མན་ལུང་གུ་རུའི་ལམ་ཡིག་ཏུ།

“གུ་གེ་གྲོ་ལིང་ན་ལོཙྪ་བ་རིན་ཆེན་བཟང་པོས་བཞེངས་པའི་ལྷ་ཁང་ནི་ཧོར་གྱིས་མེ་བརྒྱབས་ནས་མེད། དུས་ཕྱི་དུས་ཤིག་ལ་བྱས་པའི་ལྷ་ཁང་སུམ་བརྩེགས་ལ་འོག་ཁང་གི་ནང་ན་གསང་འདུས་ཀྱི་དཀྱིལ་འཁོར་དང་། གྱང་རིས་སོགས་སྔར་དང་ཆ་མཐུན་ཙམ་འདུག གུ་གེའི་ཡུལ་དེ་ཞང་ཞུང་གི་བོན་པོའི་ཡུལ་དུ་འདུག དེའི་སྨད་ན་ད་ལྟ་ཡང་བོད་སྐད་མ་ཡིན་པའི་ཁོ་རང་ཚོས་སྐད་ཟུར་པ་ཞིག་ལབ་པ་ཡིན།”

#དཔེ་ཀློག་ཐོར་བཏུས།

༣༦༨ ཞོགས་པའི་ཉི་ཟེར་དབུ་རྩེར་འཁྱུད་པ་ལ། །
ཕ་ཡུལ་ལས་ལྷག་ཅུང་ཙམ་དལ་བ་ཅན། །
གང་གི་དུས་སུ་སླར་ཡང་བྱིན་ལྡན་གནས། །
མ་ཧཱ་གུ་རུའི་ཕུག་པ་ལ་སོགས་བསྐོར། །

༣༦༩ དམ་པས་ཞབས་ཀྱིས་བཅགས་པའི་བྱིན་རླབས་ཕོན། །
འདི་ལྟར་ལགས་སོ་ཕལ་བའི་རི་བོ་དག །
ལྗང་མྱུག་ལང་ཚོས་ཉེ་བརབཏང་ན་ཡང་། །
གནས་འདིར་ལྷ་ཤིང་ཤུག་དང་མེ་ཏོག་འཁྲུངས། །

༣༧༠ རི་སྐྱེས་སྲོག་ཆགས་ཁྱུ་དང་ཁྱུ་བྱས་ནས། །
བག་ཡངས་རྒྱུ་བའི་ངང་ཚུལ་རྨད་བྱུང་བ། །
རིང་བ་མ་ཡིན་བྱིན་ལྡན་གནས་ཀྱི་རིར། །
མཐོང་བྱེད་ལམ་དུ་འཛིན་ལ་སྤྲོ་བ་ཞིག །

༣༧༡ དེ་ལྟར་ལྷག་པའི་མཚར་སྡུག་སྙིང་ལ་བསྟར། །
བྱིན་རླབས་བདུད་རྩིའི་གཏེར་ལ་དང་བ་ཞིག །
འཕོས་བཞིན་བྱིན་རླབས་བདུད་རྩིའི་ཆུ་གཏེར་ཆེ། །
འཕྱུར་བའི་གནས་ལ་ཕྱིན་རྗེས་ལམ་ལ་ཆས། །

༣༧༢ རིང་བ་མ་ཡིན་འདབས་ནས་ལྟ་བྱེད་ཟུང་། །
གཡའ་བྲག་འཐབ་པའི་གནས་ཀྱི་བྱིན་ལྡན་ཕུག །
གང་ལ་ཐོགས་ཀྱིན་ལམ་གྱི་སྣེ་མོ་དེ། །
ནུབ་ཀྱི་ཕྱོགས་ལ་འཐེན་པར་གྲོགས་སུ་བྱས། །

