ཀ་པ་ལ་ཐོག་སྐྲ་ལོ་དཀར་པོ་མགྲོན་ལ་ཕེབས་བྱུང་། །
ཁ་ཡི་ནང་ནས་རུས་སོ་འགའ་རེ་ཇག་ལ་ཤོར་ཐོས། །
ག་གལ་ངང་དུ་བདག་གི་མི་ཚེ་རྫོགས་པ་མཐོང་དུས། །
ང་ཡི་སེམས་ཁམས་རླུང་གིས་ཁུར་བ་སྐྱོ་གར་ངོ་མ། །

ཅ་ཅོ་ཆེ་བ་འཁོར་བའི་གྲོང་ནས་ཨེ་ཐར་སྙམ་ཞིང་། །
ཆ་ལུགས་བསྒྱུར་ཞིང་ཆོས་ལ་བསླབས་ཀྱང་ཆོས་ནི་མ་ཤེས། །
ཇ་ཆང་ལ་སོགས་འཁོར་བའི་ཕུན་ཚོགས་ཡིད་ལ་འཆར་བ། །
ཉ་མོ་ཆུ་ནང་ལྕགས་ཀྱུས་ཟིན་པ་སྐྱོ་གར་ངོ་མ། །

ཏ་ལེ་འདི་འདྲ་མི་ལུས་རིན་ཆེན་རིན་མེད་ཤོར་དུས། །
ཐ་མར་ཉལ་སར་ལང་མ་ཤེས་པའི་འཚོ་བ་འདི་ཡི། །
ད་ལྟ་སློབ་པའི་ཤེས་བྱའི་དོན་ནི་དོ་ནུབ་རྗེད་ནས། །
ན་རག་ཡུལ་དུ་འགྲོ་དགོས་ཐུག་པ་སྐྱོ་གར་ངོ་མ། །

པ་ཏྲ་འཁྱིལ་འདྲའི་འཇིག་རྟེན་ཁྲ་ཁྲ་འཇིག་པའི་ཡུལ་འདིར། །
ཕ་ཡུལ་སྤང་ནས་དགོན་པར་བྲོས་ཀྱང་ཆོས་གཅིག་མ་འགྲུབ། །
བ་ཉལ་མཛོ་གྲོད་གཉིད་ཀྱི་ངང་དུ་མི་ཚེ་རྫོགས་པ། །
མ་གདན་རྨག་གཞི་ཤིན་ཏུ་ཞན་པ་སྐྱོ་གར་ངོ་མ། །

ཙ་བྱཱ་བཞིན་དུ་འཁོར་བར་དཀྲི་ཞིང་ཆོས་ལམ་ཤོར་ཐོས། །
ཚ་ཁར་ཚད་ནས་མདའ་མོ་འཕངས་ཡང་ཉོན་མོང་མ་སོད། །
ཛ་གད་སོགས་ཀྱི་ཚོགས་འཁོར་བསྐོར་ཡང་དངོས་གྲུབ་མ་ལོན། །
ཝ་ལེ་ང་ཡིས་ལས་དབང་འདི་ནི་སྐྱོ་གར་ངོ་མ། །

ཞ་ཆག་ཤོར་བའི་བདག་གི་མདུན་ལམ་འདིར་བཞིན་རྫོགས་པ། །
ཟ་བྱེད་ཆེན་པོ་སྲིན་པོས་མཐོང་ཀྱང་སྙིང་ཞིག་ལོས་རྗེ། །
འ་ཡོ་ཇི་འཞིན་ཕྱོགས་ཀུན་མཁྱམ་ཀྱང་ཅི་ཡང་མ་འགྲུབ། །
ཡ་ཁོག་སེམས་ཀྱི་གནས་ལུགས་མ་ཤེས་སྐྱོ་གར་ངོ་མ། །

ར་གཏུགས་མཛད་པའི་བླ་མའི་གདམས་ངག་སེམས་ནས་རྗེད་རྗེས། །
ལ་བ་དམར་པོ་ཚོས་ཁ་ལོག་ཀྱང་སེམས་ཁམས་མ་ལོག །
ཤ་ཁ་ལྟ་བུའི་བདག་གི་སེམས་འདི་ནམ་ཞིག་འགྱུར་ཨང་། །
ས་མྱི་བཞིན་དུ་ནུས་མེད་གྱུར་པ་སྐྱོ་གར་ངོ་མ། །

