དོ་དགོང་ལྷ་གཡག་འགན་འཛིན་པ་རྒན་མི་འགྱུར་ལགས་དང་། ཡོ་གའམ་རླུང་སྦྱོར་ཁྲིད་སྟོན་པ་གྲགས་ཅན་པདྨ་བཀྲ་ཤིས་ཞུ་བ་ཁོང་རྣམ་པ་གཉིས་ཀྱི་ཐད་གཏོང་ལམ་གྱི་བགྲོ་གླེང་ཞིག་ལ་བལྟས་ནས་བསྡད་བཞག ཧ་ཅང་ལྟ་རིན་འདུག་པའི་ཚོར་བ་བྱུང་། བརྗོད་བྱ་གཙོ་བོ་བདེ་ཐང་གཞི་རྩ་བྱས་ནས་གླེང་གི་འདུག་ལ། ཞོར་འཕྲོས་སུ་སྐྱེས་པ་ཞིག་ཡིན་ན། རང་གི་ཆུང་མར་བྱམས་སྐྱོང་དང་འདྲ་མཉམ་གྱི་ལྟ་བ་ལེགས་པོ་འཛིན་དགོས་པའི་གལ་གནད་དེ། ཁོང་གཉིས་ཀྱི་ལག་ལེན་དངོས་ཀྱི་ཉམས་མྱོང་དང་སྦྱར་ནས་ཧ་ཅང་ཞིབ་ཅིང་རྒྱས་པ་ཞིག་བཤད་སོང་། ཐ་ན་ཁ་ཟས་གཡོས་སྦྱོར་བྱེད་པ་དང་། ཀར་ཡོལ་བཀྲུ་བ་ཚུན་ཆད་ཆུང་མ་དང་འདྲ་མཉམ་གྱིས་དང་དུ་ལེན་དགོས་པའི་གལ་ཆེན་རང་བཞིན་དེ། ཁ་གསལ་གོ་བདེའི་ལམ་ནས་བཤད་སོང་ལ། བརྗོད་བྱ་དེའི་རིགས་ནི་བོད་ཀྱི་སྤྱི་ཚོགས་ནང་ཁ་ཚ་དགོས་གཏུགས་ཀྱིས་ཤུགས་ཆེར་གླེང་དགོས་པ་ཞིག་ཏུ་ཡང་མཐོང་ངོ་།། ཁོ་བོ་ནི་གྲྭ་བཙུན་ཞིག་ཡིན་པས་བརྗོད་བྱ་དེའི་རིགས་ལ་འབྲེལ་བ་གང་ཡང་མེད་ནའང་། བོད་ཀྱི་བུད་མེད་ཚོས་འདྲ་མཉམ་གྱི་ཐོབ་ཐང་མ་རག་པའི་དཀའ་སྡུག་གི་འོག་ན་ལུས་སེམས་གཉིས་ཀྱིས་གཉན་གནོན་མང་བོ་མྱོང་བཞིན་པའི་སྣང་ཚུལ་དེ། ཤིན་ཏུ་སེམས་ཀྱིས་མི་བཟོད་པ་ཞིག་འདུག་པས། མི་རྣ་འཇོན་ཐང་ཅན་ཁོང་རྣམ་པ་ཚོས་སྣེ་ཁྲིད་དེ། གནད་དོན་དེ་ཉིད་སེལ་ཐབས་སུ་ཅི་ནུས་ཀྱིས་འབད་བཞིན་པའི་ངང་ཚུལ་དེ། ཇི་འདྲའི་དགའ་འོས་པའི་དོན་བཟང་ཞིག་གོ།། གཞན་ཁོང་རྣམ་པ་གཉིས་ཀྱིས་འཚོ་བར་བདེ་སྐྱིད་འབྱུང་མིན་དང་། ལུས་སེམས་ལ་བདེ་ཐང་ལེགས་པོ་འབྱུང་མིན་ཡང་སྒོམ་གྱི་ཉམས་ལེན་དང་འབྲེལ་བ་ཧ་ཅང་ཆེ་བའི་ཚུལ་དེ། ལོ་མང་བོའི་རིང་ལ་སྒོམ་བརྒྱབ་པའི་ཉམས་མྱོང་དངོས་དང་སྦྲགས་ནས་འགྲེལ་བཤད་གྱ་ནོམ་པ་གནང་སོང་བས། སྐྱ་བོ་ཚོས་ཀྱང་སྒོམ་གྱི་ཉམས་ལེན་ལ་འདི་འདྲའི་དོ་སྣང་ཤུགས་ཆེན་པོ་སླེབས་ཀྱིན་ཡོད་པའི་དུས་འདིར། ཁོ་བོས་ནི་གྲྭ་བའི་གཟུགས་བརྙན་ཙམ་འཆང་ཁུལ་བྱས་ཡོད་ནའང་། ད་དུང་སྒོམ་དང་ཁ་ཐག་རིང་བོར་གནས་ཡོད་པའི་སྣང་ཚུལ་འདི་ཐབས་སྐྱོ་བ་ལ་སྙམ་སྟེ། རང་ལ་ངོ་གནོང་བ་དགོས་ཞིག་ཀྱང་ཆགས་སོང་།

