ཕ་སྐད་དྭངས་བསིལ་རྫ་ཆབ་སྔོན་མོ་ཡིན། །
མ་ཡིག་རིན་བྲལ་མུན་འཇོམས་སྒྲོན་མེ་ཡིན། །
བརྡ་དང་ཐ་སྙད་སྐད་དང་ཡི་གེ་དག །
ང་ཚོའི་སྲོག་རྩ་ཡིན་ནོ་མིང་སྲིང་ཚོ། །

དགེ་འདུན་ཆོས་འཕེལ་གྱིས།

གོམས་གཅིག་འདོར་ཡང་བདེ་བ་འཚོལ་ཕྱིར་ཏེ།།
ཚིག་གཅིག་སྨྲ་ཡང་བདེ་བ་འཚོལ་ཕྱིར་སྨྲ།།
དགེ་བའི་ལས་ཀྱང་བདེ་བའི་སླད་དུ་བྱེད།།
སྡིག་པའི་ལས་ཀྱང་བདེ་བའི་སླད་དུ་བྱེད།།

རྗེ་ལམ་རིམ་པའི་ལམ་རིམ་ཟིན་བྲིས་མཁས་པའི་ཡིད་འཕྲོག་ལས།
ལམ་རིམ་གྱི་དོན་བསྡུས་ན། བསྒོམ་པ་བརྒྱད། ལག་ལེན་གསུམ། ལྡོག་འཇུག་གསུམ་དུ་འདུ་བར་གསུངས་ཏེ། 
དེ་ལ་བསྒོམ་པ་བརྒྱད་ནི། ཆུང་ངུའི་སྐབས་སུ་དལ་འབྱོར་དོན་ཆེ་རྙེད་དཀའ། འཆི་བ་མི་རྟག་པ། ངན་སོང་གི་སྡུག་བསྔལ། དཀར་ནག་གི་ལས་འབྲས་བསྒོམ། 
འབྲིང་གི་སྐབས་སུ་འཁོར་བའི་ཉེས་དམིགས་དང་། ཐར་པའི་ཕན་ཡོན་བསྒོམ། 
ཆེན་པོའ་ིསྐབས་སུ་ཀུན་རྫོབ་བྱང་ཆུབ་ཀྱི་སེམས་དང་། དོན་དམ་པའི་བྱང་ཆུབ་ཀྱི་སེམས་བསྒོམ་པའོ། །
ལག་ལེན་གསུམ་ནི། ཆུང་ངུའི་སྐབས་སུ་དཀོན་མཆོག་ལ་སྐྱབས་སུ་སོང་ནས་ལས་འབྲས་ཀྱི་བླང་དོར་ལ་འབད། འབྲིང་གི་སྐབས་སུ་ཐར་པ་ལ་དོན་གཉེར་བསྐྱེད་ནས་ཐར་ལམ་ཚང་ལ་མ་ནོར་བ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་ལ་སློབ། ཆེན་པོའ་ིསྐབས་སུ་བྱང་ཆུབ་ཏུ་སེམས་བསྐྱེད་ནས་སྦྱིན་སོགས་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞི་ལ་སློབ་པའོ། །
ལྡོག་འཇུག་གསུམ་ནི། ཆུང་ངུའི་སྐབས་སུ་ཚེ་འདི་ལ་ཞེན་པ་ལོག་ནས་ཚེ་ཕྱི་མའི་དོན་ལ་འཇུག །འབྲིང་གི་སྐབས་སུ་འཁོར་བ་ལ་ཞེན་པ་ལོག་ནས་ཞི་བ་མྱང་འདས་ཀྱི་དོན་ལ་འཇུག །ཆེན་པོའ་ིསྐབས་སུ་རང་དོན་ལ་ཞེན་པ་ལོག་ནས་གཞན་སེམས་ཅན་ཐམས་ཅད་ཀྱི་དོན་ལ་འཇུག་པའོ།། །། https://t.cn/A6tuHKd0