ཤེས་རབ་སྡོང་བུ་ལས།
དམ་པ་མང་པོ་ཁས་འཆེ་མི་བྱེད་ལ། །
གལ་ཏེ་དགའ་བས་ཁས་ནི་བླངས་གྱུར་ན། །
རྡོ་ལ་རི་མོ་བྲིས་པ་ལྟ་བུར་ནི། །
ཤི་ཡང་གཞན་དུ་བྱེད་པར་མི་འགྱུར་རོ། །ཞེས་གསུངས་སོ།།

ཁྱོད་ཀྱིས་བོར་བའི་ལག་པ།
​བདག་གིས་རྙེད་ན་བསམ་བྱུང་།
​དགོས་འདོད་མི་འདོོད་བཞིན་དུ།
​སྐལ་བཟང་ལག་པ་བོར་བ།
སུ་དང་གང་གིས་ཉེས་སམ།
བདག་ནི་རྨི་ལམ་ལྟ་བུའི།
འཆར་ཡན་ཀློང་ལ་འཁྱམས་ཚར།
ཁྱོད་ཀྱང་བཙོན་ར་ལྟ་བུའི།
འཚོ་བའི་ཀློང་ལ་འཐིམས་འདུག
རྨི་ལམ་གཏོང་བར་གོམས་པ།
ཁྱོད་ཀྱི་གཤིས་སུ་གྲུབ་ཚར།
རྨི་ལམ་གཏོང་བར་སྐུལ་བ།
ཁོ་ཚོའི་རྒྱུད་ལ་འབྱམས་འདུག
བདག་ནི་སྒྱུ་འཕྲུལ་ལྟ་བུའི།
ཁྱོད་ཀྱི་སྨྱུག་རྩལ་དེར་འཁྱུད།
ཁྱོད་ཀྱང་རྨི་ལམ་ལྟ་བུའི།
མངོན་སུམ་འཚོ་བ་དེས་བསླུས།
ཁྱོད་ཀྱིས་བོར་བའི་ལག་པ།
སུ་ཡིས་རྙེད་ན་བསམ་བྱུང་།
སུ་ཡིས་རྙེད་པའི་མི་ཚད།
དེ་ལ་མཁོ་ན་བསམ་བྱུང་།

- “བོར་ཟིན་པའི་ལག་ཟུང” གིས་སྐུལ་བའི་འོ་དོད།

བློ་མང་ཅན་གྱིས་དོན་ནི་མི་འགྲུབ་བཞིན།།
ང་རང་བཞད་པའི་མེ་ཏོག་ལྡུམ་རའི་ཚལ།།
སྣ་བརྒྱའི་དྲི་བསུང་ཕྱོགས་བཅུར་འཐུལ་དུས་ན།།
ཕྱིས་སུ་ལྷག་པ་རང་དྲི་གཞན་ན་གང་།།