ཨ་ཉོག་དུས་ནས་ཆོས་དང་འཕྲད་པ་ལེ་ལོས་འཕྲོད་ཤོར། །
ཧ་ཅང་བཟང་བའི་བླ་མ་མཇལ་ཡང་གདམས་ངས་རྗེད་ཟིན། །
ཨ་བུའི་མི་ཚེ་སྤྲོ་བས་མ་རྫོགས་འཇིགས་པས་རྫོགས་པ། །
ཧ་ལ་ཤོར་བའི་ཚོང་པ་ནང་བཞིན་སྐྱོ་གར་ངོ་མ། །

ང་རང་ནི་ནམ་རྒྱུན་ཕུགས་བསམ་ཆེན་པོ་དང་དྭངས་རྩེ་མེད་པའི་མི་ཐ་ཤུལ་བ་ཞིག་ཡིན་པ་ཤེས་ཡིན་ན་ཡང་རང་གི་བྱ་བཞག་དང་རང་གི་འགན་ཁྲི་དག་གདོང་ལེན་བྱེད་པ་ནི་ཕུགས་འདུན་ཆུང་བ་དེ་ཡིན།

རང་ལ་ཕུགས་འདུན་ཆུང་ཆུང་དེ་མ་གཏོགས་མེད་ཀྱང་གཞན་གྱིས་ང་ལ་མཐོང་ཆུང་དང་འཕྱ་སྨོད་སོགས་བྱེད་བསམ་ནས་སྐྲག་གིན་མི་འདུག་དེ་མིན་ཕུགས་འདུན་གང་ཡང་མེད་པའི་མི་ཞིག་ལ་ལྟོས་ན་ང་རང་གི་ཕུགས་འདུན་ཆུང་ངུ་དེ་ཡང་ནམ་ཞིག་ན་ཡར་རྒྱུས་གོང་འཕེལ་དུ་འགྲོ་སྲིད་སྙམ་ནས་སེམས་དགའ་འོས་པའི་གནས་ཚུལ་ཞིག་ཀྱང་རེད་སྙམ།  ང་རང་ནམ་རྒྱུན་ཕུགས་བསམ་གྱི་ཆེད་དུ་གསོན།།
                                
                                          ༼༢༠༢༠ཟླ་བ་༤ཚེས༢༨ཉིན་བྲིས།༽

རི་འདིའི་ཕར་ནང་དུ་རུ་སྡེ་གཞན་པ་ཞིག་ཡོད་ལ། །
འཇའ་འདིའི་སྣེ་གཉིས་ཀྱང་དེ་ཡི་ཕྱོགས་ཤིག་ལ་ཟུག་འདུག །
ན་རྐོང་ཐམས་ཅད་དུ་ཆར་ཆུས་གང་སྟེ་ཡང་འཕོའོ། །
བྱིས་པ་སྐོར་ཞིག་གིས་འཇའ་ཚོན་བདའ་བཞིན་ཡང་ཡོད་སྲིད། །
ཁ་ཆུ་སར་དྲུད་ཀྱི་ལུག་གིས་སྤྲུགས་རྡེབ་འགའ་བྱས་སོ། །
ཆར་རྡུལ་ཡང་རྡུལ་ནི་ཁད་ཀྱིས་ས་གཞི་རུ་ཐོར་ཐལ། །
དེ་དང་མི་རིང་བའི་ས་རུ་ལ་ལོ་འགའ་འདུས་བས། །
རྟ་ཕོ་ཁམ་པ་ཞིག་རྩེད་སྐོར་སྟེག་བཞིན་དུ་མཐར་རྒྱུགས། །
གྲིབ་ཆེན་ལྷུང་འདྲ་ཡི་ནོར་ཁྱུས་མཐའ་ཞོགས་ཀྱང་བརྒྱབ་བོ། །
སྤྲིན་དཀར་ལྷུང་འདྲ་ཡི་ལུག་ཁྱུ་སྤྲིན་དཀར་ལ་འདྲེས་སོ། །