༄༅།།མི་ཕམ་མདུན་ས་ཡིད་འཕྲོག་དགའ་ལྡན་ཞིང་།།དུས་ཀྱི་དབང་གིས་ས་ལ་འཕོས་པ་ལྟར།།བསྔགས་པར་འོས་པ་སྤྲུལ་པའི་སྐུ་འབུམ་ཞེས།།གྲགས་པའི་བ་དན་གཡོ་བ་ཨེ་མའོ་མཚར།།—ཀུན་མཁྱེན་འཇིགས་མེད་དབང་པོས།(༡༧༢༨ནས༡༧༩༡) https://t.cn/RhBZ82l

དེ་རིང་གཙང་བཀྲ་ཤིས་ལྷུན་པོ་ལ་མཇལ་དུ་སོང་བ་ཡིན། དེ་ནི་དབུས་གཙང་དུ་ཡོད་པའི་དགེ་ལུགས་པའི་གདན་ས་ཆེན་པོ་བཞིའི་ཡ་གྱལ་ཡིན་པ་དང་།

གཞིས་ཀ་རྩེའི་གྲོང་ཁྱེར་དང་འདབས་འབྲེལ་ལྟ་བུར་ཡོད། རབ་བྱུང་བརྒྱད་པའི་མེ་ཡོས་ ༡༤༤༧ལོར་ ཏཱ་ལའི་བླ་མ་སྐུ་ཕྲེང་དང་བོ་རྗེ་དགེ་འདུན་གྲུབ་ཀྱིས་ཐོག་མར་ཕྱག་བཏབ། དགོན་མིང་ཆ་ཚང་ལ་བཀྲ་ཤིས་ལྷུན་པོ་དཔལ་གྱི་སྡེ་ཆེན་ཕྱོགས་ལས་རྣམ་པར་རྒྱལ་བའི་གླིང་ཞེས་ཟེར།

རྟེན་གཙོ་ཐུབ་དབང་བདུད་འདུལ་མའི་སྐུ་བརྙན་སོགས་སྐུ་གསུང་ཐུགས་རྟེན་གྲངས་ལས་འདས་པ་གསར་བཞེངས་ཐོག

ཆོས་འཆད་ཉན་ལ་རབ་ཏུ་གཞོལ་བས་ཐོག་མར་མཁས་པའི་དབང་བོ་བཅུ་ཕྲག་གསུམ་ཙམ་དང་དགེ་འདུན་པ་བརྒྱ་དང་བཅུ་ཕྲག་འགའ་ལས་མེད་ཀྱང་ཁོང་གི་སྐུ་ཚེ་སྨད་ལ་དགེ་འདུན་པ་ཆིག་སྟོང་དྲུག་བརྒྱ་ཙམ་མམ་སུམ་སྟོང་ཙམ་འཕེལ་མྱོང་ཡོད་ལ་རྗེས་སུ་དེ་ལས་མང་བོ་འཕེལ་ཡོད་ཀྱང་གསལ་བོར་མ་ཤེས། དགོན་པ་བཏབ་ནས་ལོ་ཉི་ཤུ་རྩ་བརྒྱད་ཀྱི་བར་བསྟན་པའི་བདག་པོ་མཛད་དེ་འཆད་ཉན་ནམ་ཡང་ཆག་པ་མེད་པར་གནང༌། པཎ་ཆེན་དགེ་འདུན་གྲུབ་པ་ཞེས་མཚན་སྙན་གྱིས་ཡོངས་སུ་ཁྱབ་ཅིང་། དེ་ནས་བཟུང་བཀྲ་ཤིས་ལྷུན་པོའི་གདན་ས་སུས་མཛད་ལ་པཎ་ཆེན་ཞེས་པའི་མཚན་སྙན་གྲགས་ཁྱབ་རྡལ་དུ་སོང་། པཎ་ཆེན་སྐུ་ཕྲེང་བཞི་བ་བློ་བཟང་ཆོས་ཀྱི་རྒྱལ་མཚན་དགུང་ལོ་སོ་གཅིག་པ་རབ་བྱུང་བཅུ་བའི་ལྕགས་གླང༡༦༠༡ ལོར་བཀྲ་ཤིས་ལྷུན་པོའི་མཁན་པོ་མཛད་པ་ནས་བཟུང་དགོན་པ་འདི་པཎ་ཆེན་སྐུ་ཕྲེང་རིམ་བྱོན་གྱི་གདན་ས་ལྟ་བུར་ཆགས་ཡོད་པ་རེད། ད་ལྟ་དགོན་པ་འདིར་རྗེ་དགེ་འདུན་གྲུབ་ཀྱི་ཞབས་རྗེས་དང་སྟོན་པ་དང་རྗེ་ཡབ་སྲས་ལ་སོགས་པའི་སྐུ་བརྙན་མང་བོ་བཞུགས་སུ་གསོལ་བ་དང་།

