前港姐冠軍陳曉華（Hera）出席公開活動，透露新劇《回歸》即將煞科，之後將投入葉念琛新劇，問到有甚麼準備工夫？她笑說：「就係增肥，不過呢個都係藉口，因為個角色唔可以太瘦，但本身肥同埋腫都好容易（要增幾多磅？）冇實際嘅數字，只要塊面有番啲肉地好似可愛啲。」首次與葉導合作的她，坦言望稍後有機會一嘗拍電影滋味。

談到新一屆港姐招募，問到會唔會介紹身邊朋友參加？Hera表示：「身邊朋友唔係嗰個年代啦！其實咁多年來都冇人搵我做提名人，身邊啲朋友反而試過，所以都想有一次呢啲感覺，等我物色吓先！」

Hotcha組合前成員張惠雅（Regen）日前接受電台訪問時，重提與黎美言（Winkie）拗撬最多，直指她為人難相處，未必每個人都頂得順她的性格。今日黎美言（Winkie）出席遊戲節目宣傳活動時，將多年來受盡的冤屈氣發洩出來，激動爆喊作出大控訴：「其實我忍咗十幾年，由入行嘅時候，佢哋兩個（張惠雅及張紋嘉）已經對我單單打打。佢哋會話我扮大牌，其實睇住我成長嘅記者都知我只係一個妹，我只不過個樣生得惡，但我完全係冇攻擊性，而且我並唔係扮大牌嘅人嚟，而我呢個喊嘅舉動我都會有壓力。」

Winkie聲淚俱下續說：「但我發覺一提起佢哋兩個對我嘅傷害，我會好傷心。可能佢哋都會覺得我有傷害過佢哋，但至少咁多年來，我都保持佢哋個形像，冇用媒體嘅量力去話過佢哋一句半句，呢個係我同佢哋最大嘅分別。我個樣係冇佢哋兩個咁甜美，咁生得咁入屋，我認自己個樣惡，但我都有我嘅價值，唔需要喺網上面評論我嘅價值，咁多年嚟好辛苦，發覺原來唔係做緊自己，亦都冇諗過入娛樂圈係咁。其實我最傷心嘅係佢哋兩個，分別係喺我離開咗娛樂圈6年之後仲要攻擊我。其實我做生意都係想避開，想自力更生養活自己。其實我當初選擇離開組合係頂唔順佢哋啲小動作，咩小動作我就唔想再提。」

提及張惠雅事後對自己的言論向你道歉。Winkie表示：「我知道，我絕對接受。其實最傷害我心嘅人並唔係佢，係張紋嘉。但佢對我做過啲乜傷害，我呢一世都唔會講，就算死入棺材我都唔會講，係因為我唔想去數佢。而我點解同佢哋關係咁差，我相信主要係利害嘅關係而引起。而佢哋成日都會同人哋強調話好難頂得我順，話我好臭寸，大家相處嘅時候，總會對我單單打打。其實當時公司係知道有調停過，但都冇用。」

#汪明荃[超话]# 【農夫爆料畀你知】 汪明荃冇做過港姐司儀　因為鄭裕玲耍手段？港姐又嚟喇，實體決賽將會喺八月尾舉行。藝人鄭裕玲（嘟姐）長期為港姐做司儀，但另一鎮台之寶汪明荃就未做過，究竟係點解？農夫爆料畀你知！

話說新一輯嘅《Do姐有問題》，當中有條問題係「汪明荃從沒擔任過《香港小姐競選》嘅司儀」，主持C君就爆料：「我記得我哋一齊做港姐司儀時，份稿係叫我哋問你︰『嘟姐，點解阿姐咁多年都冇做司儀？』你就話︰『喂，唔好問呢個問題啦』，仲迫個撰稿員改咗份稿。」嘟姐即時話：「係咩？我點解要咁做呀？」陸永即補刀：「好似話係你當時用咗啲手段，搞到阿姐冇得做，一定要你自己做晒，嗰時係咁講！」嘟姐聽完嬲到想除鞋掟佢！不過，農夫講嘅嘢都係得啖笑，唔係事實嚟！但汪明荃真係一直都冇做過港姐司儀，真相究竟係點呢？