ཞོགས་པ་

གདོང་པ་བཀྲུས་ཚར་རྗེས།
དལ་བུར་སྒེའུ་ཁུང་ནས་ཕྱིར་བལྟ་ཞིག་བྱེད་དུས།
གཙང་གཞུང་ཐལ་རྡུལ་གྱིས་ཁེངས་འདུག
གཙང་འགྲམ་གྱི་ལྗོན་་ཤིང་ཆང་གི་བཟི་བའི་ཕོ་རྒོད་ཞིག་དང་འདྲ་བར།
ལུས་པོ་ཚང་མ་རང་དབང་མེད་པར་འཁྱོར་བཞིན་མཆིས།
ཁང་ཆུང་གི་ཐོག་ཁར་ཡོད་པའི་དར་ལྕོག་ཚོ་ཡང་རླུང་གི་ཁ་ཕྱོགས་ལ་མ་བལྟས་པར་གང་སར་གཡོ་བཞིན་འདུག
སྐབས་དེར་

ང་ངོ་མ་དངངས་ཚབ་ཆེན་པོ་སྐྱེས་བྱུང།
དགུན་ཁ་སླར་ཡང་སླེབས་པ་མིན་ནམ།
ཐལ་རྡུལ་གྱི་ཁྲོད་དུ་ཟམ་ཆེན་ཁྱེད་མཐོང་རྒྱུ་མི་འདུག་ལ།
བྱང་ཕྱོགས་སུ་ཡོད་པའི་རི་བོ་ཐང་ཁུག་ཕྱེ་བཏང་སློག་པ་འདྲ་བ་ཚོ་ཡང་མོག་མོག་ཙམ་ཞིག་ལས་མི་གསལ།
ཨ་ཙི་

ངོ་མ་དགུན་ཁ་སླེབས་པ་ཡིན་ནམ།
ཡུལ་འདིར་གྲགས་ཆེ་བའི་རྟ་དཀར་པོ་ཁྱེད་སླར་ཡང་བྱོན་པ་ཡིན་ནམ།
ངོ་མ་སྔར་སྐྱེ་མ་མྱོང་བའི་འཇིགས་སྣང་ཞིག་སྐྱེས་བྱུང་།
ཞིབ་པར་བལྟ་དུས་ང་རང་འཁྲུལ་བ་འདྲ།
ད་ལྟ་

ལྗོན་ཤིང་གི་འདབ་མ་ཟག་མི་འདུག
འོང་སྐོར་དུས་ཆེན་བཏང་མི་འདུག
བཙས་མ་ནི་དེ་བས་བསྔས་མི་འདུག
ནམ་མཁར་ཁྲུང་ཁྲུང་ནི་འཕུར་མཁན་མི་འདུག
དེ་བས་ང་རང་དབྱར་སྐྱིད་གླིང་ཁ་གཏོང་བར་ཡང་འགྲོ་རྒྱུ་རེད་འདུག
ངོ་མ་ང་རང་འཁྲུལ་བ་འདྲ།
༢༠༢༢-༧-༡༧ཉིན་
ལྷན་རྒྱས་ཕྱོགས་ནས་བྱམས་བརྩེའི་བཀའ་སློབ་ཡོད་པར་མཁྱེན།

རྟག་ཏུ་བླ་མ་མ་བརྗེད་གསོལ་བ་ཐོབས།
རྟག་ཏུ་དྲན་ཤེས་ཀྱིས་ཤིག་རང་སེམས་གཤོད།
རྟག་ཏུ་འཆི་བ་མ་བརྗེད་དམ་ཚིག་སྲུང་།
རྟག་ཏུ་བརྩེ་བ་མ་བརྗེད་དགེ་རྩ་བསྔོས།
—དིལ་མགོན་མཁྱེན་བརྩེས།
不要忘记上师，时时向他祈求。
不要随顺妄念，时时观照自心。
不要忘记死亡，时时谨守戒律。
不要忘记有情，时时回向功德。
—顶果钦哲法王 ​

