སྤྱན་ཟུར་རེ་ལ་བརྩེ་བའི་རླབས་འཕྱོ་ཞིང་།།
དཀར་གསལ་དུང་མདོག་ཟླ་བའི་དཔལ་འདྲ་བ།།
མཛེས་སྡུག་པད་མའི་བཞིན་གྱི་​དཀྱིལ་འཁོར་དེ།།
དོ་ནུབ་དྲན་པའི་མཁའ་རུ་ཡང་གཅིག་ཤར།།

མཉེས་གཤིན་སེམས་ལ་འོ་མའི་རང་མདངས་རྫོགས།།
གཤིས་འཇམ་ལུས་ལ་སྤོས་ཀྱི་དྲི་ངད་ལྡང་།།
རང་བཞིན་མི་འགྱུར་གོར་མོའི་ཚུགས་གྲུབ་པ།།
​རིན་ཆེན་ས་ལེ་སྦྲམ་ཁྱོད་སྙིང་ནས་དྲན།།

ཡུལ་གྱི་སྟོན་ཁ།

སྟོད་ཀྱི་རྫ་རིའི་སྐེད་པ་སྨུག་གིས་བཟུང་། །
རྫ་འདབས་སྟོན་ཆུ་རིང་མོ་ཤང་ཤང་འབབ། །
སྨད་ཀྱི་ནས་ཞིང་གྲུ་བཞིས་རླབས་ཕྲེང་འཛིན། །
ཀུ་ཤ་རྒྱ་ཞིང་གྲུ་བཞིའི་ཚད་ལ་ལོངས། །
ལམ་ན་ཆུ་གོར་སྐར་ཚོགས་འཕོས་འདྲ་ཡོད། །
ལམ་མཐར་ཁམས་བསང་གཏོང་སའི་སྦྲ་གུར་མང་། །
སྟོན་ལུག་བཙོང་རྒྱུ་བཀར་ནས་དགུན་སར་དེད། །
ལོ་ལན་བྱིས་པ་རྣམས་ནི་དེ་ཡི་རྫི། །
རྩྭ་ནི་སྐྱེ་ཐག་ཆོད་དེ་མདོག་ཀྱང་ནི། །
ཉིན་རེར་བསྡད་ན་ཉིན་རེར་སེར་སྐྱར་ལོག །
འཁྱག་རླུང་ཚོད་ཚོད་མེད་ལ་ཡུན་རིང་ལྡང་། །
རྩི་མགོ་གྲང་འདར་རྒྱག་པའི་ཉམས་ཀྱང་སྟོན། །
ཆར་བ་སྲོད་དང་ཐོ་རངས་འཆར་ཀར་འབབ། །
གནམ་ངོ་ཡོངས་སུ་རུབ་ན་ཞེ་ཡང་སྨྲེང་། །
མེ་ཏོག་ལང་ཚོའི་བཀྲག་མདངས་ཡལ་མགོ་བརྩམས། །
གཅིག་ནི་ཕྱིར་འོང་མེད་པས་སེམས་ཀྱང་སྐྱོ། །
གཡར་བའི་ལུས་པོ་ནམ་ཞིག་མི་ཤེས་པར། །
བསམ་ན་ཡིད་ཀྱི་གཏིང་ནས་འདུག་བཟོད་བྲལ། །

ཁ་སང་ནས་བཟུང་ནད་དུག་གི་དབང་གིས་ནང་དུ་མི་འདུག་ཐབས་མེད་བྱུང་། དེ་བས་སྐུ་འབུམ་བྱང་ཆུབ་ལོ་མའི་དཔེ་ཚོགས་རྩོམ་སྒྲིག་ཚན་ཆུང་ལ་ཉིས་སྟོང་བཅུ་བདུན་ལོར་དགོན་གཞུང་ནས་བདག་རྐྱེན་མཐུན་འགྱུར་གང་ལེགས་གནང་སྟེ། རྗེ་བླ་མ་ཙོང་ཁ་པ་མཆོག་གི་སྐུའི་འཁྲུངས་གནས་ཆོས་སྡེ་ཆེན་པོ་སྐུ་འབུམ་བྱམས་པ་གླིང་ནས་ལམ་དུ་ཆས། རྗེ་བླ་མ་མཆོག་དབུས་བཞུད་ཀྱི་ཞབས་རྗེས་དེད་དེ་ལྷོ་ལམ་བརྒྱུད་ནས་དབུས་གཙང་གི་གནས་ཆེན་དྲུག་ཅུ་ལྷག་ལ་ཕེབས་ནས་ཡིག་ཆ་དང་པར་རིས་མང་པོ་འཚོལ་བསྡུ་བྱས་ཏེ། འཇམ་མགོན་བླ་མ་ཆོས་ཀྱི་རྒྱལ་བོ་༧ ཤར་ཙོང་ཁ་པ་ཆེན་པོ་སྐུ་མྱ་ངན་ལས་འདས་ནས་ལོ་ངོ་དྲུག་བརྒྱ་ལོན་པའི་རྗེས་དྲན་མཚོན་བྱེད་དུ་༼ གསེར་མདོག་གི་ཞབས་རྗེས ༽ཞེས་པའི་པར་དེབ་འདི་ཉིད། རྒྱ་ཆེའི་ཀློག་པ་པོ་རྣམས་ལ་རྗེ་བླ་མ་མཆོག་གི་སྐུ་ཚེ་ཧྲིལ་བོའི་རྣམ་ཐར་ལ་ངེས་ཤེས་སྐྱེད་ནུས་པ་དང་། ང་ཚོ་གདུལ་བྱ་ཐ་མལ་བ་མང་པོར་དད་པ་དང་ཆོས་སྒྲུབ་པའི་སྙིང་སྟོབས་བསྐྱེད་པ་སོགས་ཁྱད་དུ་འཕགས་པའི་དགེ་མཚན་དུ་མར་དམིགས་སྟེ་ཀུན་གྱིས་བགོ་སྐལ་དུ་སྩལ་གནང་མཛད་པས། དེ་རིང་ཡང་བསྐྱར་རྗེ་བླ་མའི་རྣམ་ཐར་༼ གསེར་མདོག་གི་ཞབས་རྗེས་ ༽ ལ་མཇལ་བའི་སྐལ་བ་དང་དུས་ཚོད་ཡག་པོ་བྱུང་སོང་།