས་བཅོམ། །
མགོན་མེད་དུད་འགྲོའི་མགོན་དུ་བྱོན་པ་ཡི། །
ཡང་དག་སྙིང་རྗེའི་རང་གཟུགས་ཁྱེད་གཅིག་པུ། །

སྡོམ་གསུམ་གནད་གཅིག་ཆོས་ཀྱི་གཤིས་བབས་སོགས། །
ཁ་ཆག་སྣ་རལ་ཙམ་རེ་འུར་བའི་ཚེ། །
རིན་ཆེན་དཔལ་གྱི་དགོངས་པའི་མཐིལ་བརྟོལ་ཏེ། །
སྨྲ་བའི་ལྗགས་རིང་རྐྱོང་མཁན་ཁྱེད་གཅིག་པུ། །

བསྟན་དོན་ཁ་རུ་ཁྱེར་ནས་བདག་དོན་འཚོལ། །
ལས་འབྲས་ངག་ནས་ཟློ་བཞིན་ཁྱད་དུ་གསོད། །
གཡོ་རྒྱུའི་འབུ་ཕྲས་ཀུན་གྱི་ལྟོ་སྒུལ་ཚེ། །
བསྟན་པ་ཁོ་ནར་གཟིགས་མཁན་ཁྱེད་གཅིག་པུ། །

ཀྱེ་མ་སྙིགས་མའི་རང་མཚང་ཀུན་ནས་བདོ། །
གཡོ་ཅན་ལྕེ་གཉིས་གྲགས་པའི་གདུགས་དཀར་གཡོ། །
དྲང་བདེན་བཟང་སྤྱོད་ཀུན་གྱི་མགོ་བོ་དུད། །
ཟོལ་བསྟོད་ངོ་གཉིས་ལས་ཀྱིས་མི་ཚེ་སྐྱོང་། །

དབུ་ཟླུམ་ཕལ་ཆེར་བསླབ་པའི་ཁྲིམས་ལ་སྐྱོ། །
གཞོན་སྐྱེས་ཕལ་ཆེར་གཞན་སྡེའི་ཁ་ཆུ་ལྡག །
ལུགས་གཉིས་ཆོས་ཀྱི་བཀྲག་མདངས་ཉམས་གྱུར་ཚེ། །
ཀུན་འདུས་ཡིད་བཞིན་དབང་རྒྱལ་ཁྱེད་གཅིག་པུ། །
#竹节寺##སྒྲུབ་བརྒྱུད་དགོན།##金安仁波切#

རང་ཉིད་ལགས།
སྐབས་སྐབས་སུ་འཚོ་བ་ལ་སུན་སྣང་དང་ཡིད་ཕམ་བྱུང་གི་ཡོད་པ།
རང་གི་སྐད་ཆ་དང་སྤྱོད་པ་འགའ་རེ་ལ་ཨ་ཐང་ཆེད་པའང་ཨེ་ཡོད།

རང་ཉིད་ལགས།
ད་ཚོད་ཀྱི་ལོ་ཟླ་ལྷོད་ཀྱི་བཞུར་བ་མ་ཚོར་རུང་།
འདས་སོང་གི་བརྩེ་བས་འཕྱོ་ལྡིང་བྱེད་པ་ཐོས་གྱིན་ཨེ་འདུག།

རང་ཉིད་ལགས།
ཁྱོད་ཀྱིས་གཅེས་སུ་འོས་པའི་མི་དག་ལ་གུས་མེད་ཞིག་མ་བྱེད་རོགས།
བློ་གཏད་སུའི་མི་དག་ལ་ཚིག་རྩུབ་ཞིག་མ་བརྗོད་རོགས།

རང་ཉིད་ལགས།
ཁོག་རྒྱ་ཆེ་རུ་བྱོས།

སྐད་ཆ་ཉུང་དུ་བཅུག།
ཤུན་དུ་ལྷིང་འཇགས་ཀྱི་ངང་ནས། ཁེར་རྐྱང་དུ་གསོན་རོགས་ཞུ།

࿐སཱ་ར་ནེ https://t.cn/R08xaRT

࿐བསྐལ་ཆེན་གྲངས་མེད་གསུམ་གྱི་ཚོགས་བསགས་ཚུལ་སྐོར།
ཐེག་ཆེན་ལྟར་ན། ཚོགས་ལམ་ནས་ས་དང་པོའི་བར་ལ་བསྐལ་ཆེན་གྲངས་མེད་དང་པོ། ས་གཉིས་པ་ནས་བདུན་པའི་བར་ལ་གྲངས་མེད་གཉིས་པ། ས་བརྒྱད་པ་ནས་བཅུ་པའི་བར་ལ་གྲངས་མེད་གསུམ་པ་སྟེ། དེ་ལྟར་གྲངས་མེད་གསུམ་མམ། ཡང་ན་ཚོགས་ལམ་དུ་གྲངས་མེད་གཅིག། དྲོད་རྩེ་གཉིས་ལ་གྲངས་མེད་གཅིག ས་བཅུ་པོ་ལ་གྲངས་མེད་གསུམ་གསུམ་སྟེ། བསྐལ་པ་གྲངས་མེད་སུམ་ཅུ་རྩ་གསུམ་དུ་ཚོགས་བསགས་པ་ཏེ། སངས་རྒྱས་པར་འགྲེལ་ཆེན་ལས་གསལ་བར་བཤད་དོ།། གོང་གི་ཚོགས་ལམ་ནས་ཞེས་པའི་ཚོགས་ལམ་དེ་སྐབས་འདིར་བསྟན་གྱི་ཐར་པ་ཆ་མཐུན་འཇོག་དགོས་པ་བླ་མ་རྗེ་བཙུན་པའི་དགོངས་པའོ།། དེ་ལྟར་ཚོགས་བསགས་པའི་དུས་སུ། དབང་པོ་རྣོན་པོས་ནི་མྱུར་ན་གྲངས་མེད་གསུམ་མམ་སུམ་ཅུ་རྩ་གསུམ་གྱིས་རྣམ་མཁྱེན་འགྲུབ་ལ། རྟུལ་བོས་ནི་ངེས་པ་མེད་དོ།།