མ་བཅོས་ལྷུན་གྱིས་གྲུབ་པའི་རང་བྱུང་ཁམས་ཆེན་མོ།།
མ་སྨད་མཛེས་སྡུག་རྫོགས་པའི་ཁ་བ་ཡི་རུ་བ།།
ཁྱོད་དང་ང་ཡི་གཞིས་ཀྱི་ཕ་ས་རུ་གྱུར་ཚེ།།
རྩོལ་མེད་ལྷུག་པར་གྲོལ་བའི་དགའ་བ་ཞིག་འཁྱིལ་ཡོད།།

དབལ་མང་པཎྜིཏ་དཀོན་མཆོག་རྒྱལ་མཚན་གྱིས།
ང་ཤི་བའི་ཚེ་ན་འདི་ཐོན་ཞེས།།
སྨྲ་དཀའ་བཞིན་ཁ་ཆེམས་འཇོག་པ་ལས།།
སྐབས་འདི་རུ་སྡིག་པར་མི་དགའ་བར།།
ཆོས་བྲེ་གསོག་ཕུད་གསོག་བྱས་ན་ལེགས།།

ཉི་འོད་རབ་ཏུ་ཚ་བས་རྩི་ཤིང་ལོ་མ་ཐམས་ཅད་ཀྱང་སྐམ་མི་འགྲོ་སྙན་པ་ཞིག་འདུག

སྐབས་འདི་ལ་ཆུ་འོག་ཅིག་ཏུ་འཛུལ་འདོད་སྐྱེ། ཉ་མོ་དག་ལ་སྨོན་པ་འཆོར། འཁྱག་སིབ་སིབ་ཀྱི་ཆུ་རྫིང་ཞིག་གི་ནང་དུ་མཆོང་ལྡིང་བྱེད་ན་འདོད། དབྱར་སླེབས་པ་དང་ཚ་བ་རྒྱས་དྲག་པའི་སྐབས་འདི་དག་ལ། ཆེས་མཆོག་ཏུ་གྱུར་བའི་ལོངས་སྤྱོད་ཅིག་ཡོད་པ་དེ། ཆུ་ལ་རྩེ་བ་དེ་ཡིན་མོད། རུ་ཁུག་ལུང་ཁུག་ན་འཚོ་བཞིན་པའི་ཁོ་བོའི་ཉེ་འཁོར་དུ་ཆུ་ལ་རྩེ་རུ་འགྲོ་ས་ལེགས་པོ་ཞིག་ཀྱང་མི་འདུག་པས་བྱ་ཐབས་ཟད་དེ། རྔུལ་ཆུས་ཕྱི་ནང་བརླན་ནས་བསྡད་ཡོད། གྲོང་ཁྱེར་ཆེ་ས་དག་ན་ཚད་ལྡན་གྱི་ཆུ་རྫིང་མཆོག་ཏུ་གྱུར་བ་དེ་འདྲ་མང་བོ་མཆིས་ནའང་། ནད་ཡམས་ལ་སྐྲག་ཏེ། དེ་དག་ཏུ་འགྲོ་བར་མི་ཕོད། དེ་ནི་འཚིག་ཇ་ཞིག་གསོལ་ཞོར་དུ་གཡའ་དག་པའི་ནམ་མཁའ་ན་སྤྲིན་པའི་ལུག་ཁྱི་ཞིག་གཤར་བཞིན་པའི་རྣམ་པ་སྙིང་དུ་སྡུག་པ་དེ་ཉམས་སུ་མྱོང་ནས་བསྡད་ཡོད། མཐའ་ཡས་པའི་ནམ་མཁར་ཞིབ་ཏུ་ལྟ་ཐེངས་རེར་རང་བྱུང་སྣོད་བཅུད་ལ་མཚར་སྣང་སྐྱེས་ཡོང་། ཁོ་བོ་ནི་གང་ཞིག་ལ་ཡོད་དམ། ཁོ་བོའི་མི་མཐོང་བའི་གནས་སུ་འཇིག་རྟེན་གྱི་གསང་བ་ག་ཚོད་ཡོད་དམ། ཞིང་བྱེ་བ་ཕྲག་བརྒྱ་ཞེས་པ་དེ། གནས་གང་ཞིག་ཏུ་ཡོད་དམ། ཡང་ན་སྐར་མ་རེ་རེ་ནི། གོ་ལ་རེ་རེ་ཡིན་ན། སྐད་ཚོགས་གྲངས་ཀྱིས་མི་ཟིན་པ་དེ་ཉིད། གོ་ལ་གྲངས་ཀྱིས་མི་ཟིན་པ་ཞིག་ཡིན་ངེས་པས། གོ་ལ་གཞན་དེ་དག་གི་སྣོད་བཅུད་དག་ཀྱང་ཇི་འདྲ་ཞིག་ཡིན་སྲིད་དམ་སྙམ་ཏེ། དྲི་བ་འཁྱམ་པོ་མང་བོ་ཞིག གློ་བུར་གློ་བར་དུ་སེམས་ངོར་མཆོང་ཡོང་། དེ་ལྟར་སྟོང་ཁམས་ཆེན་མོའི་རྒྱ་ཁྱོན་དེ་ཡིད་དུ་བྱས་པ་ན། རང་ཉིད་དང་། ཡང་ན་མིའི་རིགས་ནི། གྲོག་མ་ཞིག་དང་འདྲ་བར་ཇི་འདྲའི་ཉམ་ཆུང་བ་ལ་བསམ་པ་དང་། ང་ཚོའི་འགྲོ་འཆག་ཉལ་འདུག་གི་འདུ་བྱེད་ཚང་མ་ཡང་གྲོག་མའི་འདུར་རྒྱུག་གི་འཚོ་བ་དེ་དང་འདྲ་བོ་འདུག་པས། ཇི་འདྲའི་གླེང་རིན་མེད་པ་ལྟ་བུ་ཞིག་རེད་དོ་སྙམ་དུ་དྲན་པའི་དུས་དེར། སྔར་ཚ་བས་གཙེས་ཏེ། ཆུ་ལ་མཆོང་འདོད་ཀྱི་རྣམ་རྟོག་མང་བོ་ཞིག་རྒྱུ་བཞིན་པ་དེ་ཡང་རེ་ཞིག་ཞི་འཇགས་སུ་སོང་ཚར་འདུག་གོ།།