རྨི་ལམ་ལྟ་བུའི
ཟང་ཟིང་གི་འཇིག་རྟེན་འདི་རུ
ཡུལ་གྲུ་གཞན་ཞིག་གི་མཁའ་དབྱིངས་སུ
ལྟད་མོར་ཆས་འདོད་པའི་རིགས་དེ་ང་ཚོ་ཡིན་པ་ཅི་ཁག

སད་པ་མེད་པའི་རྣམ་རྟོག་གི་འདུ་པ་རྒོད་པོས
སུ་ལ་ཡང་དབང་ཆ་མེད་པའི
བཞུད་ཟིན་པའི་ལོ་ཟླ་མཐའ་དག་ལ་འཁང་ར་བྱས

ཀྱེ་མ་ཡ་ང་བའི་རྣམ་རྟོག་གི
གཡུལ་ས་འདི་རུ
ཡབ་མེས་ཀྱི་སྣང་ཚུལ་ཙམ་སྟེ
དགོད་བྲོ་བའི་ར་བ་ལས་སོན་པའི་སྐལ་བ་སྐན་ནོ་ཅི་ཞིག་རེད།
2022.11.14.[月亮]

सर्वदृष्टिप्रहाणाय
གང་གིས་ཐུགས་བརྩེ་ཉེར་བཟུང་ནས།།
यःसद्धर्ममदेशयत्
ལྟ་བ་ཐམས་ཅད་སྤང་བའི་ཕྱིར།།
अनुकम्पामुपादाय
དམ་པའི་ཆོས་ནི་སྟོན་མཛད་པ།།
तंनमस्यामिगौतमम्।
གོ་ཏམ་དེ་ལ་ཕྱག་འཚལ་ལོ།།

རང་ཉིད་ཀྱི་རྣམ་རྟོག་ཆོ་མེད་པ་རྣམས་དང་མ་མཐུན་ན།
རེད་མི་ཟེར་བའི་རི་གྲོང་གི་བྱིས་པ་སྣབས་ལུག་ཚོས།
ཁྱོད་ཀྱི་སྤྲོས་ཞིག་སྟོང་པ་ཆེན་པོའི་འཇིག་རྟེན་ནས།
སྐབས་བསྟུན་ཐབས་མཁས་ཀྱི་མཛད་པ་ངོ་མཚར་བ་དག
མི་སྲིད་པའི་སྐྱག་རྫུན་གྱི་ཁུག་མར་བཙན་གྱིས་རྫོང་།

སྟོང་ལོ་གཉིས་ལྷག་གོང་གི་མི་ཚོས།
མངོན་སུམ་གྱི་སྤྱོད་ཡུལ་དུ་གྱུར་པའི་ཁྱོད་ཀྱི།
དབུ་ཡི་གཙུག་ཏོར་དང་ཞབས་ཀྱི་འཁོར་ལོ་སོགས།
སུམ་ཅུ་རྩ་གསུམ་དུ་བྱོན་པ་དང་མི་ཡུལ་ལ་བབས་པ་སོགས།
ད་ལྟའི་ཆུ་བུར་མིག་ལ་མངོན་ཐབས་མེད་པས།
འགྲེལ་ལོག་གི་བྱེ་མའི་ཁང་བུ་སྣ་ཚོགས་རྩིག

ཁྱོད་ཀྱི་རྡུལ་དག་མེ་ལོང་གི་མཁྱེན་པའི་ངོགས་སུ།
ས་ལེར་མངོན་པའི་ཆོས་རྣམས་ཀྱི་རང་བཞིན་ཏེ།
རྟེན་ཅིང་འབྲེལ་འབྱུང་དང་སྟོང་ཞིང་བདག་མེད།
གཞན་ཡང་ས་དང་ལམ་གྱི་རྣམ་བཞག
དག་དང་མ་དག་གི་ཞིང་འཇིག་སོགས།
དུས་མཐའི་ཤེད་བུའི་བློ་གྲོས་ཀྱི་ཁབ་མིག་ཆུང་ངུར་ཤོང་ཐབས་མེད་པས།
གྱ་ཚོམ་དུ་མི་དགེ་བའི་ས་བོན་མང་པོ་འདེབས།

——གངས་མགྲོན།