རིག་པའི་དབང་ཕྱུག་ཕྱྭ་པ་ཆོས་ཀྱི་སེང་གེ་ལོ་རྒྱུས་མདོར་བསྡུས།
གསང་ཕུའི་མཁན་ཐོག་དྲུག་པ་ཕྱྭ་པ་ཆོས་ཀྱི་སེང་གེ་ནི་གསང་ཕུའི་མཁན་པོ་མཛད་མཁན་གྱི་ནང་ནས་དབུ་མ་དང་ཚད་མ་ལ་ཤིན་ཏུ་མཁས་ཤིང་གདན་སའི་སློབ་གཉེར་ལམ་ལུགས་གསར་གཏོད་མཛད་མཁན་གྱི་སློབ་གསོའི་གྲགས་ཅན་མི་སྣ་རྒྱལ་ཁབ་ཕྱི་ནང་དུ་མཁས་པའི་སྙན་གྲགས་ཡོད་པ་ཞིག་ཡིན། ཁོང་ནི་རབ་བྱུང་བཅུ་གཉིས་པའི་ས་གླང་﹝༡༡༠༩﹞ལོར་ཕྱྭ་ཞེས་པའི་ཡུལ﹝འགའ་ཤས་ཀྱི་ཆ་ཡང་ཟེར﹞སྟེ།དེང་སྐབས་ལྷ་ས་གྲོང་ཁྱེར་སྟག་རྩེ་རྫོང་ལ་མོ་ཆུས་ཀྱི་ཁོངས་སུ་གཏམས། རམ་བྱུང་གསུམ་པའི་ས་གླང་﹝༡༡༦༩﹞ལོར་སྐུ་བཤེགས། ཁོང་སྐུ་ན་ཆུང་དུས་ནས་ཐུགས་རིགས་གསལ་ཞིང་མགུར་མ་སྣ་ཚོགས་གསུང་ཐུབ་མཁན་ཞིག་ཡིན་པས་དགེ་ཤེས་རྒྱ་དམར་བས་ཕ་མ་ལས་སློང་ཏེ་ཞབས་ཕྱིར་ཁྲིད་ནས་ཁོང་གི་དྲུང་ནས་ཚད་མ་དང་དབུ་མ་གསན་སྦྱོང་གནང་ཞང་ཚེ་སྤོང་ཆོས་ཀྱི་བླ་མའི་དྲུང་དུ་རབ་ཏུ་བྱུང་ནས་མཚན་ལ་ཆོས་ཀྱི་སེང་གེ་ཞེས་བཏགས་ཁོང་དང་དེའི་སློབ་མ་ཉན་བྲན་ཆོས་ཀྱི་ཡེ་ཤེས་གཉིས་ཀྱི་དྲུང་དུ་ཕར་ཕྱིན་དང་སྤྱོད་ཕྱོགས་སྐོར་གསན། གསང་ཕུའིགདན་ས་ལོ་བཅོ་བརྒྱད་ཀྱི་བར་དུ་མཛད་ཕྱྭ་པ་ཆོས་ཀྱི་སེང་གེས་གདན་སའི་སློབ་གཉེར་སྲོལ་གཏོད་གནང་བའི་མཛད་རྗེས་གཙོ་བོ་ནི ༡ གཞུང་བཀའ་པོད་ལྔའི་སློབ་གཉེར་ཐབས་ལམ་གསར་དུ་གཏོད་པ། ༢ སློབ་རྩོད་གཉིས་དུས་གཅིག་ཏུ་སྤེལ་བའི་ལམ་གསོལ་གཏོད་པ། ༣ དགེ་རྒན་སོ་སོའི་ཁྱད་ཆོས་ལ་གཞིགས་ཏེ་སློབ་ཁྲིད་ཀྱི་ལས་འགན་གཏན་འཁེལ་གནང་ནས་དགེ་་རྒན་སོ་སོའི་ཁྱད་ནུས་འདོན་སྤེལ་གངས་ལེགས་བྱད་དུ་བཅུག་པ། ༤ འཛིན་གྲྭ་བགོ་བའི་ལམ་ལུག་གསར་དུ་གཏོད་ཅིང་འཛིན་གྲྭ་སོ་སོའི་སློབ་ཡུན་གྱི་ལོ་ཚད་གཏན་འཁེལ་གནང་བ། ༥ ལོ་གཅིག་གམ་སློབ་དུས་སོའི་ཆོས་ཐོག་གི་སློབ་ཚན་ནང་དོན་གཏན་འབེབས་གནང་བ། ༦ འཛིན་གྲྭ་ཕན་ཚུན་གཏུགས་རེས་﹝འགྲན་བསྡུར﹞བྱས་པའི་ཐབས་ལམ་གསར་དུ་གཏོད་པ། ༧ ཆོས་ཐོག་སྐབས་འགྲོ་གླེང་གཙོ་བོ་དང་སློབ་ཁྲིད་ཞར་བྱུང་། ཆོས་མཚམས་སྐབས་སློབ་ཁྲིད་གཙོ་བོ་དང་འགྲོ་གླེངས་ཞར་བྱུང་བྱ་རྒྱུའི་གསོལ་གཏོད་པ། ༨སློབ་གཉེར་ལེགས་གྲས་རྣམས་རང་མོས་ཐོག་དགོན་པ་གཞན་དང་གྲྭ་ཚང་གཞན་ལ་གྲྭ་སྐོར་དམ་བཅའ་འགྲོ་བའི་སྲོལ་གསར་དུ་གཏོད་པ་། ༩ སློབ་གཉེར་ཐོན་པའི་རིགས་ལ་སློབ་གཉེར་གྱི་སྦྱངས་འབྲས་ལེགས་ཉེས་ལ་གཞིགས་ནས་མཚན་གནས་སྤྲོད་པའི་སྲོལ་གཏོད་པ་། ༡༠ ཚད་མ་རིགས་པའི་གཞུང་རྣམས་ཀྱི་སྙིང་བཅུད་བསྡུས་པའི་《བསྡུས་གྲྭ་》ཆུང་འབྲིང་ཆེ་གསུམ་གསར་རྩོམ་མཛད་ཅིང་དེ་ལྟར་སློབ་སྦྱོང་བྱེད་དགོས་རྒྱུའི་གཏན་འབེབས་གནང་བ་། ༡༡ མཚན་ཉིད་རྩོམས་སྐབས་ཀྱི་དྲི་བ་དྲི་ལན་འདེབས་ཚུལ་དང་། རྩོད་གླེང་གཏོང་མཁན་གྱི་འཛིན་གྲྭའིི་དབུས་སུ་ལངས་ཏེ་ཐོག་མར་ཁས་ལེན་བཟུང་མཁན་ལ་གུས་འདུད་ཀྱི་རྣམ་འགྱུར་དང་བཅས་ཏེ།གཟན་སྐྱུར་འབེབས་ནས་སྐད་གསང་མཐོན་པོས་བགྲོ་གླེང་འགོ་ཚུགས་པའི་ངྷི་སྐད་གཏོང་བ་དང། དེ་ནས་གཟན་སྐེད་པར་དཀྲིས་ཏེ་སྐབས་སུ་བབས་པའི་གཞུང་ལས་འཕྲོས་པའི་ཁས་ལེན་དྲི་བ་དང་། ཐལ་འགྱུར་འཕེན་པ་དང་ཆབས་ཅིག་ལག་པས་ཐལ་མོ་རྡེབ་པ། ཁྱབ་མཐའ་འགོད་པ། རྒྱུ་མཚན་འདྲི་བ། འཁོར་གསུམ་བསྐོར་བ་སོགས་ཀྱི་དམ་བཅའ་ཁས་ལེན་དང་མཚན་ཉིད་རྩོད་པའི་ཐ་སྙད་དང་བྱ་ཐབས་བཅས་པའི་ངོ་མཚར་ཁྱད་དུ་འཕགས་པའི་སློབ་གཉེར་སྲོལ་ལམ་ཞིག་གཏོད་གནང་སྟབས་བོད་ཀྱི་གདན་ས་ཁག་ཏུ་ཁོང་གི་སྲོལ་གཏོད་དེ་དར་ཁྱབ་གོང་འཕེལ་ཤུགས་ཆེན་བྱུང་བ་མ་ཟད། ད་ལྟ་ཡང་ཁོང་གི་སློབ་གཉེར་ལམ་ལུགས་མ་ཉམས་གོང་འཕེལ་འགྲོ་བཞིན་ཡོད་པ་བཅས་ཡིན། ཁོང་སྐུ་ཚེའི་རིང་སློབ་མ་གྲངས་ཀྱི་མི་ལངས་བ་ཡོད་པའི་ནང་གྲགས་ཆེ་ཤོས་ནི་རིགས་པའི་དབང་ཕྱུག་སེང་ཆེན་བརྒྱད་ཡོད་པ་སྟེ། གཙང་ནག་པ་བརྩོན་འགྲུས་སེང་གེ། དར་བག་སྨྲ་བའི་སེང་གེ། བྲུ་ཤ་བསོད་ནམས་སེང་གེ། རྨ་བྱ་རྩོད་པའི་སེང་གེ། རྩེགས་དབང་ཕྱུག་སེང་གེ། ཉང་བྲན་ཆོས་ཀྱི་སེང་གེ། འདན་མ་དཀོན་མཆོག་སེང་གེ། གཉལ་པ་ཡོན་ཏན་སེང་གེ་བཅས་ཡིན། སློབ་མ་གྲགས་ཆེན་བརྒྱད་ཀྱི་ནང་ནས་གཉལ་པ་དང་། བྲུ་ཤ་བ་གཉིས་མ་གཏོགས་དེ་མིན་ཚང་མས་ཚད་མ་དང། དབུ་མ། ཕར་ཕྱིན་བཅས་ཀྱི་གཞུང་རྒྱས་བསྡུད་དུ་མ་མཛད་ཡོད། ཁོང་གི་གསུང་རྩོམ་སྐོར་ལ《བྱམས་ཆོས་སྡེ་ལྔའི་འགྲེལ་པ》 《ཚད་མ་རྣམ་ངེས་ཀྱི་འགྲེལ་པ》 《ཚད་མ་ཡིད་ཀྱི་མུན་སེལ》 《ཤེས་བྱ་གཞི་ལྔའི་རྣམ་གཞག》(རྒྱས་བསྡུས་གཉིས)《དབུ་མ་བདེན་གཉིས་ཀྱི་འགྲེལ་པ》 《དབུ་མ་སྣང་བའི་འགྲེལ་པ》 《སྤྱོད་འཇུག་ཆེན་མོའི་འགྲེལ་པ》བཅས་མང་དུ་ཡོད། གཞན་ཡང་ཁོང་གི་མཛད་རྗེས་མང་ཡང་འདིར་ཡིག་རྫོབ་ཆེ་བར་དོགས་ནས་མ་བཀོད་པས་ཞིབ་པར་གཟིགས་འདོད་མཁན་རྣམས་ཁོང་གི་དངོས་སློབ་ནག་པ་བཙོན་འགྲུས་སེང་གེས་མཛད་པའི《རྣམ་ཐར་དད་པའི་འོད་ཟེར་ཕྱོགས་བརྒྱར་འགྱེད་པརྣམ་ཐར་དད་པའི་འོད་ཟེར་ཕྱོགས་བརྒྱར་འགྱེད་པ།》ཞེས་པ་དང་། ཞབས་དྲུང་རིན་ཆེན་འབྱོར་ལྡན་གྱིས་མཛད་པའི《གསང་ཕུའི་གདན་རབས།》《དེབ་དེར་སྔོན་པོ།》ལེ་ཚན།［ཚ］བཅས་སུ་གཟིགས་ན་གསལ།[作揖]