པཎ་ཆེན་སྐུ་ཕྲེང་བཞི་བ་བློ་བཟང་ཆོས་རྒྱན་གྱི་སྐུ་དམར་གདུང་ཆ་ཚང་དང་པཎ་ཆེན་སྐུ་ཕྲེང་ལྔ་བ་ནས་དགུ་བའི་བར་གྱི་གདུང་རྟེན་གྱི་ཆ་ཤས་དང་རིང་བསྲེལ་སོགས་རྟེན་སྣ་མང་བོ་གཅིག་ཏུ་བསྡུས་པའི་གདུང་རྟེན་དང་ཆོས་སྲིད་གཉིས་ལ་བཀའ་དྲིན་བླ་ལྷག་ཆེ་བའི་པཎ་ཆེན་བཅུ་བ་ཆེན་པོའི་སྐུ་དམར་གདུང་བཅས་མཆོད་རྟེན་ཆེན་པོ་གསུམ་བཞུགས་པ་དེ་དག་གི་རྒྱུ་ཆ་གསེར་དངུལ་ཟངས་ལྕགས་དང་གཡུ་བྱུར་སོགས་རིན་པོ་ཆེ་རྩ་ཆེན་ལས་གྲུབ་པའི་གདུང་རྟེན་ཡིན། ༧པཎ་ཆེན་བཅུ་བ་མཆོག་གི་སྐུ་དམར་གདུང་ཆ་ཚང་བཞུགས་པའི་སྐུ་གདུང་ལ་དངོས་སུ་མཇལ་རྗེས། བདག་ནི་བརྗོད་དུ་མེད་པའི་ཚོར་སྣང་ཞིག་གིས་མགྲིན་པ་བརྣངས་ཏེ་ཁོང་གི་སྐུ་གདུང་གི་ཕྱོགས་སུ་གུས་ཕྱག་ཅིག་ཕུལ་བ་ལས་ཐབས་ཅི་ཞིག་བདོག

རིའི་མཐོ་དམན་རྒྱང་ནས་བལྟས་ན་ད་གཟོད་གསལ་བོར་མཐོང་བ་དང་རིའི་ངོ་ལ་འཛེགས་ན་གསལ་བོར་མི་ཤེས་པ་བཞིན་དུ་དམ་པ་ཡིན་མིན་ལོ་མང་གི་རྗེས་སུ་མཛད་རྗེས་ལ་གཞལ་ན་ན་ད་གཟོད་རྟོགས་ཐུབ་པ་ལས།

སྐུ་བཞུགས་པའི་སྐབས་སུ་གསལ་བོར་རྟོགས་ཀྱིན་མི་འདུག

འདི་ནི་མི་རྣམས་ཐུན་མོང་གི་སྣང་ཚུལ་ཞིག་རེད།

གང་ལྟར་གཙང་བཀྲ་ཤིས་ལྷུན་པོ་ན་ད་ལྟའང་རབ་བྱུང་བའི་ཞལ་གྲངས་ཀྱང་དགུ་བརྒྱ་ལྔ་བཅུ་ཙམ་བཞུགས་པས་དགེ་ལུགས་པའི་དགོན་པ་ཆེ་ཤོས་ཤིག་ཡིན་ཞེས་བཤད་ཆོག དེ་ནི་ནང་བསྟན་པ་ཞིག་ལ་མཚོན་ནས་བཤད་ན་དགའ་འོས་པ་ཞིག་མ་ཡིན་ནམ།
དབུས་གཙང་གདན་ས་བཞི་ཡི་ཡ་གྱལ་སྟེ།།
བཀྲ་ཤིས་ལྷུན་པོ་ཞེས་བྱའི་དགོན་ཆེན་འདིར།།
མཇལ་བས་སེམས་སུ་དགའ་ཚོར་བྱུང་བ་དང་།།
ལྷག་པར་པཎ་ཆེན་བཅུ་བ་སེམས་སུ་མངོན།།

