ལུག་རྫི་རྒན་པོ།

དབྱངས་ཅན་མ།

༡
བྱེ་མའི་རི་བོ་སླར་ཡང་འགྲིབ་པའི་སྙིགས་ལྔའི་ཤེ་མུན་བརྡོལ་བ་ན།།
རང་ངོ་མི་ཤེས་སྤྲེལ་ཕྲུག་མགོ་སྟོང་གཞན་གྱི་གཡབ་མོའི་ལག་མགོར་འཕྱན།།
ཁྱིམ་ནོར་སྟོར་བའི་སྒོ་ཁྱི་དག་ཀྱང་སྤྱང་ཀིའི་མཇུག་མར་འཐིམ་པ་ཡིས།།
ས་འཛིན་དཀར་པོའི་སྒལ་བར་བཅིབས་ཏེ་ལུག་ཁྱུ་འཐོར་བའི་བྱེ་ཚན་དུ།།
ཀུ་ཅོའི་ཟུག་ངུས་ཡངས་པའི་རྩྭ་ཐང་མཐའ་ནས་འགམས་པའི་ཁ་ཆུ་འབྱིན།།
དེ་ཚེ་འོན་པའི་རྒྱལ་ཁམས་སྲུང་བའི་ཤེས་རབ་དམག་གི་མཐུ་བོ་ཆེ།།
དཔའ་བོའི་ཀི་སྒྲས་གཉིད་ལས་སློང་བའི་རྒྱལ་སྲས་ཁྱེད་ལ་གུས་ཕྱག་འཚལ།།

༢
རྒུད་པ་གསོ་བའི་ཕུན་ཚོགས་བྱེད་པོ་ཧི་མཱ་ནཱི་ཡི་ནགས་ཀློང་དུ།།
རྟེན་འབྱུང་སྒྱུ་མའི་ན་རའི་ཚུལ་འཛིན་འགྲོ་བའི་མགོན་དུ་ཤར་བ་ན།།
སུམ་གཉིས་གྲོང་ཁྱེར་སླར་ཡང་རེ་བའི་སྤྲིན་དཀར་འདབ་མ་ལྡིངས་སེ་ལྡིང་།།
རེ་བའི་མེ་ཏོག་བྱམས་པའི་ཆར་གྱིས་ནོར་འཛིན་མཛེས་པའི་དཔལ་དུ་སྐྱེད།།
མུ་མེད་སྲིད་པའི་མཚོ་མོའི་རླབས་ཕྲེང་བརྩེ་བའི་ཐུགས་ཀྱིས་ཡོམ་ཡོམ་བསྒུལ།།
འབྱམས་ཀླས་ཡོན་ཏན་ནོར་བུའི་མཛོད་འཛིན་རེ་བའི་མིག་འབྲས་རྒྱལ་བའི་སྲས།།
དད་དང་གུས་པས་སྲིད་པའི་སྒོ་གསུམ་ཁྱེད་ལ་འབུལ་ལོ་ཁྱེད་ལ་མཆོད།།

༣
ལོ་ངོ་སྟོང་གི་ངོ་མཚར་རྡོ་རིང་ཁད་ཀྱིས་འགྱིང་བའི་གཏམ་རྒྱུད་ལ།།
ཤ་དང་རུས་པའི་མགོ་རྣ་ཅན་ཚོ་ས་རྡུལ་སྨག་ལ་འདྲེས་པའི་ཚེ།།
བུ་དང་ཚ་བོའི་མགྲིན་པ་ལྐུགས་ཤིང་གྲོང་ནས་གྲོང་དུ་འཕྱན་པ་ན།།
ཏི་སེའི་དབུ་འཕང་དར་རྒུད་ཅི་ཡོང་གཡང་གི་རྫི་བོ་ཁྱེད་རང་ཡིན།།
བུ་རམ་ཤིང་པའི་མེ་རོ་སློང་བའི་ངང་ངུར་ཚོགས་ཀྱི་གཤོག་རྩལ་ལ།།
མི་འདོད་ཐལ་བས་བརླག་པར་འདོད་ཅིང་སྲེད་པའི་རླུང་བུ་གཡུག་པའི་ཚེ།།
ཐབས་ཤེས་མེ་དཔུང་ཆེས་ཆེར་རབ་འབར་ཕྱོགས་བཞིའི་ཚང་ཚིང་ནགས་ལ་མཆེད།།
ཤོང་ཆེན་ནམ་མཁར་བསྐལ་པའི་བསྐལ་པར་སེམས་ཀྱི་བསྲུང་མ་ཁྱེད་རང་ཡིན།།

༤
གངས་ཀྱི་རི་ལ་གཤོག་པ་རྐྱོང་བའི་ཕ་དང་མེས་པོའི་རྐང་ལམ་དུ།།
རྡོ་དང་བྱེ་མའི་ན་བུན་སྐྱ་བོས་ལ་དང་ལུང་པར་དུ་ཞག་གིས།།
ཁུ་བྱུག་ཚོགས་ཀྱང་གསུང་སྐད་འགག་ནས་ཝ་དང་ཁ་ཏྭའི་ལད་མོ་བྱེད།།
མི་འཇིགས་སྤོབས་པའི་སེང་གེའི་ང་རོས་སྲོག་རྩ་མཐུད་ཅིང་བློ་སྤོབས་སྦྱིན།།
ཁྱུང་ཆེན་གཤོག་རྫོགས་རིགས་ཀྱི་སྲུང་མ་དུས་བཞིའི་མཁའ་ལ་ལྡིང་ན་ཡང་།།
ཞ་ལོང་ལྐུགས་པས་ར་མགོ་ལུག་སྦྱར་མེས་པོའི་དུར་བྱང་སྔོག་པའི་ཚེ།།
མིག་གིས་རིག་རིག་སེམས་ཀྱིས་ཟིན་ཟིན་རང་ཤི་རྒྱག་པར་བཟོད་གསོལ་ཞུ།།

