༢༠༡༨ལོའི་བསེ་དགོན་གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་ངམ་མདོ་སྔགས་ཐོས་བསམ་གླིང་གི་གྲྭ་མང་འདུས་སྡེའི་གཟི་འོད། 2018年赛格寺雪域无偏高级佛学院僧众们殊胜庄严的圣容

༄༅།།གཙང་པའི་ལོ་གསར་གྱི་མཐོང་ཐོས།།

འཁོར་འདས་ཆོས་ཀྱི་གནད་གསང་མ་ལུས་པ།།

ཡེ་ཤེས་ཟེར་གྱི་རྡུལ་ཆ་ཕྲ་མོས་ཀྱང་།།

གསལ་བར་སྟོན་མཛད་མཛའ་བའི་གཉེན་གཅིག་པུ།།

དམ་པའི་མགོན་ལ་ནམ་ཡང་གུས་ཕྱག་འཚལ།།

གང་ཞིག་སྲོག་གི་རྒྱུན་ཐག་མ་ཆོད་བར།།

ཚོར་འདུའི་འཇུག་པ་རྒྱུན་མར་འབྱུང་བས་ན།།

འདོད་དང་མི་འདོད་ཡི་ཁ་གཤིས་ལ་གྲུབ།།

ལོ་ཟླའི་གྲངས་བྱ་བརྩེགས་པའི་ཁ་བའི་རིར།།

སྣ་ཚོགས་ཁ་བ་ཆེ་མ་ཆུང་གསུམ་གྱིས།།

འདྲ་མིན་བང་རིམ་མཆོད་རྟེན་བརྩེགས་པ་བཞིན།།

མཐོ་སྒང་གོ་ལའི་རྩེ་མོར་འགྱིང་ནས་འདུག།

ལོ་རྒྱུས་པིར་གྱིས་ཁྱུག་པའི་མཛེས་ལྗོངས་ནང་།།

གང་འདོད་རྩེད་འཇོའི་སྒྱུ་རྩལ་ངོམ་པ་བཞིན།།

གཙང་ལྗོངས་སོ་ནམ་ལོ་གསར་ཚེས་པར་ཡང་།།

ཉེ་དུ་མཛའ་བའི་དགའ་སྟོན་རྟེན་འབྲེལ་ཟབ།།

དགུ་གསུམ་འགྲིམ་པའི་ཉི་ཤུ་དགུ་ཡི་ཉིན།།

ལྷ་ལྡན་གྲོང་ནས་གཙང་ཕྱོགས་གཡས་རུར་བཞུད།།

སྣུམ་ལམ་སྟེང་དུ་སྣ་མང་རླང་འཁོར་གྱིས།།

སྟར་འགྲིག་མྱུར་མོའི་འགྲོས་ཀྱིས་འགྲན་པར་བྱེད།།

ཕྱོགས་སུ་གྲམ་པའི་སྣག་གི་གཉེན་མཚམས་ཀྱི།།

བཞིན་ལས་སྤྲོ་བའི་ཉམས་སྣང་ཐོན་བཞིན་དུ།།

ཤིས་པའི་ཚིག་གིས་ལོ་གསར་བསུ་མ་བྱེད།།

ཉིན་བྱེད་ཆུ་ལྷའི་ཕང་བར་གཟིམ་པ་ཡིས།།

མུན་པའི་གོས་ཀྱིས་ས་གཞི་གཡོགས་པའི་ཚེ།།

ཤོག་སྦག་གད་སྒྲའི་ཁྲོད་ནས་འོད་ཕྲོ་བར།།

ཡིད་ཚིམ་དགའ་བའི་མདོང་ལ་ཕངས་སྣང་བྲལ།།

དེ་ཚེ་རོ་བཅུད་ལྡན་པའི་དགུ་ཐུག་ལས།།

མི་གཤིས་མཚོན་པའི་དགུ་རྫས་ཐོན་པ་ཡིས།།

བཟང་ན་ངོམ་དང་ངན་ན་དམའ་འབེབས་ཤིང་།།

གཞན་གྱིས་ཐིག་མིན་བརྩོད་སོགས་འཁྲུག་བྱ་དོད།།

གནམ་གང་ཉིན་དེར་བཟའ་བཅའ་སྒྲིག་པ་སོགས།།