༢༠༢༠\༩\༢༣\ ཉིན་རྨ་པྲཛྙཱས་སྤེལ། https://t.cn/EXa6oBp

སྣར་ཐང་དགོན་པ་ནི། དེ་ཡང་རི་བོ་གླང་པོ་ཆེའི་སྣ་ཞགས་བརྐྱངས་འདྲའི་འདབས་སུ་བཏབ་པ་འབྲེལ་བ་རྒྱུ་མཚན་དུ་བྱས་ནས་སྣར་ཐང་ཞེས་མིང་བྱུང་བར་གྲགས། བོད་ཀྱི་ལོ་རྒྱུས་ཐོག་སྐད་གྲགས་ཆེ་བའི་བཀའ་གདམས་ཀྱི་དགོན་པ་ཞིག་ཡིན། རབ་བྱུང་གསུམ་པ་ཆུ་བྱ་ཕྱི་ལོ་ ༡༡༥༣ ལོར་པོ་ཏོ་བའི་ཡང་སློབ་གཏུམ་སྟོན་བློ་གྲོས་གྲགས་པས་བཏབ། དེར་དགེ་བཤེས་ཤ་ར་བ་ནས་བརྒྱུད་པའི་བཀའ་གདམས་གཞུང་པའི་ཁྲིད་རྒྱུན་དང་། ཁ་ཆེ་པཎ་ཆེན་ཤཱཀྱ་ཤྲི་ནས་བརྒྱུད་པའི་འདུལ་བ་གཙོ་བོར་འཛིན་ཅིང་། རབ་བྱུང་བཞི་པའི་དུས་སུ་མཁན་པོ་བཅོམ་ལྡན་རིག་པའི་རལ་གྲི་དང་། དབུས་པ་བློ་གསལ་སངས་རྒྱས་ཡབ་སྲས་ཀྱིས་སྡེ་སྣོད་གསུམ་གྱི་གཙུག་ལག་བོད་དུ་འགྱུར་རོ་ཅོག་བཀའ་འགྱུར་དང་བསྟན་འགྱུར་གཉིས་སུ་བསྒྲིགས་པ་དང་། རབ་བྱུང་བཅུ་གཉིས་པའི་ལྕགས་ཕག་ཕྱི་ལོ་ ༡༧༣༡ ལོར་ཕོ་ལྷ་བསོད་ནམས་སྟོབས་རྒྱལ་ཀྱིས་མཐུན་རྐྱེན་མཛད་དེ་བཀའ་འགྱུར་པོད་བརྒྱ་ཐམ་པ་དང་བསྟན་འགྱུར་པོད་ཉིས་བརྒྱ་ཉི་ཤུ་རྩ་ལྔ་བར་དུ་བསྐྲུན། གཞན་སྟོན་པ་སངས་རྒྱས་ཀྱི་འཁྲུངས་རབས་དཔག་བསམ་འཁྲི་ཤིང་གི་ཐང་ག་ཉི་ཤུ་རྩ་ལྔ་དང་། རྗེ་ཙོང་ཁ་པའི་རྣམ་ཐར་ཆ་ཚང་གི་ཐང་ག་བཅོ་ལྔ་བཅས་ཤིང་པར་དུ་བསྐྲུན། དེ་འདྲའི་བཀའ་བསྟན་སོགས་ཀྱི་པར་ཤིང་དང་མཁས་པ་དུ་མ་འཁྲུངས་སའི་གནས་མཆོག་ཅིག་ཡིན་ཀྱང་ང་བརྒྱད་ལོའི་དུས་འཁྲུག་དང་རིག་གནས་གསར་བརྗེའི་སྐབས་སུ་ཕལ་ཆེར་རྨེག་མེད་དུ་བཏང་སོང་། ད་ལྟའི་ཆར་བཀའ་འགྱུར་གྱི་དཔར་ཤིང་ཆ་ཚང་ཞིག་ཡོད་ཟེར། དེ་ནི་སྔོན་གྱི་དེ་ཡིན་མིན་གསལ་བོར་མི་ཤེས།

ད་དུང་དཔར་ཤིང་འགའ་རེ་བརྐོས་དང་རྐོ་བཞིན་འདུག འདུ་ཁང་སོགས་སུ་ཞིག་གསོ་དང་ལྷ་སྐུ་མང་བོ་ཞིག་གསོ་བྱེད་ཀྱིན་འདུག

དགོན་པ་འདིའི་ནང་དུ་རྒྱལ་བ་དགེ་འདུན་གྲུབ་དགུང་ལོ་བདུན་པ་དང་བཅུ་གསུམ་ཡིན་པའི་དུས་ཀྱི་ཞབས་རྗེས་གསལ་བོ་དང་གཞན་འཇམ་དབྱངས་ཀྱི་སྟོང་སྐུ་དང་རྗེའི་སྟོང་སྐུ་སོགས་མང་བོ་བཞེངས་འདུག་འདུག སྔོན་གདན་ས་ཆེན་པོ་ཞིག་ཡིན་ཀྱང་ད་ལྟ་གྲྭ་བའི་ཞལ་གྲངས་བདུན་ཅུ་ཙམ་ལས་མེད། འདིའི་ནང་དུ་སོང་ནས་ང་ལ་བག་ཆགས་ཟབ་མོ་ཞིག་བཞག་པ་ནི།

ལྷ་ཁང་གྲལ་དག་ཞིག་གི་དབུས་སུ་པཎ་ཆེན་བཅུ་བ་མཆོག་གི་སྐུ་བརྙན་ཞིག་བཞེངས་པ་དང་གཡས་གཡོན་གྱི་གྱང་ལོགས་སུ་ཁོང་གི་རྣམ་ཐར་མཚོན་པའི་ཆུང་དུས་ནས་སྐུ་མྱ་ངན་གྱི་འདའ་ཁའི་བར་གྱི་འདྲ་པར་མང་བོ་བཞུགས་སུ་གསོལ་ཡོད།

ཅི་འདྲའི་ཡིད་ཕངས་པ་ལ་ཨང་། བསོད་ནམས་ཀྱིས་མ་ཐེག་པའི་དམ་པ་ཞིག

ཡུལ་གྲུ་གཞན་ཞིག་གི་འགྲོ་དོན་ལ་ཕེབས་སོང་།

༢༠༢༠\༩\༢༢\ ཉིན་རྨ་པྲཛྙཱ་ནས། https://t.cn/EXa6oBp