༄༅།། དོ་ནུབ་རྣམ་ཐར་གྱི་ཡི་གེ་ཆེན་མོ་དག་ལ་ཕྱིར་མིག་གི་དད་པས་ཡང་ཡང་བལྟས་པ་ན། དེང་རབས་སྤྱི་ཚོགས་ཀྱི་དྲ་བའི་ལམ་ནས་ཆེས་དགའ་བསུ་ཐོབ་པའི་ཨང་གྲངས༡༣༧༦ཟེར་བ་དེའི་ནང་དོན་གཞན་ཞིག་ཀྱང་ཤེས་སོང་། ཨང་གྲངས་དེ་ནི་རྗེ་བླ་མ་ཉིད་ཀྱིས་ཐོས་བསམ་སྒོམ་གསུམ་གྱི་གྲགས་པ་ས་གསུམ་ལ་ཁྱབ་སྟེ་ཅི་བསམ་གྱི་དོན་མཐའ་དག་འགྲུབ་པའི་ལོ་ཚིགས་ཞིག་ཡིན་པས་ཕྱི་རབས་ཀྱི་གདུལ་བྱ་མང་པོས་ཨང་གྲངས་དེ་ནི་བཀྲ་ཤིས་པའི་ཨང་གྲངས་ཞིག་ལ་ངོས་འཛིན་བྱེད་པའི་རྒྱུ་མཚན་གཞན་ཞིག་ཡིན་ནོ།།

