ཁྲི་བ་རིན་པོ་ཆེས་སྤོ་ལོ་མ་རྩེད་ཟེར་གྱིན་འདུག ངས་ནི་ཟླ་གམ་ཞབས་ནས་སྤོ་ལོའིཐད་གཏོང་ལ་བལྟས་བསྡད་ཡོད།སྤོ་ལོར་ལྟ་རྒྱུ་དེ་ཁྲི་བའི་གཏམ་བཤད་ལས་ཀྱང་བྲོ་བ་བརྒྱ་དང་སྟོང་རེད།

༈ དཔེ་འཇོག

~~~ཨ་མ་ལགས་སུ་ཕུལ་བ།

ཁྱེད་ཀྱི་བྱམས་དུངས་ཀྱི་མིག་ལ་འཁྱིལ་བའི་སྤྱན་ཆབ
ད་ཚོད་ཤི་གསོན་གཉིས་ཀྱི་ཆེད་དུ་བཞུར་ཏེ་སྐམ་ལ་ཉེ་ཡང
ནང་སེམས་ལ་ལྟེམས་མར་འཁྱིལ་བའི་བརྩེ་བའི་རྒྱ་མཚོ
ནམ་ཡང་བྲི་གང་བྲལ་བའི་དཔེ་རུ་བདེ་གཤེགས་སྙིང་པོ་འཇོག

འཚོ་གནས་ཀྱི་སྙིང་བོ་བཙལ་ཀྱང་རྙེད་དུ་མེད་པའི་དུས་ཚོད་ཀྱི་ནང་དུ
མིག་ཟུང་རབ་རིབ་ཏུ་གྱུར་ཞིང་ནང་སེམས་འགལ་འདུ་ཡིས་སྐྱོམས་ཏེ
དཀར་ནག་གི་ཁ་དོག་དང་བདེན་འཛིན་གྱི་དབྱིབས་གཟུགས་ལ་མགོ་འཐོམ་ཐེངས་རེར
ངས་པཱ་ལགས་དྲན་པ་ནང་བཞིན་ཁྱེད་རང་དྲན
ཁྱེད་ཀྱི་བདེན་པ་དང་སྙིང་རུས་ཀྱི་དཔེ་རུ་རྙོག་པ་མེད་ཅིང་ཞིམ་པ་མེད་པའི་རྦབ་ཆུ་འཇོག

འཇིག་རྟེན་གྱི་གྲུ་ག་གང་མང་ཞིག་ལས་མངོན་པའི
སྐྱེ་བོ་བརྒྱ་སྟོང་མང་པོའི་བཅོས་མའི་འཛུམ་དཀར་གྱིས
ང་རང་ཡང་དང་བསྐྱར་དུ་ཁུ་སིམ་མེར་གཏོང་ཐེངས་རེར
ཡང་བསྐྱར་ཁྱེད་ཀྱི་བྱ་བྱེད་ཀུན་ལ་ཡིད་གཏིང་ནས་མོས་གུས་ཤོར
ཁྱེད་ཀྱི་རྣམ་སྨིན་ལ་རེ་བ་མེད་པའི་གཏོང་ཕོད་དང་འཛུམ་མདངས་ཀྱི་དཔེ་རུ་མཁའ་དབུགས་དང་ཉི་འོད་འཇོག

༢༠༢༠།༠༨།༢༠།

གཡུ་རྔོག་ལུང་རྟོགས།

མཛེས་སྡུག་ལྡན་པའི་རྡོ་ཕུ་ནི

ཕ་མེས་ཀྱི་ཤ་རུས་འཐོར་ས
རང་ཉིད་ཀྱི་ལྟེ་ཁྲག་འཕོ་སའི་བདག་གི་ཕ་ཡུལ་ཡིན
ང་ཁྱོད་ཀྱི་པང་དུ་སྐྱེས་པ་བདེན་ཡང་བདག་གི་ཁྱེད་ལ་
དྲིན་ལན་འཇལ་བ་མི་བདེན

གནའ་ནས་ད་བར་མི་ལོ་སྟོང་ཕྲག་ནས་བརྒྱུད་ཡོང་བའི་རི་ཆུའི་མཛེས་པ་
རང་བྱུང་གི་སྐྱེ་དངོས་ཉམ་ཆུང་བའི་སྲོག་ཆགས་རྩི་ཤིང་ཡན་ཆད་ལ་
བདག་གིས་རྡོག་རོལ་གཏོང་བ་ལས་བརྩི་བཀུར་ཞུ་མ་ཤེས

ཕ་ཡུལ་ལགས
བདག་གི་ཕ་མེས་ཚོས་ཁྱོད་ཉིད་ཇི་ལྟར་ལོངས་སུ་སྤྱོད
མཛོ་མོ་བཞོ་ནས་ལོངས་སུ་སྤྱོད་པ་ལས་བཤའ་ནས་ལོངས་སུ་མི་སྤྱོད་པ་བུ་ཚ་ང་ཚོ་
དྲན་དྲག་པའི་རྐྱེན་གྱིས་ཡིན་ནམ།

ཕ་ཡུལ་ལགས
བདག་གི་དེ་རིང་ཁྱེད་ཀྱི་དྲུང་ནས་པར་འགའ་བླངས་པ་ལས་གཞན་ཅི་ཡང་དབེན

གསེར་སྙུག