༥
སྐྱེ་རྒ་ན་འཆིའི་གཡང་ལ་ལྷུང་ཚེ་སྲིད་པ་གསལ་བའི་མེ་ལོང་བསྟན།།
གསར་རྙིང་ལྟ་བས་འགལ་འདུ་སློང་ཚེ་གནའ་དེང་རིག་པའི་རྣམ་བཞག་བཤད།།
འཁྲུལ་སྣང་འཁོར་བར་ལམ་ནོར་ཐེབས་ཚེ་ཤེས་རབ་སྒྲོན་མེའི་འོད་སྣང་བསྩལ།།
རང་ཕོར་ཆེད་དུ་འཚང་ཁ་སྐྱེས་ན་དེང་རབས་བསླབ་བྱའི་གདམས་པ་གནང་།།
དབྱངས་གསལ་ལུ་གུ་སྨུག་པས་བདས་ཚེ་ལུག་རྫི་རྒན་པོའི་ཀི་སྒྲ་བཏབ།།
མཐོན་པོ་སེམས་ཀྱི་རྒྱལ་ས་མན་དང་དམའ་མོ་གད་ཕུག་སྐྱ་བོ་ཡན།།
ཁྱེད་ཀྱིས་བསྲུངས་ཡོད་ཁྱེད་ཀྱིས་བསྲུང་དགོས་ཇི་སྲིད་བར་དུ་བསྲུང་དུ་གསོལ།།

༦
ཕྱི་རུ་ཕེབས་ཚེ་ཤེས་རབ་རལ་གྲིས་རྨོངས་པའི་མགོ་བོ་ཁྱེད་ཀྱིས་བཅད།།
ནང་དུ་སྡོད་ཚེ་འཇམ་པོའི་ཐབས་མཁས་གཉོམ་ཆུང་ལུ་གུའི་སེམས་ཀྱི་རྟེན།།
འཛིན་མའི་ཁྱོན་ཀུན་སྙན་པའི་བ་དན་སྲིད་ན་རྒྱལ་བའི་གཟི་བྱིན་མཐོ།།
བྱམས་བརྩེའི་དཔལ་གྱུར་མཐོང་ན་རབ་མཛེས་ཡིད་འཕྲོག་ཟླ་བ་འཛུམ་པ་ལ།།
སྲིད་པའི་མཆོད་སྡོང་ཙིནྟ་མ་ཎིར་མི་ཕྱེད་དད་དང་གུས་པ་ཡིས།།
དམ་ཆོས་འོ་མའི་ཉིང་ཁུ་འཐུང་ཞིང་མི་ཤིགས་རིག་པའི་ཐིག་ལེ་བརྐུས།།
ཁྱེད་ཀྱི་གསང་གསུམ་ཉི་ཟླའི་སྐ་རག་དགའ་དད་སྤྲོ་བས་ཡི་རངས་ཞུ།།

༧
རྩྭ་ཐང་ཞིག་ནས་ལང་ཚོ་འབུས་ཤིང་གངས་དང་ནགས་ཀྱི་འདབ་རོལ་དུ།།
ལུ་གུ་ཞིག་གི་སྐྱེ་བ་བླངས་ཤིང་ཨ་ཕོ་ལུག་རྫིས་སེམས་ཀྱིས་བསྲུངས།།
འོ་ཞོའི་སྤྲིན་དཀར་ཞྭ་མོ་བསླས་ཤིང་རྩྭ་དང་རྩི་ཐོག་ལྭ་བ་གྱོན།།
ཅང་ཤེས་རྟ་ཕོས་འཚེར་སྐད་ལྷང་ལྷང་ཀ་ཁའི་ཁ་ཆུ་འཇོལ་ལོ་ལོ།།
དཔྱིད་ཀྱི་ཕོ་ཉས་གསུང་སྙན་ལྷང་ལྷང་དཀར་དམར་མེ་ཏོག་ཕྲ་ཚོམ་ཚོམ།།
ཉི་ཟླའི་རི་བོར་སྦྲང་ཆར་སིམ་སིམ་འཇའ་དང་འོད་ཀྱི་གུར་ཁང་དུ།།
དབྱངས་གསལ་མཚོ་ཁར་ལིང་ལིང་ལྡིང་བའི་ལུ་གུ་དེ་ནི་ང་རང་ཡིན།།

བོད་རྒྱལ་ལོ་༢༡༤༩
ཡེ་ལོ་2022

མིག་བཙུམས་རྗེས་སླར་ཡང་ས་ཆ་ཞིག་བསུབ་ཐུབ་མི་འདུག
ཞེན་ཆགས་ཀྱི་བརྒྱུད་རིམ་དེ
ལྕེ་ཐོག་ལ་བྲིས་པའི་སྨོན་ཚིག་ཐུང་ངུ་ཞིག
སྡོད་ཁང་ནང་གི་ས་རྡུལ་དང་ནམ་མཁའ་ཡིན

如果你因为想念上师而掉了一滴眼泪
那这滴眼泪将是所有善业中最大的善业。
གལ་ཏེ་ཁྱོད་ཀྱིས་བླ་མ་དྲན་ནས་མིག་ཆུ་ཞིག་ཤོར་ན།
མིག་ཆུ་དེ་ནི་དགེ་བ་ཐམས་ཅད་ཀྱི་ནང་ནས་ཆེས་ཆེ་བའི་དགེ་བ་དེའོ
#——འཕགས་པ་ཀླུ་སྒྲུབ 龙树菩萨#