རྒ་ཧོ་རྒན་མོ་ཆ་ཁ།

———///—དྲེད་པོ་ཧོར།
་་་རྒ་ཧོ་རྒན་མོ་ཆ་ཁ་་་་ཟེར་བའི་ཚིག་དེ་སྙན་མོ་ཞིག་གཏན་ནས་མི་འདུག ཚིག་འདི་གོ་བ་དང་གུས་ཞབས་མེད་པ་དང་། མཐོང་ཆུང་གི་རྣམ་པ་ཤུགས་ཆེན་པོ་ཐོན་ཡོང་གི་འདུག འདི་མང་ཆེ་བ་བེད་སྤྱོད་བྱེད་ས་ཁམས་སྨད་ཀྱི་འབྲོག་ཁུལ་ལ་རེད། འདིའི་དོན་དག་ནི་སྤྱིར་སྟངས་ལོ་ཅུང་ཙམ་བགྲེས་པའི་ཕོ་མོ་གཉིས་ལ་གོ་ཡང་། ཚིག་འདི་གཏམ་བཤད་དང་ཆོས་བཤད་ཀྱི་སྐབས་སུ་བཀོལ་དུས། མང་ཆེ་བ་རབ་བྱུང་མ་ཡིན་པའི་མི་སྐྱ་ཕོ་མོ་ལ་གོ ཚིག་འདིའི་ཚབ་དུ་ཐ་སྙད་གཞན་པ་སྙིང་རྗེ་མོ། འཕྲོད་པོ་གུས་ཞབས་དང་ལྡན་པའི་ཚིག་མང་པོ་ཞིག་ཡོད། དཔེར་ན། ཁྱེད་མི་དམངས་མང་ཚོགས་རྣམ་པ། མི་སྐྱ་ཕོ་མོ་རྣམ་པ། མང་ཚོགས། མི་སྐྱའི་སྡེ་ཁག་སོགས་བེད་སྤྱོད་གཏང་ཆོག་གི་རེད་བསམ། ཆོས་བཤད་སྐབས་འདྲ་ཡིན་ན། དད་ལྡན་པ་རྣམས་དང་། ཡང་ན་དད་ལྡན་ཕོ་མོ། ཞིང་འབྲོག་མང་ཚོགས་སོགས་ག་རེ་སྤྱོད་ཀྱང་ཆོག་པ་ཞིག་རེད།

ཚིག་འདི་ལ་སྒྲུང་ཐུང་ཞིག་ཡོད་པ་རེད། ༢༠༡༤ ཙམ་ལ་ཡིན་ས་ཡོད། རྒྱ་གར་རྡོ་རྗེ་གདན་ལ་མདོ་མང་གཡང་ཐང་རིན་པོ་ཆེས་བཀའ་མའི་དབང་ལུང་ཞིག་གནང་བ་རེད། དབང་ལུང་གི་ཉིན་མཐའ་མར་རིན་པོ་ཆེས་དད་ལྡན་མང་ཚོགས་ལ་བཀའ་སློབ་གནང་སྐབས། གཡང་ཐང་ཚང་གི་གསུང་འབྲོག་སྐད་ཡིན་པས། མི་མང་ཆེ་བས་ཡག་པོ་ཞིག་གོ་ཡོད་ས་མ་རེད། གཅིག་གིས་ཟེར་ནས་དེ་རིང་རིན་པོ་ཆེས་དགའ་བོ་དགའ་མོའི་སྐོར་མང་པོ་གསུངས་སོང་། ད་ནས་བཟུང་དགའ་རོགས་སྒྲིག་མི་ཆོག་པ་མ་རེད་པ་ལབ་ཀྱི་འདུག་ཟེར། དེ་ནི་དགའ་བོ་དགའ་མོའི་སྐོར་མ་ཡིན་པར་ཁྱེད་རྒ་ཧོ་རྒན་མོ་ཆ་ཁ་ལབ་ནས་མང་པོ་གསུངས་པ་རེད་འདུག

ང་ཚོས་གྲོང་པ་ཁྱིམ་མཚེས་དང་། དུས་རྒྱུན་འཚོ་བའི་ནང་སྐད་ཆ་ག་རེ་བཤད་ཀྱང་ཁྱད་པར་མི་འདུག ཡིན་ཡང་གཏམ་བཤད་ཆོས་བཤད་དང་། མང་ཚོགས་ལ་གསལ་བསྒྲགས་དང་སློབ་ཁྲིད་སོགས་ཀྱི་སྐབས་སུ་ཚིག་དང་ཐ་སྙད་གང་ཡག རྒྱུག་ཆེ་བ་གང་ཡིན་བལྟས་ནས། ཚིག་འདེམས་ཤེས་པ་བྱེད་དགོས་རྒྱུ་ཤིན་དུ་གལ་ཆེན་པོ་རེད་འདུག ཡང་དེང་སང་ཁ་ཤས་ཀྱིས་ཚིག་འདེམས་སྟངས་མ་ཤེས་ནས། རང་གི་ཡུལ་སྐད་ལ་ཡོད་པའི་ཚིག་ཡག་བ་དེ་ཚོ་ཕར་དོར། ཚིག་ཡག་པོ་མེད་པ་དེ་ཚོ་ཚུར་བཀོལ་ཡོང་གི་འདུག དཔེར་ན་ཨམ་སྐད་ནང་གི་དང་སྒྲ་དང་ན་སྒྲ་སོགས་ཀྱི་ཚབ་ལ་་ར་་སྒྲ་བེད་སྤྱོད་གཏོང་བའི་ལྟོས་དང་། ཤོག་དང་ཟེར་བ་སོགས་ལ། ལྟོས་ར། ཤོག་ར། ཡང་ཁྱེད་ཚོ་དང་ང་ཚོ་ཟེར་བའི་ཚབ་ལ། ཁྱི་ཆོས་་་ངུ་ཆོས་ཟེར་བ་དང་། ཡག་པོ་འདུག་ཟེར་བ་ལ་ཧྲ་ཁུ་ཟེར་བ་སོགས་བཀོལ་གྱི་འདུག དེ་འདྲ་བྱས་ན་ལོང་བ་ལམ་འོག་མཆོངས། ལམ་འོག་ནས་ཀྱང་ཆུ་ནང་དུ་མཆོངས་བ་དང་ཁྱད་པར་མི་འདུག ༢༢/༩/༢༠༢༢

