ཆུ་མིང་ཡུལ་ལ་ཐོགས་པ་སྟེ་འབྲོག་ལ་ཐོགས་པ་འདི།
འཕྲུལ་ཆས་ཀྱི་སེམས་ལྡན་དག་གིས་བརྐུས་ནས་བུད་སོང་།
ཡང་སྙིང་བོར་བའི་ས་སྟོང་འདི་རུ།
དྭ་ཕྲུག་ཁང་གི་ཡོང་འབབ་ལ་རྔམ་པའི་མ་ཡར་བདུད་མོའི་སྐོར་ལ།
སྙིང་རྗེ་བའི་དྭ་ཕྲུག་དག་གི་འོ་དོད་རྣ་ལ་གསན་སོང་།
འགྲམ་ལྕག་ཚ་བེར་བེར་ཞིག་དང་བསྡོང་སྟེ།
བྱས་དང་བྱས་ལན་སྐོར་ཡང་གྲངས་དང་རྩིས་ལ་དེེད།
དྭ་ཕྲུག་དག་གིས་མགོ་བོ་ནང་ལ་དུད་དེ་ངུ་ཤམ་ལས་མེད།
བདུད་བྷེའི་“དྲིན་ཆེ་བའི་མ་ལོ་གང་ན་ཡོད་”ཅེས་པའི་གཞས་ཚིག་ཅིག་ཀྱང་ཡིད་ལ་ཝ་ལེ་ཝ་ལེར།

གཅན་ལ་ཕུལ་བའི་སྙན་ངག

​རྒྱབ་ལྗོངས་ནི་སྤྲིན་དང་འབྲེལ་བའི།
སྨུག་ཆར་གྱི་བརླན་པའི་སྐྲ་ལོ།
མཐོ་ས་ནས་དམའ་སར་འཕྱོ།

དཔུང་བ་རྗེན་པའི་སྟེང་ལ།
མེ་ཏོག་དག་ཕན་ཚུན་ལ་བརྡར་བའི་རྩི་འགོས།

ཕྱོགས་སུ་འཐོར་བའི་གངས་གྲོང་གི་ཉི་འོད་ནང་།
གཅིག་པུ་ཙོག་དུས།
གྲིབ་མ་ནི་ཁྱི་གུ་ཞིག་དང་འདྲ་བར།
ཁ་གཏད་ཀྱི་རྡོ་བའི་སྟེང་ལོག་ནས་འདུག

རང་གི་བོངས་ཚད་ལས་ལྕི་བའི།
ཕྲག་ཐོག་གི་གངས་རི།
མར་ཟགས་པའི་སྒྲ་ལས།
ཁེར་རྐྱང་རྙེད་སོང་།

གངས་རྡུལ་གྱི་ལྭ་བའི་ནང་གི།
གཟུགས་པོ་ཐུང་ཐུང་དེས།
མིག་ཆུ་དྭངས་མོ་ཞིག་སྐོར་བས།
ཆུ་ནང་གི་གཟུགས་བརྙན་གྱིས་འཇིག་རྟེན་ཁེབས་སོང་།

___*འདྲེ་ལྗང་།

​

࿐ ཁྱེད་ལ་འདུད།
མ་མྱང་ཚའི་ཞེ་འཁན་མཐུ་ལ་དམིགས།།
ཞིང་འོར་མའི་སྟོན་འབྲས་གསེར་ལ་བརྗེས།།
བུ་མི་ལའི་གློ་སྙིང་སྔགས་ཀྱིས་ཚོས།།
སྤྲིན་དར་ནག་སེར་བའི་ཁ་ཆུ་བཞོས།།
གཉེན་གློག་དམར་སྐེ་རགས་ཁུད་དུ་བཏུམས།།
སྤྲང་མི་ལ་འགྱོད་པའི་ཁུར་གྱིས་འདེད།།
རྗེ་མར་པ་ཆང་པའི་ཕྱག་མཐིལ་ལྕེབས།།
མཐར་ཐ་དད་མེད་པའི་ཟླུམ་པོ་སྨིན།།

༢༠༢༣ བོད་ཟླ་༡ ༡༤ རྗེ་མི་ལ་བཞད་པ་རྡོ་རྗེའི་འདས་མཆོད་ལ་ཁྲི་ལྗང་མྱུག་ནས་ཕུལ།