࿐ཕྱི་ལོ་༢༠༢༣ལོའི་ཉི་མ་དང་པོ་འགོ་ཚུགས་སོང་། རང་ལས་གཞན་གཅེས་པའི་རྒྱལ་སྲས་བྱང་ཆུབ་སེམས་དཔའི་ཐུགས་བསྐྱེད་སྨོན་ལམ་དེ་སེམས་ཅན་རྣམས་ཀྱི་རྒྱུད་ལ་ངང་གིས་སྐྱེ་བར་ཤོག

སློབ་དཔོན་རིན་པོ་ཆེ་སྣ་ཚོགས་གཟུགས་ཅན་གྱི་དྲ་ཐོག་ཏུ་སྤེལ་བ་འདི་ལྟར།
མ་འོངས་པའི་བསྟན་རྒྱུན་གྱི་ཆེད་དམ།

རིག་འཛིན་བརྒྱུད་པའི་ཕྱག་སྲོལ་བཅོས་བསླད་མེད་པ་ཡུན་རིང་དུ་གནས་ཕྱིར།

རྒྱུ་ཤེད་བཀོལ་ནས་གཞན་ལ་ལས་སྐུལ་བྱས་པ་དང་།

རྐུ་ཐབས་ཀྱིས་གཞན་ནས་འདྲ་བཤུས་བྱས་པ་དང་།

གཞན་ཡང་སླ་ཆོས་བྱས་ཏེ་རྩིས་འཕྲུལ་གྱི་ནང་ནས་བཟོས་པ་སོགས་མ་ཡིན་པར།

ཁོ་བོ་རང་གིས་ཡུན་བསྲིངས་ཏེ་ལག་ཐིག་དངོས་སུ་བཏབ་ནས་བྲིས་པའི།

སྔ་འགྱུར་བཀའ་མའི་སྒྲུབ་མཆོད་ཁག་གི་དཀྱིལ་འཁོར་གྱི་ཐིག་རྩའི་དཔེ་རིས་སུམ་བརྒྱ་ལྷག་ཁ་སྐོང་དང་བཅས་པ་ཡོངས་སུ་ལེགས་གྲུབ་བྱུང་།

ཡུན་རིང་མི་འགོར་བར་གངས་རིའི་ར་བས་བསྐོར་བའི་ཞིང་ཁམས་སུ་དེབ་གཟུགས་ཀྱིས་ལེགས་པར་བལྟམས་པར་འགྱུར་རོ། །[鲜花]

ཧཱུྃ་ཧཱུྃ་ཧཱུྃཿ རྗེ་བཙུན་ཆེན་པོ་པདྨ་ཐོད་ཕྲེང་རྩལཿ འགྲོ་བ་ཡོངས་ཀྱི་སྐྱབས་གནས་རིན་པོ་ཆེཿ ཁྱད་པར་ཐུགས་རྗེས་བོད་ཀྱི་སེམས་ཅན་གཟིགསཿ ལས་ངན་སྤྱད་པའི་རྣམ་སྨིན་གྱིས་མནར་བའིཿ བདག་ཅག་རྗེས་འཇུག་རྗེ་འབངས་སློབ་བུ་རྣམསཿ ཐུགས་ཀྱིས་འདོར་རམ་མ་ཧཱ་གུ་རུ་རྗེཿ ཐུགས་རྗེ་ཡལ་ཡོལ་བཏང་སྙོམས་མངའ་བ་ནཿ ཡེ་སངས་རྒྱས་པའི་དགོངས་པ་ཅི་ཞིག་མཆིསཿ བདག་ཅག་དུས་འདིར་གདུང་བས་མཆི་མ་འཁྲུགསཿ གསོལ་འདེབས་ང་རོས་འབོད་པ་ཅང་གསན་ནམཿ ཡིད་ནི་རྩེ་གཅིག་ཁྱོད་ཀྱི་ཡོན་ཏན་དྲནཿ ཕ་ཡི་ཐུགས་རྗེས་གཟིགས་ཤིག་རིན་པོ་ཆེཿ བུ་ལ་བྱིན་གྱིས་རློབས་ཤིག་སྤྲུལ་བའི་སྐུཿ ལུས་ལ་བདེ་བར་སྤོར་ཅིག་མཁའ་འགྲོའི་ཚོགསཿ ངག་ལ་ནུས་པ་བསྐྱེད་ཅིག་ཡི་དམ་ལྷཿ སེམས་ལ་རྟོགས་པ་སྤོར་ཅིག་གུ་རུ་རྗེཿ འདིར་ཚོགས་མོས་པའི་བུ་ལ་བྱིན་གྱིས་རློབསཿ ལུས་ལ་འགྱུར་མེད་སྐུ་ཡི་བྱིན་ཕོབ་ཅིགཿ ངག་ལ་ཚངས་དབྱངས་གསུང་གི་བྱིན་ཕོབ་ཅིགཿ སེམས་ལ་འཁྲུལ་མེད་ཐུགས་ཀྱི་བྱིན་ཕོབ་ཅིགཿ ཡོན་ཏན་འགྲན་ཟླ་བྲལ་བའི་བྱིན་ཕོབ་ཅིགཿ ཕྲིན་ལས་འགྲོ་འདུལ་རྣམས་བཞིའི་བྱིན་ཕོབ་ཅིགཿ མཆོག་དང་ཐུན་མོང་དངོས་གྲུབ་བྱིན་ཕོབ་ཅིགཿ ཨོྃ་ཨཱཿ ཧཱུྃཿ བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡཱ་ཛཿ སིདྡྷི་ཕ་ལ་ཧཱུྃཿ2023-1-1ནས་སྐྱེ་འགྲོ་ཀུན་གྱི་འདོད་དོན་ཀུན་འགྲུབ་པར་སྨོན།