࿐སེམས་ཀྱི་དགུ་སྒྲིལ།

སྐྱི་གཡའ་བའི་རྨི་ལམ་གྱིས་མཚན་མོ་དཀྲུགས་ཉིན
ཡན་ཤོར་བའི་རི་སྤྱང་གིས་ལུག་ཁྱུ་གཏོར་དུས
ད་དུང་གཙང་པོར་རྡོ་ཟམ་དང
རི་རབ་ཞགས་ཀྱིས་དཀྲིས་ཚེ
སྐེ་ནས་འབོར་མྱོང་མེད་པའི་དགུ་སྒྲིལ

ཁ་བ་བྱེ་རླུང་གིས་རྨས་ཤིང་གླེག་བམ་རྡུལ་དུ་བབས་དུས
གཡུང་དྭགས་འབྲོང་གིས་འཚོས་ཤིང་རྟ་ཁྱུ་རྐྱང་དང་འདྲེས་ཉིན
སྟོང་སྐུད་ཀྱི་ཛར་ཛར་ཆད་མྱོང་མེད་པའི་དགུ་སྒྲིལ
བྱིན་རླབས་ཀྱི་སྲོག་རྫོང་ཞིགས་མྱོང་མེད་པའི་དགུ་སྒྲིལ

མདོར་དེད་ན་དགུ་སྒྲིལ་འདི་འུ་ཚང་གི་གཞིས་སྲུང་ཡིན་ལ
དགུ་སྒྲིལ་འདི་འུ་ཚང་གི་སྦྲ་ཐིག་ཡིན

ཨ་བྱིན་རླབས་ཅན་གྱི་དགུ་སྒྲིལ་ལགས
མགུལ་ཐག་སྲིན་གྱིས་རྨུག་པའི་མཚན་གུང་དེར་ཡང
ཁ་བའི་རི་ཚོམས་སུ་ཁྱོད་གཟི་འོད་ཀྱིས་འཚོ་དགོས

གོ་བྲག་པདྨ་བསམ་འགྲུབ།

2022/12/1/༡༠/༨/

ད་ལོར། ལན་རེར་ཁུ་སིམ་མེར། ལན་རེར་འུར་ཆིལ་ལེར།

ད་ལོར། འདི་ལྟར་སློབ་འགོ་ཚུགས་ཏེ་སྤྱི་ཟླ་བཅུ་གཉིས་པར་སླེབས། སློབ་སྐབས་འདི་རྫོགས་པར་ཟླ་གཅིག་ཙམ་མཆིས། དོན་དུ་རྩིས་འཁོར་གྱི་བརྙན་མིག་ལ་ཅེར་ནས་ཟླ་གསུམ་ཙམ་འདས། དུས་ཚོད་ཀྱི་གསང་བ་ཡོད་དོ་ཅོག་སྒེའུ་ཁུང་ལས་ཟད། བརྙན་མིག་ལས་རྫོགས། གསར་འགྱུར་གྱི་བསླུ་བྲིད་འདི་དག་ཟ་འཕྲུག་ཅིག་དང་འདྲ་བར། ག་དུས་ཀྱང་སོས་དལ་དུ་མི་འཇུག གཉིད་བདེ་རུ་མི་འཇུག ཁམས་དྭངས་སུ་མི་འཇུག མིག་ཟུང་རིག་རིག་གིས། རྣ་གཤོག་ཀྲོང་ཀྲོང་གིས། རིག་པ་བསྒྲིམས་དྲགས་པས། དམིགས་པ་གཏད་དྲགས་པས། ལུས་སེམས་ཀྱི་སྟོབས་ཟད། མདངས་ཉམས། ་་་ ་་་