མི་ཚེའི་ལམ་ཕྲན་ཟེར་བ་རིང་ཐུང་ཚད་ཐིག་ཡོད་དམ། །
ཤ་ལས་ཆེད་པའི་གཅེས་ལོ་ལས་ཀྱིས་གནང་བ་ཡིན་ནམ། །
སྐྱེ་བ་ད་ཐེངས་འདི་ཡི་ལས་ཀྱི་བགོ་སྐལ་ཟེར་ན། །
འཁོར་བའི་མཛོད་ཁང་ནང་གི་ཚེ་ཡི་ནོམ་པ་ཁྱོད་ཡིན། །

࿐སེམས་ཀྱི་དགུ་སྒྲིལ།

སྐྱི་གཡའ་བའི་རྨི་ལམ་གྱིས་མཚན་མོ་དཀྲུགས་ཉིན
ཡན་ཤོར་བའི་རི་སྤྱང་གིས་ལུག་ཁྱུ་གཏོར་དུས
ད་དུང་གཙང་པོར་རྡོ་ཟམ་དང
རི་རབ་ཞགས་ཀྱིས་དཀྲིས་ཚེ
སྐེ་ནས་འབོར་མྱོང་མེད་པའི་དགུ་སྒྲིལ

ཁ་བ་བྱེ་རླུང་གིས་རྨས་ཤིང་གླེག་བམ་རྡུལ་དུ་བབས་དུས
གཡུང་དྭགས་འབྲོང་གིས་འཚོས་ཤིང་རྟ་ཁྱུ་རྐྱང་དང་འདྲེས་ཉིན
སྟོང་སྐུད་ཀྱི་ཛར་ཛར་ཆད་མྱོང་མེད་པའི་དགུ་སྒྲིལ
བྱིན་རླབས་ཀྱི་སྲོག་རྫོང་ཞིགས་མྱོང་མེད་པའི་དགུ་སྒྲིལ

མདོར་དེད་ན་དགུ་སྒྲིལ་འདི་འུ་ཚང་གི་གཞིས་སྲུང་ཡིན་ལ
དགུ་སྒྲིལ་འདི་འུ་ཚང་གི་སྦྲ་ཐིག་ཡིན

ཨ་བྱིན་རླབས་ཅན་གྱི་དགུ་སྒྲིལ་ལགས
མགུལ་ཐག་སྲིན་གྱིས་རྨུག་པའི་མཚན་གུང་དེར་ཡང
ཁ་བའི་རི་ཚོམས་སུ་ཁྱོད་གཟི་འོད་ཀྱིས་འཚོ་དགོས

གོ་བྲག་པདྨ་བསམ་འགྲུབ།

2022/12/1/༡༠/༨/

མིག་བཙུམས་རྗེས་སླར་ཡང་ས་ཆ་ཞིག་བསུབ་ཐུབ་མི་འདུག
ཞེན་ཆགས་ཀྱི་བརྒྱུད་རིམ་དེ
ལྕེ་ཐོག་ལ་བྲིས་པའི་སྨོན་ཚིག་ཐུང་ངུ་ཞིག
སྡོད་ཁང་ནང་གི་ས་རྡུལ་དང་ནམ་མཁའ་ཡིན