༈སེམས་ཀྱི་སྐད།
ལོ་མ་ཤག་ཤག་ཐོར་ནས།།
སྡོང་བོ་ཁེར་རྐྱང་ལུས་དུས།།
སྟོན་རླུང་དམར་པོའི་ཁྲོད་ནས།།
ཇ་ཁོལ་དྲན་སོང་མ་གསུང་།།
ས་གཞི་འཁྱག་གིས་བསྡམས་ནས།།
རི་མགོ་ཁ་བས་གཡོག་དུས།།
ཁ་བའི་འདབ་མའི་ཁྲོད་ནས།།
དཔྱིད་དཔལ་དྲན་སོང་མ་གསུང་།།
སྲང་ལམ་དོག་པོ་ཞིག་ནས།།
ཕོ་མོ་ཆ་རེ་མཐོང་དུས།།
ལས་ཀྱིས་བསྐོས་པའི་བྱམས་པ།།
ཐུག་འདོད་ཆེ་སོང་མ་གསུང་།།
ཟླ་བ་འཁྱག་པའི་འོག་ནས།།
ལུས་སེམས་ལྷག་པས་མནར་དུས།།
རྒྱུ་སྐར་མིག་ལ་བཟུང་ནས།།
དྲོད་འཇམ་གནང་རོགས་མ་གསུང་།།
མུན་པའི་འཇིག་རྟེན་འདི་ཡི།།
མི་སེམས་གྱ་གྱུ་ཆེས་བས།།
སྐྱིད་སྡུག་འདྲེས་མའི་ལས་ལ།།
སེམས་པ་སུན་སོང་མ་གསུང་།།

——————✍ཁམས་ཉི་གཞོན།
#藏族医学诗歌初探(藏文版)-普日科[图书]#

༈འཁྲུལ་སྣང་གི་མལ་ས།
——ལྟ་བ་མཉམ་གནས།
ལུང་དང་ལུགས་ལ་རྨོངས་པའི་མུན་པ་འཁྲིགས།།
རྟགས་དང་ཚད་མའི་གཞི་རྩར་རྐང་ཡ་མེད།།
ལུང་རིག་རྣམ་དཔྱོད་དབེན་པའི་བླུན་པོ་ཡིས།།
ར་སེ་རྒོལ་དགོས་ཟེར་འདི་ངུ་སྐད་རེད།།

དམ་པའི་ཆོས་ལ་ཉམས་ལེན་མ་བྱས་ཞིང་།།
ཚིག་སྦྱོར་ཁྱི་ཡིས་སྐར་བལྟས་པ་ཙམ།།
ཐོས་བསམ་སྒོམ་གསུམ་མེད་པའི་གྲྭ་གཟུགས་ཀྱིས།།
སེང་རྡོར་བརླག་དགོས་ཟེར་འདི་འཆལ་གཏམ་རེད།།

བོན་པོའི་བྱམས་མའི་གྲིབ་མ་མ་མཐོང་ཞིང་།།
རྒྱལ་བསྟན་དར་རྒྱས་ཁ་ཕྱོགས་མ་ངེས་པའི།།
གྲུབ་མཐའི་ཕྱོགས་རིས་མཁན་དང་ལྟ་ཉེན་པས།།
ཚུལ་བློ་ནོར་འདུག་ཟེར་འདི་འཁྲུལ་གཏམ་རེད།།
——————✍ཁམས་ཉི་གཞོན།
#ལྟ་བ་མཉམ་གནས།# https://t.cn/R2WxDiK

༈སྟོན་གྱི་གཤིས།

མྱི་ཕྲུག
ནམ་ཟླ་སྟོན་གཤིས་སྨིན་པ་དུས་ཀྱི་འགྱུར་བག་དེ།།
འཇབ་ལེན་རྐུན་མ་ཇི་བཞིན་རི་ཀླུང་ཁྱིམ་དུ་ཉུལ།།
དྲོད་ཀྱི་སྲོག་ལ་གཟན་པའི་དགུན་གྱི་ངད་པ་ཡང་།།
འདྲེན་པའི་བླ་འབོད་འཇག་མའི་རྩྭ་ཡིས་གྱེར་བཞིན་འདུག།

དྲོད་འཇམ་དབྱར་གྱི་ཕྱིང་གོས་བྲལ་བའི་སྡོང་པོ་ཡང་།།
མི་སྡུག་བཞིན་ལ་སྐྱོ་ཉམས་དོད་པའི་རྒན་པོ་ལྟར།།
མདངས་ཀྱི་སྣུམ་ཤོར་སྔོ་ལྗང་ལོ་མ་སེར་དང་ལྷན།།
བརྩེ་མེད་རླུང་བུ་ཆོམ་པོས་ངེས་མེད་གང་སར་དེད།།

ཡལ་གའི་རྩེ་ནས་དབྱངས་ཀྱི་ང་རོ་ཕྱོགས་བཞིར་རུ།།
ལྷོད་ཀྱིས་འཐེན་པའི་གཤོག་འགྲོའི་ཚོགས་རྣམས་ཡི་མུག་པའི།།
ཀྱུར་ཀྱུར་སྒྲོག་བཞིན་གཤོག་ཟུང་ལེབ་མོས་བྲག་ཐེམ་གྱི།།
ཉི་མའི་འོད་ལ་བྱ་ར་བྱེད་པའི་ཚུལ་འདི་སྐྱོ།།

རྩེད་འཇོ་མོད་པའི་རྒོ་རྐྱང་དེ་ཡང་སྤོབས་པའི་དབུ།།
བྲང་ལ་དུད་དེ་སྟར་འཕྲེང་དྲོང་མོ་རྫ་ལ་གཏད།།
རྫ་ཡི་ཁུད་ཀྱི་ཉི་མའི་ཁྱིམ་ལ་ཞགས་སྡོད་ཀྱི།།
གནས་ཚང་གཡར་བའི་སྔ་ལྟས་མཚན་མ་འདི་ནས་ཚང་།།

ཤྭ་བ་ཡུ་མོས་མི་འདོད་རེག་པ་བསིལ་བ་ཡི།།
ངད་པ་ཁུར་བའི་དྲི་བཞོན་བུ་མོའི་གདུག་རྩུབས་དེ།།
མི་བཟོད་ལུས་ལ་ཕོགས་པའི་གདུང་བའི་ཡུས་ཆེན་གྱི།།
ངུད་མོའི་དབྱངས་ཀྱིས་རྣ་བ་འདི་ཡང་དོག་པོར་བྱས།།

གསེར་རྩིས་བྱུགས་པའི་སེར་པོ་རི་ཡི་ཟེ་མོ་ནས།།
རི་སྤྱང་རྣ་བར་གཟན་པའི་ལུག་རྫི་ཀི་སྒྲ་ཡང་།།
རེ་ཞིག་འཇག་པའི་ཚོར་བ་སྐྱུར་མོ་སྟོང་ལྷང་ལྷང་།།
དབྱར་གྱི་ནེམ་ཤ་དྲོད་ཀྱི་འཇམ་མཉེན་དྲན་པས་གདུང་།།