ང་འདི་ལྟར་ཤི་སོང་ན།

གསལ་བྱེད་སུམ་ཅུ་བོ་ཇི་ལྟར་བྱ།

བཀྲུས་བཀྲུས་ནས་ཁ་དོག་ཀྱང་ཡལ་བའི།

བརྡ་སྤྲོད་ཀྱི་ལྭ་བ་འདི་དག་ཇི་ལྟར་བྱ།

སྤོས་ཀྱིས་གདུག་ཀྱང་ཆང་གིས་མཆོད་པའི།

མཆོད་སྒྲོམ་གྱི་དབྱངས་ཡིག་བཞི་བོ་ཇི་ལྟར་བྱ།

འདང་བརྩེ་ཡི་དབང་གིས།

ངའི་ཆེད་དུ་རང་སྲོག་བློས་བཏང་བའི།

སྙན་ངག་གི་དཔེ་དང་གཟུགས་རྒྱན།

རབ་བཏགས་དང་བསྡུས་བརྗོད་འདི་དག

ཇི་ལྟར་བྱ།

ང་འདི་ལྟར་ཤི་སོང་ན།

ངའི་ལུས་ལ་མེ་ཏོག་དང་དྲི་ངད་གཏོར་བའི།

མངོན་བརྗོད་དང་བརྡ་དག་ཚོགས་ཀྱིས།

ཅི་ཞིག་བྱ།

ང་འདི་ལྟར་ཤི་སོང་ན།

ངའི་མིག་དང་སེམས་ལ་འབྱར་བའི།

བོད་ཀྱི་ཡི་གེ་འདི་དག

དྭ་ཕྲུག་ཏུ་འགྱུར་ངེས།

ཡུན་རིང་གི་ལོ་ཟླའི་ནང་།

ང་དང་གྲུབ་མ་ལྟར་འགྲོགས་པའི།

ཚེག་དང་ཤད་འདི་དག

སྐྱོ་གདུང་གིས་ཤི་ངེས།

ད་ཅི་བྱེད་དམ།

ང་ནི་ཤི་རན་སོང་།

མྱུར་བ་མྱུར་བར་མ་ཤི་ན།

ངས་བྲིས་ཤིང་འབྲི་འགྱུར་གྱི།

སྙན་ངག་འདི་དག་ཀྱང་།

དུས་རབས་ཀྱིས་བསྣུབས་ཤིང་།

མི་རྟག་པས་ཟོས་ཏེ།

མི་རབས་ཕྱི་མར་སླེབས་དུས།

ལྷག་བསམ་འདིའི་རུས་པ་སྤར་མོ་གང་ཡང་།

ལྷག་རྒྱུ་མ་རེད།#我要上同城精选#

མཛེས་སྡུག་ཡིད་དབང་འཕྲོགས་པའི་ཞལ་རས་ཀྱང་།།
མི་འདོད་གཉེར་མའི་གང་བའི་ཚུལ་མཐོང་ཚེ།།
མི་རྟག་འགྱུར་བའི་ཆོས་ལ་ཞེན་པའི་སེམས།།
འཁྲུལ་བའི་རང་བཞིན་མཐོང་ཚེ་བདག་ཡིད་སྐྱོ །

བཤད་མི་རུང་བ་གསུམ་ཡོད།

ཞིབ་འཇུག་མ་བྱས་པའི་སྐད་ཆ་དང་།
གནས་ལུགས་ལ་བརྩི་སྲུང་མི་བྱེད་པའི་སྐད་ཆ།
ཆགས་སྡང་གི་སྐད་ཆ་སྟེ།
དེ་གསུམ་ནི་གཏན་ནས་བཤད་མི་རུང་བའི་སྐད་ཆ་ཡིན།

མཁས་དབང་ཚུལ་ཁྲིམས་བློ་གྲོས་ཀྱིས།