࿑མི་ཚེ་རིང་ཡང་ཐུང་ཡང་རུང་།།
གྲྭ་བ་ཁྱིམ་པ་གང་ཡང་རུང་།།
སྐྱེས་པ་ཕོ་དང་མོ་ཡང་རུང་།།
རྒན་དང་གཞོན་པ་བྱིས་ཀྱང་རུང་།།
རང་རང་ས་ན་སྡུག་གི་མུན།།
ཁྱད་པར་མི་འདུག་འཐིབས་ནས་གདའ།།

འཁོར་བ་སྡུག་བསྔལ་རྒྱ་མཚོ་ཞེས།།
ཀུན་གྱིས་ངག་ན་མཆིས་མོད་ཀྱང་།།
དེ་ལ་དཔྱད་པ་མ་བཏང་ན།།
སྣང་ལ་མ་ངེས་ཞེས་ཀྱང་བྱ།།
རྒྱུད་ལ་ཕན་པ་གང་ཡང་མེད།།
ནེ་ཙོའི་སྐད་ཆ་ཇི་བཞིན་ནོ།།

བློ་ཡི་ནུས་པའི་ལྕོགས་ཚོད་ཀྱིས།།
ཅུང་ཟད་དེ་ལ་བསམ་གྱུར་ན།།
ཉིན་དང་མཚན་ཞག་གང་ཡིན་ཡང་།།
ལོ་དང་ཟླ་བར་ཆ་བཞག་ཀྱང་།།
འགྲོ་འདུག་སྤྱོད་པས་མཚོན་གྱུར་ནས།།
ཕལ་ཆེར་སྡུག་གི་འབྲས་བུར་ངེས།།

༢༠༢༢\ ༡༡\ ༤\ ཉིན་གྱི་མཚན་དཀྱིལ་ལ་རྨ་པྲཛྙཱ་ནས།

ཐོལ་དུ་བབ་པ་འདི་སྙན་ངག་ཡིན་པའི་ཚུལ་ཡིན། སྙན་ངག་ཅེས་ནི་སྒྱུ་རྩལ་གྱི་རིགས་ཤིག་ཡིན་པར་གྲགས་ལ། སྒྱུ་རྩལ་ནི་གཡོ་སྒྱུའི་ཐབས་རྩལ་ལ་གོ། ཕལ་སྐད་ལྟར་དུ་བཤད་ན་མགོ་སྐོར་སྤྱད་ཡིན། ཁེ་ཕན་ཁོ་ནའི་ངོས་ནས་བལྟས་ན་སྙན་ངག་ནི་དུས་ཚོད་ཟད་རོགས་ཙམ་རེད། དངོས་ཕན་གཅིག་པུའི་ངོས་ནས་བསམ་ན་སྙན་ངག་ནི་ཆུ་ཤིང་ལྟར་སྙིང་པོ་བྲལ་ལོ།།བསམས་ཤིང་བསམ་ན་བློ་ཆུང་བྱིས་པའི་བྱ་བྱེད་ཙམ་སྟེ་ཅི་ཡང་མི་ལོ། མི་ནི་མ་གཞི་མགོ་ཤིན་ཏུ་སྐོར་སླ་བའི་སྲོག་ཆགས་ཤིག་ཡིན་པས།བླུན་པོ་ཆུ་སྣ་གར་ཁྲིད་ཀྱི་ཚུལ་དུ་ར་ལུག་ཚྭ་གཞོང་དུ་འདུ་བ་ལྟར་བྱེད།

ཨ་མའི་བཤད་ན་འདས་པའི་མི་ལོ་དུ་མ་ཞིག་གི་སྔོན་གྱི་ཟླ་ཚེས་བཟང་བོ་འདི་ལ་ང་རང་འཇིག་རྟེན་མི་ཡུལ་ལ་སླེབས་པ་ཡིན་ཟེར།

དེ་བས་དགུང་གི་ཉི་ཟླ་ལྟ་བའི་རང་གི་དྲིན་ཆེན་ཕ་མ་གཙོ་བྱས་པའི་ངའི་འཇིག་རྟེན་ལ་འོད་སྣང་སྦྱིན་མཁན་གྱི་ཁྱོད་ཅག་ལ་བཀྲ་ཤིས་བདེ་ལེགས་ཞུ།།
支支灿烂的烛光，岁岁生日的幸福，幸运的我，明天会更好！[月亮] https://t.cn/R2WxDSM