མཁོ་རྒུའི་འདོད་ཡོན་ཚགས་སུ་ཚུད་པ་ལ།།

ལྷོད་མེད་སྟ་གོན་ལས་ཀྱི་འདུ་འགོད་དེས།།

ལུས་ཀྱི་ངལ་བ་སེམས་ཀྱི་རྒྱན་དུ་བྱེད།།

ལོ་འགོ་ཚེས་པའི་སྟག་གི་དུས་མཚམས་ལ།།

ཆུ་ཕུད་ལེན་ཞིང་ཤིང་ཕུད་འཐུ་ཞོར་དུ།།

རོ་བཅུད་ལྡན་པའི་ཆང་བསྐོལ་འཐུང་བཞིན་པར།།

བཀྲ་ཤིས་ཚིག་གིས་བཤིས་པ་བརྗོད་པར་བྱེད།།

སྦྲུལ་གྱི་དུས་ལ་ཡིད་བཟང་གྲོ་ཐུག་དང་།།

ལུག་མགོའི་སྟོན་མོས་རྟེན་འབྲེལ་འགོ་ནས་སྒྲིག།

དེ་ཉིན་བཟང་པོའི་ཚིག་གི་འདའ་བ་ལས།།

ངན་པའམ་མི་ལེགས་ཚིག་ལ་འཛེམ་པར་བྱེད།།

དེ་ནས་རྩེད་མོའི་རྣམ་གྲངས་འགར་འཇུག་ཅིང་།།

གྲེ་འགྱུར་ངག་གི་སྒོ་མོ་ཕྱེ་བ་ན།།

དགའ་བའི་རྩེད་སྒྲ་དར་དིར་སྒྲོག་པ་དང་།།

ལྷང་ལྷང་གྱེར་བའི་དབྱངས་ཀྱིས་ལོ་གསར་རོལ།།

ཁང་གསར་བཀོད་པས་ཕྱུག་པའི་གློག་སྒྲོན་འོག།

གཡོས་སྦྱོར་ཟབ་པའི་བཟའ་བཏུང་ཕུན་སུམ་ཚོགས།།

གྲོང་གསེབ་སྐྱེ་བོའི་ཟོལ་མེད་རྣམ་འགྱུར་ཁྲོད།།

སྲོལ་རྒྱུན་རྣམ་ཐར་འགྱུར་བས་དེ་བས་སྤྲོ།།

ཁ་བའི་ངར་གྱི་གྲང་ངད་ཆེ་ན་ཡང་།།

དུ་ཞག་འཁྱིལ་བའི་གྲོང་ཚོར་དྲོད་སྣང་འབར།།

རི་མགོའི་སྟེང་ནས་ལྷ་གསོལ་ཀི་སྒྲ་སྒྲོག།

རི་རླུང་ཆུ་རླུང་འདུ་འགོད་དེ་བས་བྲེལ།།

རྒྱུན་སྲོལ་ལྷ་མོའི་གར་སྟབས་འགྱུར་བ་ཡིས།།

མི་རྣམས་ལྟད་མོའི་རེ་བའང་དེ་ལ་ཕྱོགས།།

སྐྱེལ་མའི་ཁ་བཏགས་མགྲོན་གྱི་མགུལ་བར་སྒྲོན།།

དུ་ཞག་འཁྲིགས་པའི་གྲོང་སྡེའང་འགུལ་མེད་གནས།།

༢༠༡༨/༡༢/༦/ཉིན།

དོ་ནུབ་ང་ཡི་དམར་ཆུང་སྙིང་དབུས་སུ།།

ཁྱེད་ཉིད་མེ་ཏོག་བཞིན་དུ་རབ་ཏུ་བཀྲག།

དོ་ནུབ་ང་ཡི་ཡིད་ཀྱི་མེ་ལོང་ངོས།།

ཁྱེད་ཉིད་ཟླ་འོད་བཞིན་དུ་གསལ་བོར་འཚེར།།

དོ་ནུབ་ང་ཡི་སྙིང་གི་སྒོའུ་ཁུང་འགྲམ།།

ཁྱོད་རང་ཁ་བ་བཞིན་དུ་སིམ་སིམ་བབས།།

དོ་ནུབ་ང་ཡི་སེམས་ཀྱི་ཡུལ་ངོས་ན།།

ཁྱེད་ཀྱི་མཛེས་འཛུམ་ལྷང་ངེ་ལྷེམ་མར་གསལ།།

༢༠༡༨/༡༠/༡༤སྲོག