སྒོར་མོ་ཡོད་ན་ཚོད་ཚད་འཛོམས་སོང་བ་དང་། སྒོར་མོ་མེད་ན་ཡོད་ཚད་ཤོར་བ་ཨེ་ཡིན་ན།
ཁ་གསོ་རྒྱབ་འགེབས་ཆེད་དུ་སྒོར་མོ་འཚོལ་དགོས་ལ། ལྷག་ཏུ་བཟའ་མིའི་འཚོ་ཚིས་དོན་དུ་སྒོར་མོ་འཚོལ་ལོས་དགོས། དཀའ་སྤྱད་དང་སྡུག་རུས་མྱོང་མི་དགོས་པར་གྲོག་གནམ་ལྷུང་གིས་སྒོར་མོ་རྙེད་མི་ཡོང་བ་ཡང་བདེན། ཁ་གསོ་རྒྱབ་འགེབས་ཆེད་དུ་ཐབས་སྣ་ཚོགས་སྒོས་སྒོར་མོ་བཙལ་ན་ཡང་གནས་ལུགས་དང་མཐུན། རེད་དེ། སྒོར་མོ་ལས་བསམ་རྒྱུ་དྲན་རྒྱུ་ཅི་ཡང་མེད་ན་དེ་ནི་གནད་དོན་ཞིག་ཡིན། སྒོར་མོའི་དོན་དུ་ངོ་ཚ་དང་ཁྲེལ་མེད་ལ་ཞུགས། གཡོ་སྒྱུ་སྣ་ཚོགས་ལ་འབད། དྲང་སྤྱོད་དང་ཡིད་ཆེས། མགོ་རྣ་དང་རྩིས་ཐང་ཚང་མར་རྡོག་བརྫིས་བྱས་ཏེ། འུར་འུར་ཟིང་ཟིང་གིས་གནས་སྐབས་རེར་སྒོར་རྡོག་ཏོག་ཙམ་རྙེད་དུ་བཅུག་ཀྱང་། དོན་དུ་བཟང་སྤྱོད་ཀྱི་གོན་པ་རལ་ཏེ་གཅེར་བུར་ཁྱོད་རང་སྨྱོན་པའི་ལམ་དུ་ཞུགས་པ་ལས་ཅི་ཡང་མིན།
ཁྱོད་ལ་བསྟོད་འུར་འཐེན་མཁན་ཚང་མ་ཡང་ཤེས་རྨོངས་པ་དང་འདང་རྒྱག་ཅི་ཡང་མི་ཤེས་པའི་སྐབས་འཚོལ་བ་རྐྱང་རྐྱང་ཡིན། དམ་པ་རྣམས་ཀྱིས་རང་དང་བུ་རབས་ཚ་རྒྱུད་ཀྱི་མཚན་སྙན་སྲོག་དང་བསྡོས་ཏེ་སྲུང་ལ། མགོ་གཡོག་མགོ་སྐོར་དང་གཡོ་སྒྱུ་ཁྲམ་གསུམ་གྱིས་འཚོ་ཚིས་ཤིག་རྙེད་པ་ལས་དབུལ་པོར་གྱུར་ཏེ་མུ་གེས་ཤི་ན་དགའ་གསུང་སྲོལ་ཡོད། དེ་ཙམ་མ་ནུས་ཀྱང་བཟང་སྤྱོད་དང་མ་འགལ་བ། རང་དང་རང་གི་བུ་རབས་ཚ་རྒྱུད་ཀྱི་མཚན་སྙན་ལ་མི་གནོད་པའི་འཚོ་བ་ཞིག་རོལ་ན་བཟང་། རྒྱུ་ནོར་ལ་ཧམ་པ་ཆེ་དྲགས་ན་མཇུག་འབྲས་རང་གི་མི་གཞི་དང་བདེ་ཐང་ཁྱིམ་མིའི་མཚན་སྙན་དང་ཕ་མའི་མགོ་རྣ་ཡོངས་རྫོགས་བརླག་རྒྱུ་དེའོ།།

སྙན་པའི་གྲགས་པ་ཐོབ་དགོས་པ་ལས་ངན་པའི་གྲགས་པ་ཐོབ་རུང་མཚར་རྒྱུ་མེད། ལུགས་དང་མཐུན་པའི་རྒྱུ་ནོར་འཚོལ་དགོས་པ་ལས་ལུགས་དང་འགལ་བའི་རྒྱུ་ནོར་ཐོབ་པ་ལ་དགེ་མཚན་ཅི་ཡང་མེད། སྡིག་མེད་ཆོས་དང་མཐུན་པའི་ཁ་ཟས་འཚོལ་དགོས་ན་དཀའ་ཡང་། མི་ཞིག་གི་མ་གཞིའི་ཚད་གཞི་ཡ་རབས་བཟང་སྤྱོད་དང་མཐུན་པའི་ཁ་ཟས་ཤིག་འཚོལ་རྒྱུ་གལ་ལོ། །འཇིག་རྟེན་མ་རབས་ཀྱིས་གང་ཡང་། རང་ཉིད་ཡ་རབས་ཀྱི་སྤྱོད་པར་འཇུག་ཅི་ཐུབ་བྱེད་དགོས་པ་ལས། འཇིག་རྟེན་མ་རབས་ཀྱིས་གང་དུས་རང་ཉིད་ཀྱང་མ་རབས་ནང་དུ་ཞུགས་པ་ནི་ལུགས་མ་ཡིན་ནོ།།

