ས་སྐྱ་ལེགས་བཤད།

萨迦格言
ས་སྐྱ་པཎྜི་ཏ་ཀུན་དགའ་རྒྱལ་མཚན།
萨迦班智达.贡嘎坚赞
དམ་པ་གཞན་དུ་འགྲོ་ན་ཡང་།།
བསྙེན་བཀུར་བྱས་ཏེ་ཉེ་བར་བཞག།
ནོར་བུ་རིན་ཆེན་རྟག་མཆོད་ན།།
བཀྲ་ཤིས་དཔལ་དང་བསམ་པ་འགྲུབ།།
贤哲即使赴异土，亦受礼遇常随侧。
时常顶礼珍奇宝，便得福瑞送所愿。

སྟོན་མཇུག་རླུང་བུའི་གཟུག་སྒྲ།

_________འགྲུལ་བཞུད་པ།

ཀུན་གསལ་སྒེག་མོའི་ཆུ་འཛིན་འཕྱོར་ལྭའི་གོས།།
ཤམ་བུར་འཕྱང་བའི་འདབ་མ་རླུང་གིས་བསྐྱོད།།
དབྱར་གྱི་དཔལ་མོའི་ལྗང་མདོག་སྲབ་མོའི་གཤམ།།
བསེར་བུས་ཟད་པའི་སྐྱོ་གདུང་སེམས་ལ་འཁྱུད།།

འབྲས་བཟང་ཁུར་གྱིས་དུད་པའི་ལང་ཚོའི་དཔལ།།
ཁད་ཀྱིས་རྫོགས་པ་མི་རྟག་ཆོས་ཀྱི་གཤིས།།
བྱས་བསགས་ལས་ཀྱིས་གནང་བའི་དལ་བའི་རྟེན།།
དུས་བཞིའི་འཕེལ་འགྲིབ་ཀློང་ནས་གང་དུ་སླེབ།།

དལ་ཡམས་ཚ་བཅུན་རླུང་བུས་རི་སུལ་ཀུན།།
མཆེད་པའི་གཟུག་སྒྲས་སྙིང་ཁམས་གས་པ་ལྟར།།
དྲག་པོའི་རླུང་དམར་རྒྱ་སྟག་གཞོན་ནུ་མས།།
མི་བཟད་སྙིང་ལ་དགུན་གྱི་གྲང་ངར་བསྟབས།།

ཞི་གནས་ལྷིང་འཇགས་རོལ་བའི་བསམ་གཏན་ཁང་།།
དཀྲོག་མཁན་གཡེར་ཁའི་དྲིལ་ལས་གཞན་མེད་ཀྱང་།།
དུས་སྙིགས་རླུང་བུའི་ཤུགས་གླུ་མཚན་མོའི་དབྱངས།།
མཐོང་བས་དོན་སྙིང་འབྲས་ཡོས་ལྟར་དུ་བཀས།།

དམར་སེར་གཡུ་ལོ་འཐབ་པའི་ནགས་མའི་ཀླུང་།།
ལུང་རིགས་དབྱངས་ཀྱི་སིལ་སྙན་མཐའ་ལ་ཁྱབ།།
སྟོན་རླུང་དྲག་ཏུ་ལྡང་བའི་གཡོ་བསྐྱོམས་ཀྱིས།།
གསེར་མདོག་ལོ་མའི་མཛེས་སྡུག་ཆུ་ཡིས་ཁྱེར།།

མཁར་ལྡིང་དབང་པོའི་གཤོག་རྩལ་གཡོ་བའི་གར།།
ལྕགས་ཚགས་པྲོག་མའི་གཟེབ་ན་མངོན་དུ་ཆུང་།།
ཐང་ཆེན་ཤུགས་ཀྱིས་གཅོད་པའི་རྟ་རྒོད་ཡང་།།
རྩྭ་མེད་ཆུ་མེད་གཤོང་ན་སྒྲོག་ཏུ་ཚུད།།

ནངས་ནུབ་རླུང་བུ་གཤིན་རྗེ་ཁ་རླངས་ཀྱིས།།
སྲོག་ལ་གཟས་པའི་འབུ་སྲིན་ཕྲ་མའི་ཚོགས།།
དྲོད་སར་སྙེག་པའི་སྒེའུ་ཁང་ཤེལ་གྱི་ངོས།།
རྐང་རྡུལ་རི་མོས་རག་ཁྲའི་འཇའ་ཚོན་བྲིས།།

བསྟར་ལ་རྒྱུས་པའི་ཚང་ཚིང་ལྗོན་པའི་འདབ།།
ལྷ་དབང་རྒྱལ་བོས་གསེར་གྱིས་བྱུགས་པ་བཞིན།།
ཉི་མའི་ཟེར་ལ་འགྲོགས་པའི་འོད་མདངས་ཀྱིས།།
མིག་གི་རྒྱལ་མོའི་སེམས་པ་བརྐུས་ནས་འགྲོ།།

འབྲས་ལྡན་འཛུམ་དཀར་གཡོ་བའི་ན་ཆུང་མ།།
ཚེ་ཡི་ཡུན་ལ་འབྲལ་སེམས་མ་དམིགས་ཀྱང་།།
འབྱུང་པར་ངེས་པའི་གྲང་རེག་ཅན་གྱི་སྟག།
མ་འགྱངས་མཆེ་བ་གཙིགས་ནས་བསླེབ་རན་ཡོད།།