༣༧༣ ཐང་སྟོང་རྒྱལ་བོ་འཁྲུངས་པའི་ཕ་ས་སྟེ། །
རྣམ་གསུམ་རི་བོ་ཆེ་ལས་ཅུང་རི་ཆེན། །
རེ་བའི་འདུན་མ་ཞིག་གིས་རྒྱབ་ཏུ་ཁུར། །
ལྷོ་བྲག་དགོན་ལ་མཇལ་ཁ་ཞུ་བར་ཕྱིན། །

༣༧༤ ཀྱོག་ཀྱོག་ལམ་བུ་སྟོར་བའི་ངལ་བ་ཞིག །
སྦྱིན་ཡང་ལྷག་པའི་བསམ་པ་མ་རྙིང་བ། །
དུ་མའི་དྲིན་གྱིས་གང་ལ་རྒྱུ་བའི་ལམ། །
ལས་ཀྱི་སོར་མོའི་འདུ་བྱེད་གཉེན་དུ་སོན། །

༣༧༥ སྙན་པའི་བ་དན་སྲིད་གསུམ་གཡོ་བ་ཡི། །
ལྟད་མོ་སྐྱེ་དགུའི་མཐོང་བར་མ་གྱུར་མོད། །
བྱིན་ལྡན་གནས་ཀྱི་ཕྲེང་བ་བསྟར་བ་ཡི། །
ངོ་མཚར་མིག་གི་ལམ་དུ་འདི་ལྟར་ལྷུང་། །

༣༧༦ སྔོན་ཚེ་ཨོ་རྒྱན་ཆེན་པོའི་ཞབས་ཀྱིས་བཅགས། །
སྒྲུབ་པའི་རྒྱལ་མཚན་བསྒྲེང་བའི་ཕུག་པ་དང་། །
རིག་འཛིན་རྒོད་ཀྱི་ལྡེམ་འཕྲུས་མཛོད་ལྔའི་གཏེར། །
བཞེས་པའི་གཏེར་ཁུང་རྣམ་གཉིས་ལྷན་ཅིག་མཇལ། །

༣༧༧ དེ་ནས་བཟོ་བོས་མ་ཡིན་རང་བྱུང་ལམ། །
བྲག་རིའི་ཐེམ་པ་དག་ལ་བརྒལ་བ་ན། །
མཁའ་འགྲོ་ཡེ་ཤེས་མཚོ་རྒྱལ་སྒྲུབ་ཕུག་ཏེ། །
མཇལ་ན་དད་འདུན་འཕྱུར་བ་ལྷུན་ཆགས་སེ། །

༣༧༨ དེ་འོག་ཅུང་ཙམ་ཕྱིན་ན་སྒྲུབ་ཆུ་དག །
བྱེད་པོས་ཕྲེང་ལ་བསྟར་བ་མ་ཡིན་པ། །
བསམ་གཏན་རྒན་པོ་དག་ལ་བཞི་ཟུང་ཆོས། །
ཉེར་རྫོགས་མཆོད་ཡོན་བདུད་རྩི་དྭངས་སང་ངེ་། །

༣༧༩ བརྣག་དཀའ་བརྣག་པའི་རྣལ་འབྱོར་ཆེན་པོ་ཞིག །
ཚེ་གཅིག་སངས་རྒྱས་ལམ་ལ་བསྙེགས་པ་ཞིག །
གངས་ལ་ཉི་མ་ཤར་འདྲའི་བསྔགས་པ་ཞིག །
ཐོབ་པའི་མི་ལ་མཆོག་གི་སྒྲུབ་ཕུག་མཇལ། །

༣༨༠ རིམ་པ་བསྟར་བའི་ལྷུན་ཆགས་སྒྲུབ་ཕུག་དག །
རིམ་པ་བཞིན་དུ་མཇལ་ཁ་ཞུ་བ་རྫོགས། །
ལྷོ་བྲག་དགོན་པའི་ནང་དུ་བྱིན་ལྡན་རྟེན། །
བཞུགས་པ་ཐོས་གྱུར་མངོན་སུམ་མཇལ་བར་ཕྱིན། །

༣༨༡ རིག་འཛིན་རྒོད་ཀྱི་ལྡེ་འཕྲུས་གཏེར་གྱི་སྒོ། །
འབྱེད་བྱེད་སྣང་སྲིད་གསལ་བའི་ལྡེ་མིག་དང་། །
གོར་མར་ཡིག་དྲུག་མ་ཎི་རང་བྱོན་སོགས། །
དང་བའི་ལྷ་རེག་བཏེགས་པའི་གཉེན་དུ་བྱས། །

༣༨༢ གུང་ཟས་རོལ་བའི་བསྟི་སྟངས་དེ་ནས་བགྱིས། །
རི་བོའི་རྩེ་ན་ཁ་བའི་འདབ་མ་དང་། །
ཡངས་པའི་ཐང་ན་བྱེ་རླུང་འཐབ་པ་ཡི། །
དབྱར་ཟླའི་མཛེས་པ་བོར་བའི་ལམ་དག་བཅད། །

༣༨༣ ངམ་རིང་རྫོང་ལ་བདེ་མོ་འཇོག་པ་དང་། །
ས་དགའ་རྫོང་གི་ཕེབས་བསུ་བྱེད་པ་གཉིས། །
ལྷན་ཅིག་བྱེད་པའི་ཆ་ལ་མ་བགོས་ཀྱང་། །
ལས་ཀྱི་བགྱི་བ་ཞིག་གིས་ལྷན་ཏུ་འཛོམས། །

༣༨༤ རེས་འགར་གཡང་གི་སྒོ་ཕྱུགས་ཞལ་ཟས་ལ། །
སྔོ་ལྗང་ཐགས་སུ་བཀྲ་བའི་མཛེས་པ་དང་། །
རེས་འགར་མི་སྡུག་ལང་ཚོ་འཛིན་པའི་གཞུང་། །
རིམ་པ་བཞིན་དུ་མཐོང་བྱེད་ལམ་དུ་གསལ། །

༣༨༥ སྔོན་ཚེ་ཆོས་རྒྱལ་ཁྲི་སྲོང་ལྡེའུ་བཙན་སྐབས། །
མཐའ་འདུལ་ཡང་འདུལ་བྱ་བའི་གཙུག་ལག་ཁང་། །
བྱས་པའི་ཡང་འདུལ་དཔལ་བདུན་དགོན་པ་ཞེས། །
ཨོ་རྒྱན་ཞབས་ཀྱིས་བཅགས་པའི་གནས་སུ་ཕྱིན། །

༣༨༦ གང་ན་ཚོགས་གཉིས་སྒོ་འཕར་འབྱེད་པའི་གཉེན། །
རྟེན་གྱི་གཙོ་བོ་སངས་རྒྱས་འོད་སྲུང་གིས། །
རྐང་བདུན་དབུ་སྐྲ་གཟུངས་སུ་གཞུག་པ་ཡི། །
རྣམ་ལྷ་དཀར་པོ་ལ་སོགས་སྤྱི་བོར་མཆོད། །

༣༨༧ དེ་ནས་མི་རིང་གནས་སུ་ཆགས་པ་ཡི། །
ཆེ་བ་མ་ཡིན་འབྲོག་པོ་བྱ་བའི་རྫོང་། །
ངལ་བ་གསོ་བའི་གནང་ཚང་འཚོལ་བ་ལ། །
གསེར་མིག་ཆུང་ངུ་ཞིག་གི་བརྟུལ་ཞུགས་བཟུང་། །

༧.༢༥ཉིན་བཀྲ་བཟང་དགོན་ནས་འབྲོག་པོ་རྫོང་ལ་བགྲོད་པའི་ཟིན་ཐུན། #✍️ དྲང་འཇུག།#

今天是藏历二十五日十方空行母等至尊圣度母的殊胜加持日，无论行善与恶都会变动一千一百万倍。ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།།
རྗེ་བཙུན་འཕགས་མ་སྒྲོལ་མ་ཁྱེད་མཁྱེན་ནོ།།
འཇིགས་དང་སྡུག་བསྔལ་ཀུན་ལས་བསྐྱབ་ཏུ་གསོལ།།