གནམ་གྱི་མཐའ་རུ་ཡལ་བའི་སྤྲིན་པ་གན། །
ཐག་རིང་གཞན་ཡུལ་འགྲིམ་པའི་ཕུ་ནུ་རེད། །
ཞེན་ཆགས་ཆུ་ཡི་ལྗིད་ཀྱིས་མནན་ཡང་རུང་། །
ལས་ཀྱིས་རླུང་བུས་ཅིས་ཀྱང་ས་མཐར་འདེད། །
གཡུ་ཡི་མཚོ་མོའི་ངོས་ཀྱི་ངང་བ་གན། །
དུང་དུང་རང་ཡུལ་ལུང་པ་འདི་ལ་དུང་། །
སྒྲོ་ཆེན་ཉིས་ཁྲི་སུམ་སྟོང་བརྐྱངས་ཀྱང་རུང་། །
ལས་ཀྱི་རླུང་བུས་ཅིས་ཀྱང་གཞན་ཡུལ་འདེད། །

ཁྱོད་ཀྱི་ཟླ་བ་ཁྱོད་ཀྱི་མཁའ་ལ་མཛེས། །
ང་ཡི་ཚེས་རིས་ང་ལ་དེ་བཞིན་ནོ། །
གློ་བུར་སྤྲིན་པ་ནག་པོའི་ཕག་ལ་བྲོས། །
སྐྱོ་བའི་མིག་ཆུ་འབྱིན་སྟངས་ཨེ་གཅིག་གམ། །

ཨ་ཐང་ཆད་པའི་སྡོང་ལོ་སེར་པོ་ལ། །
མི་འདོད་སྟོན་གྱི་བཀའ་ཆད་ཕོག་པ་ན། །
སྙིང་སྡུག་རླུང་བུའི་སྐྱེལ་མ་རིང་མི་དགོས། །
སྙིང་གཏམ་ཚིག་གསུམ་བཤད་ལོང་ཡོད་པར་གྱིས། །