རིན་ཆེན་སྲོག་གི་སྲད་བུ་ཕྲ་མོའི་རྐྱ།།
འཆི་བདག་རལ་གྲིའི་དབལ་ལ་རིང་གྱུར་ན།།
འབྱུང་འགྱུར་སྟོན་མཚན་ཟླ་བའི་འོད་ངོགས་སུ།།
འཛོམ་པའི་བསྐལ་བཟང་ལས་ཀྱི་བུ་ལ་བཅོལ།།

______ ༢༠༢༢ / ༡༠/ ༢ ཉིན།

མི་རིགས་དང་རྒྱབ་ཁབ་གང་ཡིན་ཡང་མི་རིགས་སོ་སོའི་བསམ་བློའི་འདུ་ཤེས་འཛིན་སྟངས་མི་འདྲ་བ་དང་། འཚོ་བའི་གོམས་གཤིས་མི་འདྲ་བའི་ཐོག་ནས་བྱུང་བའི་སྒྱུ་རྩལ་འཁྲབ་སྟོན་གྱི་རྣམ་གྲངས་ཀྱང་ཧ་ཅང་མང་པོ་ཡོད།སྤྱིར་གླུ་གཞས་ཟློས་གར་འཁྲབ་སྟོན་ནི་རྐང་ལག་སོགས་གཟུགས་པོའི་རྣམ་འགྱུར་ཙམ་མ་ཡིན་པར། དེ་ལ་བརྟེན་ནས་མི་རིགས་དེའི་སེམས་ཁམས་སམ་བསམ་བློ་མཚོན་ཐུབ་ལ། བོད་པ་རང་ཉིད་ཀྱི་ནང་ནས་ཀྱང་ལུང་ཚན་སོ་སོའི་གོམས་གཤིས་མི་འདྲ་བའི་རྒྱུ་མཚན་ལ་བརྟེན་ནས་གླུ་གཞས་ཟློས་གར་འཁྲབ་སྟོན་སྐབས་མི་འདྲ་བ་མང་པོ་ཡོད།དེ་ལ་བརྟེན་ནས་མི་རིགས་དང་ས་གནས་ལུང་ཚན་རེ་རེ་ཀྱི་ཐུན་མོང་མ་ཡིན་པའི་ཁྱད་ཆོས་ཀྱི་སྒྱུ་རྩལ་གར་སྟེགས་ཅིག་མངོན་ཐུབ་པ་འདྲ།མདོར་ན་བོད་ཀྱིས་གླུ་གཞས་ཟློས་གར་རིག་གནས་སྒྱུ་རྩལ་མི་ཉམས་གོང་འཕེལ་གྱི་ཆེད་དུ་ཤུགས་རྒྱག་མ་ཐུབ་ན། མ་འོངས་པར་གཞན་གྱི་རིག་གནས་ཤུགས་རྐྱེན་དང་གཞན་དབང་རིང་ལུགས་ལ་བརྟེན་ནས་བོད་པའི་རིག་གཞུང་གི་ངོ་བོ་བསྒྱུར་དང་འགྱུར་བཞིན་ཡོད་པ་དང་།མི་འབོར་ཧ་ཅང་ཉུང་བ་དེ་ཡང་ཉིན་རེ་ནས་ཉིན་རེ་བཞིན་ཤར་ནུབ་ཀྱི་ཡུལ་གྲུ་མང་པོ་ཞིག་ལ་ཁ་འཐོར་དགུ་འཐོར་དུ་འགྱུར་བཞིན་ཡོད་པས། མྱུར་སྐྱོབ་ཀྱི་ཐབས་ལམ་ཞིག་བསྟེན་མ་ཐུབ་ན། མ་འོངས་པར་བོད་མི་རིགས་ཀྱི་ཐུན་མོང་མ་ཡིན་པའི་ངོ་བོ་མཚོན་པའི་སྒྱུ་རྩལ་འཁྲབ་སྟོན་གྱི་རིག་གནས་འདི་ཉིད་གོ་ལ་ཧྲིལ་པོ་འདིའི་སྟེང་ནས་བརླག་རྒྱུ་ཉག་གཅིག་ཏུ་གྱུར་ཡོད། དེང་དུས་ཀྱི་ན་གཞོན་མང་པོ་ཞིག་གཞས་དང་ཞབས་བྲོ་ལ་དགའ་ཞེན་སླེབས་ཐབས་དང་། དེ་ཡང་བོད་ཀྱི་ཡུལ་ལུང་བྱེ་བྲག་པ་འབའ་ཞིག་ཙམ་མ་ཡིན་པར། བོད་ས་སྟོད་སྨད་བར་གསུམ་གྱི་གླུ་གཞས་དང་། འཁྲབ་སྟོན་གྱི་བྱེ་བྲག་མང་པོ་ཞིག་ལ་ཞིབ་འཇུག་དང་རྒྱུན་འཛིན་ཡོང་ཐབས་བྱེད་དགོས་པ་དེ་ཁ་ཚ་དགོས་གཏུག་གི་འགན་འཁྲི་ཉག་གཅིག་ཏུ་གྱུར་ཡོད། མི་རབས་རྒན་པའི་སྒྱུ་རྩལ་གྱི་ལས་ཀ་བྱེད་ཕྱོགས་དང་ཐུན་མོང་མ་ཡིན་པའི་ཕུལ་བྱུང་གི་སྒྱུ་རྩལ་པ་ལ་ཉམས་ཞིབ་དང་ལོ་རྒྱུས་ལ་ཞིབ་འཇུག་བྱ་དགོས།།