དེང་སྐབས་ནད་ཡམས་ཡིན་མིན་ཅི་ཆ་སྟེ། ཆམས་ནད་ཅིག་ནི། སྤང་ལ་མེ་ཤོར་བ་བཞིན་དུ་གང་སར་ཁྱབ་བཞིན་འདུག་ལ། ཉེ་འཁོར་གྱི་མི་ཚོའི་གྲས་སུ་ཡང་ཆམས་ནད་དེས་མནར་བཞིན་པ་འདུག་པས། ད་ནི་རང་ཐོག་ལ་ཡང་ཐོན་ལ་ཉེ་བ་འདྲ། ནད་ཡམས་ཡིན་ཡང་ཉེན་ཚབས་དང་གནོད་པ་ཆུང་ན། ཅི་སྐྱོན་མོད། མི་སོ་སོའི་བདེ་ཐང་དང་ལུས་སྟོབས་མི་འདྲ་བའི་ཁྱད་པར་གྱི་དབང་གིས་གནོད་ཚབས་ཀྱང་མི་འདྲ་བ་སླེབས་ཀྱིན་ཡོད་པར་བཤད་པས། ཅུང་འཚེར་སྣང་སྐྱེ་བ་ཞིག་ཀྱང་རེད། ཅུང་ཙམ་གྱི་རྗེས་ནས་ཟི་ལང་གི་སྨན་ཁང་ཞིག་ནས་ཉིན་ཤས་ལ་བསྡད་དེ། ཕྱིར་སླེབས་ཀྱིན་པའི་ཕ་ཡུལ་གྱི་མགྲོན་པོ་ཞིག་ལ་སྣེ་ལེན་བྱེད་དུ་འགྲོ་དགོས་ཤིང་། ཁོས་ཀྱང་ཆམས་ནད་ཅིག་ཕོག་འདུག་ཟེར་བས། སྣ་ལེན་བྱེད་དུ་འགྲོ་བར་ཡང་ཅུང་དོགས་མི་བདེ་བ་ཞིག་ཆགས། ཧ་ལམ་ནད་ཡམས་ནི། རང་དང་ཁ་ཐག་ཇེ་ཉེ་ནས་ཇེ་ཉེར་འགྲོ་བཞིན་པའི་འཁྲུལ་སྣང་ཞིག་གིས་གཙེས་ཡོང་། གང་ལྟར་མགྲོན་པོ་དེར། མ་ཐུག་ཐུ་མེད་ཡིན་པས། ནད་ཡམས་མིན་པའི་སྨོན་ལམ་འདེབས་བཞིན་ཡོད་ལ། བརྒྱ་ལ་ནད་ཡམས་དངོས་གནས་པ་ཡིན་དུ་ཆུགས་ཀྱང་ཉེན་ཚབས་ཆུང་བའི་སྨོན་ལམ་ཙམ་འདེབས་པ་ལས་བྱ་ཐབས་ཅི། ད་བར་དུ་ཡོད་ཚད་ཀྱིས་བཀག་སྡོམ་ལ་སུན་ཏེ། ལྷོང་ཡངས་གཏོང་བའི་དུས་ཤིག་ནམ་འཆར་ལ་རེ་སྒུག་བྱས་ནས་ཡོང་བ་ཡིན་མོད། འགྲོ་འདུག་ལ་ཡོངས་སུ་རང་དབང་བྱིན་ཏེ། ནད་ཡམས་ཀྱི་འཇིགས་ཉེན་ལ་ཇི་ལྟར་གདོང་གཏོད་མིན་གྱི་འགན་ཁྲི་ཆ་ཚང་དེ་རང་ལག་ལ་བཞག་པ་ན། ཡང་བསྐྱར་ཉེན་ཁ་གཞན་ཞིག་གི་མགོ་བརྩམས་བྱུང་བས། གདམ་གསེས་འདི་ཉིད་ཀྱི་ལེགས་ཉེས་ཀྱང་ད་དུང་ཤིན་ཏུ་དབྱེད་དཀའ་བ་ཞིག་གོ།།