二零二二年九月二十一之二十三日
三天时间 印度南方色绑闻思宝洲佛学院进行年度的终极考试科文有五大论部、三十颂、音势论、正字学、佛陀传记、宗喀巴传记。
༄༅།།སྤྱི་ལོ་༢༠༢༢ ཟླ་ ༩ ཚེས་ ༢༡ ནས་ ༢༣་བར་ཉིན་གྲངས་གསུམ་རིང་གདན་ས་ཆེན་པོ་སེར་སྤོམ་ཐོས་བསམ་ནོར་གླིང་ཆེས་མཐོའི་གཙུག་ལག་སློབ་གཉེར་ཁང་ཆེན་མོའི་སློབ་གཉེར་བ་རྣམས་ནས
༡༽   གཞུང་ཆེན་བཀའ་པོད་ལྔ་དང་། །
༢༽   རིགས་གནས་སུམ་རྟགས་དག་གསུམ། །
༣༽   ཆོས་འབྱུང་སྟོན་པའི་རྣམ་ཐར་ཐུབ་བསྟན་མཛེས་རྒྱན། །
༤༽   རྗེ་ཙོང་ཁ་པའི་རྣམ་ཐར་དད་པའི་འཇུག་ངོགས་བཅས། །
ལོ་འཁོར་གྱི་བྲིས་རྒྱུགས་ཆེན་མོ་སྤྲོད་བཞིན་པའི་རྣམ་པའོ།།

འགྱོད་སེམས།

—•སྙན་ངག་པ་གཅན་མེ་སྟག་ལ།

ཁྱེད་རང་གློ་བུར་འདས་སོང་།
འཇིག་རྟེན་འདི་དང་གཏན་དུ་གྱེས་སོང་ཟེར།
གཏམ་དེ་དྲྭ་སྒང་དུ་རིམ་བཞིན་མཆེད་དེ་གང་སར་ཐོན་སོང་།
ཀྱེ་མ།
ད་དུང་།
མི་ལོ་ང་གཉིས་ལས་མིན་ཟེར།
སྨྲ་ལྕེ་ལ་དབྱངས་གསལ་གྱི་མཉེན་བབ་ཅིང་།
དུང་སོ་ལ་དབྱངས་གསལ་གྱི་འོད་འཚེར་བའི་ཁྱོད་རང་།
ཕེབས་པ་སྔ་དྲགས་སོང་།
ང་ཚོ་ལ་ཁྱེད་དང་ཁྱེད་འདྲ་བ་འཚོ་བཞུགས་ཀྱི་བསོད་ནམས་དམན་པ།
ལས་ཅི་ཞིག་ལན་སོང་བ་ཡིན་ནམ།

ད་དུང་།
ཁྱེད་ཀྱིས་མེས་པོའི་གླེགས་བམ་ཁྲོད་ནས།
ཨ་རག་འཐུང་མི་ཉན་གསུངས་པ་མ་ཐོས་སམ།
ཡང་ན།
མ་གུས་པ་བྱས་པ་ཡིན།
ཁྱེད་ཀྱིས་དམ་པའི་བཀའ་གསུང་ཁྲོད་ནས།
ཐ་མག་མ་འཐེན་གསུངས་པ་མ་ཐོས་སམ།
ཡང་ན།
བག་མེད་ཀྱི་དབང་ལ་སོང་བ་རེད།
བལྟས་བལྟས་རིག་རིག་ལ།
ཤེས་ཤེས་ཚོར་ཚོར་ལ།
ཁྱེད་ཀྱིས་དུད་ཆང་དེ་དག
མཚམས་མི་འཇོག་དོན་ཅི།
ཁྱེད་ཀྱིས་བཤད་པ་བཞིན།
མཐོ་སྒང་འདིའི་ལྷིང་འཇགས་མ་ཐོས་པས།
འདུག་མ་འདོད་པ་ཡིན་ནམ།

གང་ལྟར།
ཁྱེད་ཀྱིས་ཨ་རག་འཐུང་མེད་ན།
ཐ་མག་འཐེན་མེད་ན།
དེ་རིང་གི་འགྱོད་སེམས་ཀྱི་འོ་དོད་དག་གང་ནས་འབྱུང་།
ཨ་་་་་

༢༠༢༢-༩-༢༡