གསོལ་འདེབས་སྨོན་ཚིག་བདེན་པའི་སྒྲ་དབྱངས།

མཛད་པ་པོ།   འཕགས་མཆོག་ཕྱག་ན་པདྨོ།

༄༅། །མཁྱེན་བརྩེའི་ཡོན་ཏན་མཐར་ཐུག་ཀུན་རྫོགས་ཤིང་། །

པད་དཀར་ལྟར་བསྔགས་ཡིད་ཅན་ཀུན་གྱི་མགོན། །

རྟེན་འབྱུང་གཏམ་གྱིས་སྡུག་ཀུན་གཞིལ་མཛད་པའི། །

རྣམ་འདྲེན་ཤཱཀྱ་སེང་གེ་སྤྱི་བོས་མཆོད། །

ཁྱོད་བསྟན་བྱང་ནས་བྱང་དུ་དར་འགྱུར་ཞེས། །

ཇི་ལྟར་དཔལ་གྱི་མགུར་ནས་དབུགས་དབྱུང་ལྟར། །

ཁ་བའི་ལྗོངས་སུ་རྒྱལ་བསྟན་ཡོངས་ཁྱབ་སྟེ། །

འཛམ་གླིང་རྒྱན་དུ་གྱུར་པ་སྐལ་བ་བཟང་། །

དེ་ལྟ་ན་ཡང་དཀར་མིན་ལས་དབང་གིས། །

དེང་འདིར་རྒྱལ་བསྟན་ཉམས་ཤིང་སྣོད་བཅུད་ཀུན། །

སྡུག་ཟད་འཇིག་ཉེའི་ཉམ་ངའི་ངང་ཚུལ་འདི། །

བརྩེ་ཆེན་ཐུགས་རྗེས་སྐྱོབ་བའི་དུས་ལ་བབས། །

དེ་སླད་བདག་ཅག་གངས་ལྗོངས་ལྷ་མི་ཀུན། །

ལྷག་བསམ་དད་གདུང་དྲག་པོས་ཉེར་བཟླུམས་ཏེ། །

བདེ་གཤེགས་མཚན་བཟང་གཙུག་ཏོར་གསེར་སྦྱངས་ཏོག །

དྲང་སྲོང་སྣོད་མཆོག་ངུར་སྨྲིག་གོས་བཟང་སྡེར། །

ཕུལ་བའི་ཚོགས་གཉིས་རྒྱ་ཆེན་གང་མཆིས་དང་། །

གཞན་ཡང་དུས་གསུམ་དང་འབྲེལ་དགེ་ཚོགས་ཀུན། །

ལྷར་བཅས་འགྲོ་བའི་ཕན་བདེ་འབྱུང་བའི་གནས། །

རྒྱལ་བསྟན་མི་ནུབ་ཡུན་དུ་གནས་ཕྱིར་བསྔོ། །

མཁའ་ཁྱབ་ལུས་ཅན་སྤྱི་དང་ཁྱད་པར་དུ། །

འཛམ་བུའི་སྒྲས་བསྟན་གླིང་འདིའི་སྐྱེ་འགྲོ་ཀུན། །

བྱམས་དང་སྙིང་རྗེའི་བསམ་སྦྱོར་གོང་འཕེལ་ནས། །

འཁྲུགས་རྩོད་གནོད་འཚེ་ནམ་ཡང་མི་འབྱུང་ཤོག །

དབུལ་ཕོངས་ཉམ་ཐག་བཙན་གནོད་མནར་གཅོད་དང་། །

སྣོད་ཀྱི་རྒུད་པས་ནད་ཡམས་འབྱུང་འཁྲུགས་སོགས། །

ཕྱི་ནང་འགལ་རྐྱེན་རྒུད་ཚོགས་ཀུན་ཞི་ནས། །

ཐམས་ཅད་དགའ་བདེའི་དཔལ་ལ་རྟག་རོལ་ཤོག །

རིས་སུ་མ་ཆད་ཕྱི་ནང་ཆོས་ཚུལ་ལ། །

ཞུགས་ཀུན་ཕན་ཚུན་གཉེན་གཤིན་འདུ་ཤེས་ཀྱིས། །

དག་སྣང་ནོར་བུའི་འོད་དང་མི་འབྲལ་བར། །

གཅིག་ཏུ་འགྲོ་ཕན་བྱ་བ་ལྷུར་ལེན་ཤོག །

ལྷག་པར་བསིལ་ལྡན་ལྗོངས་སུ་རྒྱལ་བའི་བསྟན། །

ཉམས་པ་སོར་ཆུད་མི་ཉམས་གོང་འཕེལ་ཞིང་། །

ཆོས་སྲིད་རང་དབང་བདེ་སྐྱིད་གསར་པ་ཡིས། །

བོད་འབངས་འཕྲལ་ཡུན་འདོད་དོན་མྱུར་འགྲུབ་ཤོག །

གངས་ཅན་ཞིང་གི་ཆོས་སྲིད་བྱ་བའི་གདུགས། །

འདེགས་པའི་སྲིད་ཞུར་གཏོགས་པའི་སྐྱེ་བོ་ཀུན། །

ལྷག་བསམ་རྣམ་དཔྱོད་དཔུང་པ་རབ་བརྟན་ཅིང་། །

སྐྱེ་ཀུན་ཕྱག་ན་པད་མོས་རྗེས་གཟུང་ཤོག །

ཆོས་ཀྱི་ཞིང་དུ་ཆོས་མིན་ཉེས་སྤྱོད་ཚོགས། །

ཆོས་ཀྱིས་ཞི་ཞིང་ཆོས་སྲིད་ལེགས་ཚོགས་ཀུན། །

ཆོས་ལྡན་ཡིད་བསམ་ཆོས་བཞིན་མྱུར་འགྲུབ་སྟེ། །

ཆོས་ཀྱི་བདེན་པས་ཆོས་མིན་མཐར་བྱེད་ཤོག །

ཅེས་པ་འདི་བཞིན་ཤཱཀྱའི་དགེ་སློང་ཏཱ་ལའི་བླ་མ་བསྟན་འཛིན་རྒྱ་མཚོས་བོད་རྒྱལ་ལོ་༢༡༣༡ ཤིང་སྤྲེལ་ཟླ་བ་ ༡༢ ཚེས་ ༡༥ ཕྱི་ལོ་༢༠༠༤ ཟླ་ ༡ ཚེས་ ༢ ཉིན་སྤྱི་སྒོས་བསྟན་འགྲོའི་ཆེད་དུ་དམིགས་ཏེ་གནས་ཆེན་རྡོ་རྗེ་གདན་གྱི་རྟེན་མཆོག་སྤྱན་སྔར་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག། །