​

དོ་དགོང་། ང་ཕ་ཡུལ་དུ་ཡོད།
དོ་དགོང་། ང་ཕ་ཡུལ་དུ་ཡོད།
ཚ་ཟེར་དབང་པོ་ནུབ་རིར་བཞུད་རྗེས།
ང་རང་གནའ་གྲོང་འདིའི་སྲང་ལམ་གསར་པ་བརྒལ་ནས་ཞིང་ཐང་དུ་འགྲོ་འདོད་བྱུང་།
ཕྱི་རོལ་དུ། རླུང་བསིལ་པོ་ཞིག་ལྡང་བྱུང་བས།
ཚ་བས་གདུངས་པའི་སྐྱེ་འགྲོ་ཡོངས་ལ་བདེ་བ་ཁྱད་པར་ཅན་ཞིག་སྟེར།

སྐྱི་བསེར་གྱི་རེག་བྱ་འཇམ་པོ་ལོངས་སུ་སྤྱོད་བཞིན།
ཁ་པར་ལས་བོད་གླུ་སྙན་མོ་རེ་རེ་རྣ་བའི་བཅུད་དུ་འདྲེན་བཞིན།
འདྲིས་ཆེ་ལ་རྒྱུས་མངའ་མེད་པའི་ཁྲོམ་གཞུང་དེ་བརྒྱུད་སྐབས།
རང་ཉིད་ནི་ལོ་རྒྱུས་དང་དེང་རབས་ཀྱི་བར་སྟོང་དུ་རེས་སུ་འཁོར་བའི་སྣང་བ་འགོག་མེད་དུ་སྐྱེས།

མུན་པའི་ཡོལ་བ་སྲབ་པོ་ཞིག་གནམ་མཐའ་ནས་རིམ་གྱིས་བཀབ་བྱུང་བས།
གྲོང་ཚོ་དང་ཞིང་ཐང་ཡང་རང་མདངས་བཀབ་སྟེ་གཉིད་དུ་ཡུར།
དེ་མར་གློག་སྒྲོན་རེ་རེ་ལམ་འགྲོ་བའི་མདུན་ལམ་སྟོན་པའི་གྲོགས་སུ་སླེབས་བྱུང་།
གྲོང་ཚོའི་གྲག་འགུལ་འཇགས་པས་རླུང་བུའི་རྒྱུ་བ་ལ་མྱོང་བཞིན།
འགྲམ་དུ་ཁྱོད་རང་ཡོད་ན་ཅི་མ་རུང་སྙམ།
གནས་སྐབས་འདི་ནི་བྱེད་པོས་ཆེད་དུ་མཛའ་མཐུན་གྲོགས་ལ་གནང་བའི་ལེགས་སྐྱེས་རྩ་ཆེན་ཞིག་མ་ཡིན་ནམ།
འོན་ཀྱང་། ཁྱེད་རང་གམ་དུ་མེད་པས་ཐབས་ཅི།

གློག་སྒྲོན་འོག་ཏུ་དམིགས་མེད་དུ་འཆམ་སྐབས།
སེམས་ཁོང་དུ་འདས་ད་ལྟ་མ་འོངས་གསུམ་གྱི་དོན་དག་གཅིག་འཇགས་གཉིས་ལངས་ཀྱིས་འཛིངས།
ཁེར་རྐྱང་གི་སྣང་བ་བན་བུན་དུ་སྐྱེས།
མདུན་ངོས་ནས་ཆང་ཁང་ཞིག་མིག་ལམ་དུ་འཚེར་དུས།
སྦི་རག་གར་པོ་གྲང་བསིལ་བསིལ་ཞིག་འཐུང་འདོད་སྐྱེས།
འོན་ཀྱང་ལག་དོ་མེད་པར་གཅིག་པུར་བཏུང་ན་ངོ་མི་ཚའམ།
སུ་ཞིག་ལ་ཁ་པར་གཏོང་དགོས་བསམས་མོད་སུ་ཞིག་ཀྱང་མ་དྲན།

ཐང་ཆེན་དུ། གྲོང་མི་མང་པོ་འཛོམས་འདུག
རྒྱང་གྲགས་ནས་ནག་ཆུའི་སྒོར་གཞས་གཏོང་བཞིན་འདུག
ཕོ་མོ་རྒན་གཞོན་མང་པོ་ཞིག་སྒོར་གཞས་རྒྱག་བཞིན་འདུག
མཐའ་འཁོར་ལྟད་མོ་བ་དེ་ལས་མང་།
དེ་དག་ལས་མང་ཆེ་བ་མགོ་སྒུར་ནས་ཁ་པར་ལ་ལྟ་བཞིན་འདུག
དེ་དག་ལས་ཕལ་ཆེ་བ་ཕྲུ་གུ་ཆུང་ཆུང་རེད་འདུག

ངས་རྒྱང་ཐག་གང་ཙམ་ནས་ཁོ་ཚོར་ལྟས།
ཡུལ་མི་འདི་དག་ཚང་མ་རྒྱུས་མེད་དུ་མཐོང་།
ཕ་ཡུལ་འདི་ཡང་རྒྱུས་མེད་དུ་མཐོང་།
ཁག་ཅི་ཡོད།
ང་དང་ཕ་ཡུལ་ཁ་བྲལ་ནས་བགྲང་བྱ་དུ་མ་འདས་ཟིན།
ངའི་ཕ་ཡུལ་མི་ལོ་ཉི་ཤུའི་གོང་རོལ་ནས་འཇིག་རྟེན་འདི་ནས་གྱེས་ཟིན།
ཤུལ་དུ་ལུས་པའི་སྲང་ལམ་དང་ཁང་པ་རྙིང་སོང་དེ་དག་ནས་ངས་ངའི་ཕ་ཡུལ་གྱི་བཞིན་རས་དང་ངའི་བྱིས་དུས་དུས་ཀྱི་འཚོ་བ་བཙལ་མོད།
དེ་ནི་དྲན་སྣང་ཁྲོད་ཀྱི་ཨ་ཕྱིའི་བྱད་བཞིན་འཚོལ་བ་ལྟར།
ཅིའདྲའི་དཀའ་མོ་ཞིག་རེད་ཨང་།
ད་ལྟའི་ཕ་ཡུལ་ནས་བརྗོད་ན།
ང་རང་ཡང་འགྲུལ་པ་ཞིག་ལས་ཡུལ་མི་ཞིག་ག་ལ་ཡིན།

ཕྱི་རོལ་དུ། བསིལ་རླུང་ཡིད་ཚིམས་པ་ཞིག་ལོངས་སུ་སྤྱད་རྗེས།
རང་ཁྱིམ་དུ་ལོག
ལམ་བར་དུ་མགོ་བོ་བཏེགས་ཏེ་གནམ་ལ་ལྟས་པས།
གཡས་གཡོན་གྱང་མཐོ་པོའི་བར་ནས།སྐར་ཚོགས་ཁྲ་ལྷམ་མེར་མཐོང་བས།
ཡིད་ལ་ཡ་མཚན་དང་སྤྲོ་སྣང་མཉམ་དུ་རྒྱས།
ངས་སྐར་ཚོགས་མ་མཐོང་བར་ཡུན་རིང་སོང་།
དོ་དགོང་། ཕ་ཡུལ་གྱི་མཚན་དགུང་ནས་གཞི་ནས་མཐོང་།
ང་རང་ཕྲུ་གུའི་སྐབས་ཀྱི་མཚན་དགུང་བཞིན།

ཕ་ཡུལ། རྒྱང་བཞུད་ཀྱི་རྨི་ལམ།
ངའི་མངོན་དུ་མ་འགྱུར་བའི་ཕུགས་བསམ།
དྲན་པའི་ཀློང་ནས་རིམ་གྱིས་ཡལ་བའི་ཡུལ་ལྗོངས།