མིག་རྒྱང་ཐུང་ཞིང་བསམ་བློ་ནར་མ་སོན་པ་ཚོས། ཚང་མས་དེ་འདྲ་བྱེད་ཀྱིན་འདུག། ཁྱོད་ཀྱིས་ཀྱང་དེ་འདྲ་བྱེད་དགོས་རེད། དེ་འདྲ་བྱེད་ཐུབ་ན་བཟང་རབས་རྒྱན་རབས་ཀྱིས་སྐུལ་སློང་བྱེད་ཀྱིན་འདུག་པ་མཐོང་ཐོས་འདུག་མོད། དེ་ནི་གཡང་གཟར་ནས་གཡང་གཟར་དུ་འཁྲིད་བྱེད་ཀྱི་དམུས་ལོང་གི་སྐད་ཆ་ལས་ཡང་དག་པའི་ལམ་སྟོན་དུ་བཟུང་མི་རུང་ངོ་། །
རྒྱུ་ནོར་གལ་ལོས་ཆེ་སྟེ། མི་ཞིག་ལ་མཚོན་ན། དེ་ལས་ཀྱང་གལ་ཆེ་བ་ངོ་ཚ་ཁྲེལ་ཡོད། རྒྱུ་འབྲས་དྲང་བཞག་གི་བཟང་པོའི་སྤྱོད་པ་ཞིག་བརྩི་སྲུང་བྱེད་རྒྱུ་ཡོད་པ་ཤེས་དགོས། ལྟོ་ཟས་ཙམ་ལས་བསམ་རྒྱུ་དྲན་རྒྱུ་མེད་དུས། སྤུ་མེད་པ་ཡི་ཕག་པ་ལས་ཡར་མ་འཕགས་པའི་རྟགས་ཡིན། སྒོར་མོ་ཅན་ལ་ངོ་སོ་མཐོ་བ་དང་སྒུལ་ཤུགས་ཆེ་བ་བདེན་མོད། དེ་ནི་ཟོག་པོ་མི་ཡིས་ལྟ་སྟངས་ཙམ་ཡིན། མཚན་སྙན་ཅན་གྱི་ཕྱུག་བདག་ཚང་མ་ཡང་ཡ་རབས་བཟང་སྤྱོད་དང་མི་འགལ་བའི་ཐོག་ནས་ཡོང་བ་ལས། གཡོ་སྒྱུ་ཁྲམ་གསུམ་གྱི་ལམ་ནས་འོང་བ་མིན། ང་ཚོས་ཚོང་དང་ཁེ་ལས་ཅི་བསྒྲུབ་དགོས་ནའང་། གཡོ་སྒྱུ་ཁྲམ་གསུམ་ཞིག་དགོས་སྣང་ཤར་འདུག་པ་ནི། བསམ་བློ་མ་སྨིན་པའི་སྐྱོན་ཡིན།

དེས་ན་ཚང་མ་དུས་རབས་མཐུན་པ་བརྡ་འཕྲིན་དང་མཐུན་པར་བསྐྱོད་ཐུབ་ན་ལོས་མཚར་ཏེ། བཟང་པོ་དོར་ཞིང་ངན་པ་བསྡུས་ཏེ་ལམ་དུ་ཞུགས་ན་ཁེ་ཉེན་གང་གིས་ཆེ་བསམ་དགོས་པའི་ཚོད་རེད།

འཛི་གུར་ཀུམ་གྱིས།

སིངྒ་གླིང་ལ། མཁས་དབང་དགེ་ཆོས་ས་ཆ་འདིར་ལོ་གཅིག་དང་ཞག་མ་ཁ་ཤས་མ་ཚང་བའི་ཟླ་བ་བཞི་བསྡད། དེའི་རིང་ལ་ལྭ་བ་གཡང་ལུགས་ཤིག་གྱོན་ཏེ་རྒྱུ་འགྲུལ་ཁོ་ན་བྱས། ཕལ་ཆེར་གླིང་གང་པོ་བསྐོར་ཏེ་ལམ་ཡིག་བྲིས།

སིངྒ་ལའི་དགེ་སློང་དང་། ལྷ་ཁང་དང་། མཆོད་རྟེན་དང་། རི་མ་ལ་ཡ། སངས་རྒྱས་ཀྱི་ཞབས་རྗེས། སངས་རྒྱས་ཀྱི་ཚེམས། དེ་དང་དེ་དག་མང་དུ་བཤད་དེ་མིག་ལམ་དུ་ཁྲ་ལམ་ལམ་གྱིས་ཤར་ཡོང་བ་ཞིག་བཟོས་ཡོད།

རྒྱ་སྐད་དུ།

सिड्गल ལངྐ་།
བོད་སྐད་དུ།

སིངྒ་ལ།

སིང་གྷ་ལ།

སིང་རྒ་ལ།
དབྱིན་སྐད་དུ།

Sri Lanka
རྒྱ་ནག་སྐད་དུ། 斯里兰卡

མེ་སོན་གྱིས།

འཇིག་རྟེན་སྟེང་གི་ཆེས་མཚར་སྡུག་ལྡན་པའམ་
རང་འདོད་ཡིད་བྱེད་དང་བྲེལ་བའི་བརྩེ་བ་ནི་བྱང་ཆུབ་ཀྱི་སེམས་ཡིན།
དེ་ནི་ས་ལྒང་འདིར་མིའི་ལོ་རྒྱུས་ཡོད་པ་ནས་བཟུང
ཆེས་གཟི་བརྗིད་ལྡན་པའི་བསམ་བློ་དང་དུངས་སེམས་དེ་ཡིན་ནོ།།

མཁན་ཆེན་དམ་པ་ཚུལ་ཁྲིམས་བློ་གྲོས་ཀྱིས།