༄། དེ་རིང་དྲ་ལམ་ནས་ཕྲུ་གུ་བཙས་ནས་ཡུན་རིང་མ་ཕྱིན་པའི་ཨ་མ་ཞིག་གི་གཏམ་ཞིག་ཐོས། མོ་རང་གིས་གཡོག་མོ་གླས་ནས་ཕྲུ་གུ་ལ་ལྟ་སྐྱོང་བྱེད་འཇུག་བཞིན་ཡོད་པར་ཟད། ནུ་ཞོའང་ཤེལ་དུམ་ནང་ལ་ཞོས་ནས་གཡོག་མོ་ལ་ནུ་ཞོ་ལྡུད་འཇུག་བཞིན་ཡོད་ཟེར། དེ་ཐོས་དུས་སེམས་པ་འདྲ་སྐྱོ་སོང་། རྒྱུ་མཚན་ནི། ཉེ་ཆར་སེམས་ཁམས་རིག་པ་སྦྱངས་དུས་བྱིས་པ་དམར་རྗེན་ལ་བརྩེ་བ་ཅི་འདྲའི་གལ་ཆེན་པོ་ཡིན་པ་དང་བྱིས་དུས་ནི་དར་མའི་སེམས་ཁམས་བདེ་ཐང་ལ་ཤུགས་རྐྱེན་ཟབ་མོ་ཅི་འདྲ་ཡོད་པ་ཤེས་བྱུང་། ཐོག་མ་ནས་སེམས་ཁམས་སྦྱངས་དུས། སྦྲུམ་མ་དང་ཕྲུ་གུ་ཆུང་ཆུང་གི་ཕ་མས་ཚོས་ངེས་པར་སེམས་ཁམས་རིག་པ་ལྟ་དགོས་ས་རེད་སྙམ་བྱུང་། མ་གཞི་ང་ལ་འདིའི་ཐད་སྐད་ཆའི་སྐལ་མེད་ཀྱང་། ཉེ་ཆར་ཤེས་རྟོགས་བྱུང་བའི་སེམས་ཁམས་རིག་པའི་ལྟ་བ་ཁ་ཤས་འདིར་འགོད་འདོད་བྱུང་།

ཉམས་མྱོང་ཁ་ཤས་ནི་ཉམས་མྱོང་གཞན་ལས་ང་ཚོ་ལ་ཡུན་རིང་ཤུགས་རྐྱེན་ཐེབས་པའི་རྒྱུ་མཚན་ཅི་ཡིན་ཞེས་ན། འདིའི་འདྲི་ལན་གྱི་ཆ་ཤས་ཤིག་ནི་ང་ཚོ་བྱིས་དུས་ཀྱི་ཚོར་བ་སྐྱེན་པའི་དུས་དང་འབྲེལ་བ་ཡོད་ཟེར། ཚོར་བ་སྐྱེན་པའི་དུས་ནི། བྱིས་པ་ལ་དམིགས་བསལ་གྱི་ཁོར་ཡུག་གི་ཤུགས་རྐྱེན་ཐེབས་སླ་བའི་དུས་ཤིག་ཡོད་པ་དེ་ལ་ཟེར་ཞིང་། དུས་དེར་བྱུང་བའི་དོན་དག་གིས་ཕྲུ་གུའི་འཚར་ལོངས་ཀྱི་བརྒྱུད་རིམ་ཡོངས་སུ་འགྱུར་བ་གཏོང་ཐུབ། དཔེར་ན། ང་ཚོ་ཆེན་པོའི་སྐབས་ཀྱི་སེམས་ཁམས་བདེ་ཐང་ནི་ང་ཚོ་ཆུང་བའི་དུས་དང་འབྲེལ་བ་ཆེན་པོ་ཡོད་པ་རེད། ཆུང་དུས་བྱམས་སྐྱོང་མ་ཐོབ་པའི་མི་དེ་ཆེན་པོ་ཆགས་དུས་སེམས་ལ་གནད་དོན་མང་པོ་ཡོད་པར་མ་ཟད།གནད་དོན་དེ་དག་མི་ཚེ་གང་པོ་མི་དེ་དང་འགྲོགས་ངེས་རེད། མདོར་ན། བྱིས་པ་ལ་བརྩེ་བ་ནི་ནུ་ཞོ་ནང་བཞིན་གལ་ཆེ་བ་ཡིན་ཞིང་། ཕྲུ་གུ་དམར་འབྱར་དང་ཨ་མར་བར་ལ་བརྩེ་དུང་གི་འབྲེལ་ཐག་འཛུགས་རྒྱུ་ནི་ཕྲུ་གུའི་ཚེ་སྲོག་གི་ལོ་དང་པོའི་ནང་གི་འགག་རྩའི་དོན་ཆེན་དེ་ཡིན་པར་མ་ཟད། ཕྲུ་གུ་རྗེས་མ་ནར་སོན་དར་མའི་སྐབས་དང་མི་གཞན་དང་འབྲེལ་ལམ་ལེགས་པོ་འཛུགས་ཐུབ་མིན་ཡང་འདི་ལ་རག་ལས་པ་ཡིན།ཟེར།