རིང་པོའི་ལོ་ཟླའི་ཁྲོད་ཀྱི་ལུས་སེམས་ཀུན།།
སྙིང་རྗེ་ཉག་མ་གཅིག་གིས་གསོས་པ་ཡི།།
སེམས་དཔའ་ཁྱེད་ཀྱི་ཕྱག་གི་བརྐྱང་བསྐུམ་ཡན།།
མཐའ་དག་འགྲོ་བའི་དོན་དུ་མ་གྱུར་གང་།།

མཁན་འཆི་མེད་རིག་འཛིན་གྱིས།

ང་ནི་ང་ཡིན།

དཔལ་མོ།

ང་ནི་ང་ཡིན

ང་ནི་སྐྱེ་དམན་ཞིག་ཡིན་ལ

གླེན་རྟགས་ཆེ་བའི་འབྲོག་མོ་ཞིག་ཀྱང་ཡིན

ངས་ཁྲེལ་གཞུང་གི་སྤངས་ཐང་ཡངས་པོའི་ངོས་སུ

ལས་ཀྱི་མེ་ཏོག་རང་བྱོན་དུ་བཞད་པར་ཨུ་ཚུགས་བྱེད་མྱོང་

ངའི་རྐང་སེན་ལ་མེ་ཏོག་གི་བཀྲག་མདངས་བྱུགས་དུས

ང་ནི་དྭངས་གཙང་ཞིག་ཀྱང་ཡིན

ང་ནི་ང་ཡིན

ང་ནི་སྐྱེས་མ་ཞིག་ཡིན་ལ

སྙིང་སྟོབས་ཞན་པའི་བོད་མོ་ཞིག་ཀྱང་ཡིན

ང་རང་ཉི་འོད་ལ་ཕྱོགས་ཏེ་བཞད་མྱོང་ལ་གྲང་ངར་ལ་རྐྱལ་ཏེ་འཁྱག་ཀྱང་མྱོང་

ནམ་མཁའི་འཇའ་ཚོན་བག་གོས་སུ་འཐག་པའི་སྟོང་སེམས་བཅངས་ཏེ

ངའི་ལང་ཚོ་ལ་མཛེས་སྡུག་གི་རླབས་ཕྲེང་འཕྱོ་དུས

ང་ནི་མུ་ཏིག་ཅིག་ཀྱང་ཡིན

ང་ནི་ང་ཡིན

ང་ནི་མནའ་མ་ཞིག་ཡིན་ལ

བྲན་གཤིས་ཟབ་པའི་གཡོག་མོ་ཞིག་ཀྱང་ཡིན

འཁོས་ཆུང་བའི་རང་གཤིས་ཀྱི་མཚེའུ་རྫིང་ནང་དུ

བསོད་ནམས་ཀྱི་པད་དཀར་ལྷམ་མེར་འཁྲུངས་པར་རེ་སྨོན་བྱེད་མྱོང་

ངའི་མི་ཚེ་ལ་ཆུང་མ་ཞེས་པའི་ཁ་བྱང་བྲིས་དུས

ང་ནི་འཆིང་ཡིག་ཅིག་ཀྱང་ཡིན

ང་ནི་ང་ཡིན

ང་ནི་བུད་མེད་ཅིག་ཡིན་ལ

རྩིས་ཐང་ཉམས་པའི་འཕྱོན་མ་ཞིག་ཀྱང་ཡིན

འདོད་ཆགས་ཀྱི་གད་སྙིགས་གང་དགར་བྱོ་སའི་ཡོལ་གོར་ངེས་ཆོག་ལ

དྲག་སྤྱོད་ཀྱི་རལ་གྲི་ཤུབས་ནས་ཕྱུང་སྟེ་དམར་གསོད་བྱས་ཀྱང་ཆོག

ངའི་ལུས་རྟེན་ལ་རྩེར་སོན་དང་འཕགས་ལམ་མེད་ཅེས་ཐམ་ག་བརྒྱབ་དུས

ང་ནི་ཚོང་ཟོང་ཞིག་ཀྱང་ཡིན

ང་ནི་ང་ཡིན

ང་ནི་བཙུན་མོ་ཞིག་ཡིན་ལ

བུ་སྣོད་ཀྱི་གསེར་བུམ་ལ་རིགས་ཀྱི་ཁྱེའུ་བཞད་པའི་སྐྱེད་ཡུམ་ཞིག་ཀྱང་ཡིན

ཐུ་བྷོད་ཀྱི་གནའ་སྲོལ་བཟང་བོ་སྙིགས་དུས་ཀྱི་རྐྱེན་ལམ་ལ་མི་འཆོར་བར

ལྷག་བསམ་གྱི་གདུང་ཀ་མི་འགྱེལ་བར་གྱེན་དུ་འདེགས་པར་བཟོད

ངའི་ཚེ་སྲོག་ལ་ཁེ་དབང་དང་འདྲ་མཉམ་སྤྲད་དུས

ང་ནི་རྒྱལ་ཁབ་ཅིག་ཀྱང་ཡིན

ང་ནི་ང་ཡིན

ང་ནི་མཛའ་མོ་ཞིག་ཡིན་ལ

རིགས་རྒྱུད་ཀྱི་ས་བོན་འདེབས་སའི་གཤིན་ས་ཞིག་ཀྱང་ཡིན

རྟེན་འབྱུང་གི་ལས་འབྲས་ཟོལ་དུ་མ་བསྒྱུར་བར་དྲང་བོར་བསྐྱངས་ན

བརྩེ་དུང་གི་དུས་ཚིགས་ལ་འགྱུར་ལྡོག་མེད་པར་དྲོད་ཁོལ་སྩོལ་ཅིང་

སྣང་སྟོང་ཟུང་འཇུག་གི་འཁོར་ལོ་གསང་ཐབས་ཀྱིས་འཁོར་དུས

ང་ནི་ཤེས་རབ་ཅིག་ཀྱང་ཡིན

༢༠༡༩.༡༢.༣༠