༢༡ འོ་བྲན་དབང་ཕྱུག
གསང་བ་སྔགས་ཀྱི་ཆོས་ཚུལ་མ་ལུས་ཀུན། །མངའ་དབང་བསྒྱུར་བས་གྲུབ་པའི་ས་ལ་གཤེགས། །དག་བྱེད་གཏེར་ལ་ཉ་བཞིན་འཕྱོ་མཛད་པ། །འོ་བྲན་དབང་ཕྱུག་ཞབས་ལ་གསོལ་བ་འདེབས། །ཞེས་པའི་འོ་བྲན་དཔལ་གྱི་དབང་ཕྱུག་ནི། འོ་ཡུག་མདར། འོ་བྲན་དཔལ་གྱི་འབྱུང་གནས་ཀྱི་སྲས་སུ་འཁྲུངས། སློབ་དཔོན་པདྨའི་ཐུགས་སྲས་ཏེ། གསང་སྔགས་ཀྱི་ཚུལ་ཀུན་ལ་མཁས་ཤིང་གྲུབ་པའི་མཚན་མ་མངོན་དུ་བརྙེས་པས་བན་བོན་ནུས་པ་འགྲན་སྐབས་ཆུ་བོ་ཆེན་པོར་ཉ་བཞིན་རྒྱུ་བའི་གྲུབ་རྟགས་བསྟན། ནང་རྒྱུད་སོགས་བསྒྱུར། འོ་བྲན་ལུགས་ལ་གུར་དྲག་བཀའ་མ་སོགས་ཆོས་ཚུལ་མང་དུ་ཡོད་ལ་ཕལ་ཆེར་དེང་སང་ཡང་དབང་ལུང་གི་རྒྱུན་མ་ཆད་པར་སྣང་ཞིང་གདུང་རྒྱུད་ཡང་ད་ལྟའི་བར་དུ་བྱུང་བར་སྣང་སྟེ། རྟེན་ཁྱིམ་པ་ཡིན་ནོ། 

༢༢ རྨ་རིན་ཆེན་མཆོག
དཔལ་ལྡན་ནཱ་གཱ་རྫུ་ནའི་དགོངས་པ་ལྟར། །མཐའ་བྲལ་དབུ་མའི་ལྟ་བ་མངོན་གྱུར་ཅིང་། །རྫུ་འཕྲུལ་ཕ་ཝཾ་ཟན་ལྟར་བཅད་ནས་གསོལ། །རྨ་བན་རིན་ཆེན་ཞབས་ལ་གསོལ་བ་འདེབས། །ཞེས་ཏེ། རྨ་རིན་ཆེན་མཆོག་ནི། འཁྲུངས་ཡུལ་དབུ་རུ་འཕན་ཡུལ་གྱི་རྨ་གཙོ་ཞེས་བྱ་བར་འཁྲུངས། སྐྱེ་བས་ཐོབ་པའི་བློ་གྲོས་ཁྱད་དུ་འཕགས་པས། བློ་རྣོ་རབ་མཆོག་རྨ་བན་རིན་ཆེན་མཆོག །ཅེས་བོད་ཡུལ་རབ་ཀྱི་མི་དགུའི་གྲས་ཡིན། ལྷ་བཙན་པོ་ཁྲི་སྲོང་ལྡེའུ་བཙན་གྱི་དུས། རབ་བྱུང་གི་སྔ་བ་སད་མི་མི་བདུན་གྱི་ནང་ཚན་ཏེ། མཁན་རིན་པོ་ཆེ་བོ་དྷི་ས་ཏྭ་ལས་རབ་ཏུ་བྱུང་། མདོ་སྔགས་ཀྱི་ཆོས་རྒྱ་མཚོ་ལྟ་བུ་བསྒྱུར་བའི་ལོ་ཙཱ་ཡིན། སློབ་དཔོན་རིན་པོ་ཆེའི་དྲུང་དུ་དབང་དང་གདམས་པ་ཞུས་པས་དངོས་གྲུབ་བརྙེས་རིག་པ་འཛིན་པའི་ས་ལ་བཞུགས། འདི་ཉིད་སྒྱུ་འཕྲུལ་བཤད་སྒྲུབ་ཀྱི་བཀའ་བབས་ཆེན་པོར་ཡོངས་སུ་གྲགས་ཤིང་། ལྟ་བ་ཀླུ་སྒྲུབ་ཀྱི་དགོངས་པ་བཞིན་རྩལ་དུ་བཏོན་ཞིང་ཡང་དག་པའི་རིགས་པས་ཧ་ཤང་སོགས་ལོག་པར་སྨྲ་བའི་སྡེ་ཚོགས་སུན་ཕྱུང་། པཎ་ཆེན་བཱི་མ་མི་ཏྲ་ལས་ནང་རྒྱུད་སྡེ་གསུམ་གྱི་ཆོས་སྐོར་རྒྱ་ཆེར་གསན། སློབ་དཔོན་ཆེན་པོའི་དྲུང་ནས་གསང་བ་སྔགས་ཀྱི་དབང་དང་གདམས་ཁྲིད་གསན་ཞིང་གྲུབ་པའི་རྟགས་མཚན་སྲ་མཁྲེགས་ཀྱི་རྡོ་ཡང་ཟན་ལྟར་བཅད་ནས་གསོལ་བ་སོགས་རིག་པ་འཛིན་པའི་ས་ལ་བཞུགས་པས་ཐུགས་སྲས་རྗེ་འབངས་ཉེར་ལྔའི་གྲངས་སུ་འདྲེན། རྒྱལ་པོ་གླང་དར་གྱིས་བསྟན་པ་བསྣུབས་སྐབས་རྒྱལ་པོའི་ཆད་པའི་ཚུལ་གྱིས་ཁམས་སུ་ཕེབས་ཏེ་གཙུག་རུ་རིན་ཆེན་གཞོན་ནུ་སོགས་རྗེས་སུ་བཟུང་ཞིང་སྒྱུ་འཕྲུལ་གྱིས་མཚོན་རྒྱུད་སྡེའི་བཤད་ཁྲིད་རྒྱ་ཆེར་སྤེལ་བ་དང་། སླར་དབུས་སུ་འཕེལ་བ་ལས་སྒྱུ་འཕྲུལ་ཁམས་ལུགས་སུ་གྲགས་པ་བྱུང་བ་བཅས་འགྲོ་དོན་མཐར་ཕྱིན་ངང་སྐུ་གཤེགས་སོ། །གཏེར་ཆེན་ཀློང་གསལ་སྙིང་པོའང་འདི་ཉིད་ཀྱི་སྤྲུལ་པའི་བྱེ་བྲག་ཏུ་གསུངས་པ་དང་། འདིས་མཛད་པའི་བསྟན་བཅོས་ནི། བཤད་ཐབས་བཅུ་པ། ངེས་འབྱེད་ཆེ་བ་བཅས་ཡོད་པར་གསུངས་སོ། ། https://t.cn/ELwZY0K

བཤད་ཚད་ཁ་ལ་ཉན་པའི་བདེན་ལུགས་ཀྱི་ཐག་ཆོད། །
ནམ་ཞིག་མིག་གི་མཐོང་བས་རྫུན་ཕུགས་རང་རྡོལ་ཚེ། །
རང་སེམས་ཡིན་ལུགས་དམ་བཅའ་མིན་ལུགས་སུ་འགྱུར་བས། །
སྒྱུ་མའི་སེམས་འགྱུ་འདི་ལ་བློ་གཏད་ཅང་མི་འདུག །

——སྐུ་འབུམ་པ་རྒྱལ་སྲས་ནས།