བློ་མཆོག་སྤོབས་པའི་གཏེར་ཆེན་ཤེས་རབ་གྲི།
སྙན་བརྒྱུད་གསང་བའི་གན་མཛོད་སྒོ་འཕར་ཕྱེས། །
ལས་ཉོན་གདོན་གྱིས་མནར་བའི་འགྲོ་རྣམས་ལ། །
མ་ནོར་ཐར་བའི་ལམ་སྟེགས་བསྐྲུན་འདི་མཚར། །

པོ་ལོ། (སྤོ་ལོ)
༄༅།། དིང་སང་རྐང་རྩེད་པོ་ལོའི་འགྲན་བསྡུར་ལ་དོ་སྣང་ཆེ་སྒང་ཡིན་པས། བོད་སྐད་ཀྱི་པོ་ལོ་ཞེས་པའི་ཚིག་འདིའི་འབྱུང་ཁུངས་སྐོར་བཤད་ན་འཚམས་པོ་རེད་འདུག

ང་རང་ཚོས་དོ་སྣང་བྱས་ན། དབྱིན་ཇིའི་སྐད་ཀྱི་ Polo ཟེར་བ་དེ། ཡང་སྙིང་གང་ནས་བྱུང་བ་རེད་ཅེས་རྩད་གཅོད་བྱེད་དུས། དབྱིན་ཇིའི་སྐད་དུ་ཡོད་པའི་ལོ་རྒྱུས་མང་ཆེ་བའི་ནང་། པོ་ལོ་ནི་བོད་སྐད་རེད་ཟེར་བ་དང་། ཁ་ཤས་ཀྱིས་མངའ་རིས་སྐོར་གསུམ་ནང་གི་སྦལ་ཏིའི་སྐད་རེད། དོན་ནི་ཨིན་སྐད་ཀྱི་ ball རེད་ཅེས་བྲིས་འདུག ཡིད་མ་ཆེས་ན། དབྱིན་སྐད་ཀྱི་ཤེས་བྱ་ཀུན་བཏུས་ཀྱི་དེབ་དེ་ཚོར་གཟིགས་གནང་།

ཡིན་ན་ཡང་མཁྱེན་དགོས་པ་ཞིག་ལ། སྐབས་དེ་དུས་ཀྱི་པོ་ལོ་ནི་རྐང་རྩེད་པོ་ལོ་མ་རེད། རྟ་ཐོག་ནས་རྩེ་བའི་པོ་ལོ་རེད། བོད་པས་དུས་རབས་བདུན་པ་བརྒྱད་པའི་ནང་། རྒྱ་ནག་ཏུ་རྟ་ཐོག་པོ་ལོ་བརྩེས་ཏེ་རྒྱ་མི་དང་འགྲན་བསྡུར་བྱས་པའི་རི་མོ་ཡང་དེང་སང་ཡོད་པར་གྲགས། དེའི་སྐོར་བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བའི་ནང་ཅུང་གསལ་ཡོད་དྲན།

དེ་ནས་ང་ཚོས་པོ་ལོ་རིམ་པས་བརྗེད་པ་རེད། ང་ཚོས་བརྗེད་འགྲོ་བའི་རིང་ལ་འཛམ་གླིང་དུ་པོ་ལོ་འདྲ་མ་འདྲ་སྣ་ཚོགས་དར་བ་རེད། དཔེར་ན། ལག་རྩེད་པོ་ལོ། རྐང་རྩེད་པོ་ལོ་སོགས་མང་པོ་ཞིག་དར་བ་རེད། ཡིན་ན་ང་ཚོས་པོ་ལོ་བརྗེད་པ་མ་ཟད། པོ་ལོ་ཞེས་པ་བོད་པ་རང་གི་ཚིག་ཅིག་ཡིན་པའང་བརྗེད་པ་རེད།

དེ་ནས་ནུབ་ཕྱོགས་པའི་ཤུགས་རྐྱེན་འོག་ལ། བོད་ལ་པོ་ལོ་དར་བ་རེད། དེ་དུས་རབས་ཉི་ཤུ་པའི་ནང་རེད། རེད་དེ་དུས་དར་བ་དེ་རྐང་རྩེད་པོ་ལོ་རེད། རྐང་རྩེད་པོ་ལོ་ཡང་པོ་ལོ་རེད། ལྷ་ས་ལ་པོ་ལོའི་འགྲན་བསྡུར་ཆེན་པོ་ཞིག་བྱེད་དུས། གློ་བུར་དུ་ཚེར་གསེབ་ནས་རི་བོང་ཐོན་པ་དང་གནམ་གཤིས་འགྱུར་བས་མི་རྣམས་རྣམ་རྟོག་ལངས་པ་རེད། དེར་བརྟེན་བཀའ་ཤག་ལྷན་རྒྱས་ཚོགས་འདུ་ཚོགས་པ་རེད། པོ་ལོ་ལ་རྐང་པས་རྡོག་ཐོ་གཞུ་བ་དེ། སྟོན་པའི་དབུ་ལ་རྡོག་བཀྱག་གཞུ་བ་དང་ཆ་རེད། ད་ནས་བཟུང་རྐང་རྩེད་པོ་ལོ་རྩེ་མི་ཆོག་ཅེས་གསུངས་ནས་པོ་ལོ་བཀག་པ་རེད།

དེའི་རྗེས་ལ་ག་རེ་བྱུང་མིན་ཁྱེད་ཚོས་མཁྱེན་གསལ་ལྟར་རེད། མ་མཁྱེན་པ་དེ། པོ་ལོ་ཞེས་པའི་ཚིག་དེ་བོད་ནས་བྱུང་བ་དེ་རེད། ད་དེ་མཁྱེན་པ་གནང་ཨ།

རྩོམ་འདི་ཀློག་ཚར་རྗེས། བོད་སྐད་ཀྱི་པོ་ལོ་ཟེར་བ་དེ། དབྱིན་སྐད་ཀྱི་ ball ནས་བྱུང་བ་མ་རེད་ཏ། དེ་ལས་ལྡོག་སྟེ། དབྱིན་སྐད་ཀྱི་Polo ཟེར་བ་དེ་བོད་སྐད་ནས་བྱུང་བ་མ་ཟད། གཅིག་བྱས་ན། ball ཡང་བོད་སྐད་ནས་བྱུང་བ་རེད་ཅེས་ལབ་དགོས་རེད། ཨེ་གོ །
-ཆུང་ཚེ་རིང་གིས

བྱམས་སེམས་ནི་རྟོགས་རིགས་དམིག་བསལ་བ་ཞིག་ཡིན་ལ། བརྒྱ་ལ་ཁྱེད་ཀྱི་རྟོགས་རིགས་དེ་ཇེ་ལེགས་སུ་གཏོང་ཐུབ་ན་འགྲོ་བ་མིའི་རིགས་ཙམ་མ་ཡིན་པའི་སེམས་ཅན་ཡོངས་ལ་གུས་བརྩི་བྱེད་ངེས། 
悲心是一种特殊的觉性，如果你能发展这种觉性，就会尊敬所有的众生，而不只是尊敬人类。              
                  ༧ རྫོང་སར་རིན་པོ་ཆེ། 宗萨仁波切