༄༅། །གངས་རི་ལ་ཕུལ་བའི་སྙན་ཚིག

དྷཱིཿ ཚ། རྨོག་རུ་སངས་རྒྱས་རྒྱ་མཚོ།
གངས་འདི་མེས་པོའི་སྙིང་སྟོབས་མཚོན་པའི་སྲ་འཁྲེགས་རྡོ་ཡི་རང་གཟུགས་ཡིན།།
གངས་འདི་དམ་པའི་ལྷ་ཆོས་མཚོན་པའི་དད་འདུན་ཤེལ་གྱི་མཆོད་རྟེན་ཡིན།།
གངས་འདི་གཡུང་དྲུང་བོན་གྱིས་བཟོས་པའི་འོད་ཀྱི་རྨུ་ཐག་དཀར་པོ་ཡིན།།
གངས་འདི་འདིར་སྣང་གཞི་བདག་ཚོགས་ཀྱིས་གཉུག་མར་གནས་པའི་ཁང་བཟང་ཡིན།།
གངས་འདི་མཐོར་བརྩེགས་རི་རབ་ཡོངས་ཀྱིས་གཙུག་ཏུ་བཀུར་བའི་རི་རྒྱལ་ཡིན།།
གངས་འདི་སུས་ཀྱང་བརླག་པ་མེད་པའི་རང་བྱུང་ཁམས་ཀྱི་མཛེས་སྡུག་ཡིན།།
གངས་འདི་གདོད་ནས་བྱིན་རླབས་འབར་བའི་སྐྱེ་འགྲོའི་བླ་རི་གསོན་པོ་ཡིན།།
གངས་འདི་རིན་ཆེན་སྟོང་གིས་གྲུབ་པའི་འཛམ་གླིང་སྐྱེ་རྒུའི་ནོར་བུ་ཡིན།།
གངས་འདི་དུས་བཞིར་འགྱུར་ལྡོག་མེད་པའི་ཁྱད་མཚར་རྟག་པ་རང་བྱུང་ཡིན།།
གངས་འདི་དམ་ཆོས་སྣང་བས་ཁྱབ་པའི་གླིང་བཞིའི་མུན་འཇོམས་ནོར་བུ་ཡིན།།
གངས་འདི་བསླབ་གསུམ་ཁྲིམས་ཀྱིས་བརྒྱན་པའི་ཡིད་འོང་ངུར་སྨྲིག་རྟགས་ཚན་ཡིན།།
གངས་འདི་ལྷ་ཆེན་སྟོང་གི་གནས་རི་སྲ་འཁྲེགས་ནོར་བུའི་དགའ་ཚལ་ཡིན།།
གངས་འདི་ཁ་བ་ཅན་ཞེས་བརྗོད་པའི་མི་རིགས་དེ་ཡི་ཁྱད་ནོར་ཡིན།།
གངས་འདི་ངོ་མཚར་གྲགས་པས་ཁྱབ་པའི་རབ་གཡང་བཀྲ་ཤིས་གནས་རི་ཡིན།།
གངས་འདི་ཚེ་དང་བསོད་ནམས་འཕེལ་བའི་མཁོ་རྒུ་སྦྱིན་པའི་ལྷ་རི་ཡིན།།
གངས་འདི་འཛམ་གླིང་ཆུ་བོ་ཡོངས་ཀྱི་ཚེ་སྲོག་བསྐྲུན་པའི་འབྱུང་གནས་ཡིན།།
གངས་འདི་འཛད་མེད་རིན་ཆེན་སྤུངས་པའི་འཛམ་གླིང་ཡོངས་ཀྱི་མཛེས་རྒྱན་ཡིན།།
གངས་འདི་བི་ཤྭ་ཀརྨའི་ལག་པའི་འདུ་བྱེད་རྩལ་གྱི་མཛེས་རིས་ཡིན།།
གངས་འདི་དཔའ་མཛངས་རྟུལ་ཕོད་ལྡན་པའི་སྟག་ཤར་སྟོང་གི་ཆོད་སེམས་ཡིན།།
གངས་འདི་རབ་དཀར་སེམས་པ་མཚོན་པའི་མཛའ་བརྩེ་དྲོད་མོའི་རང་གཟུགས་ཡིན།།
གངས་འདི་རི་དྭགས་འདབ་ཆགས་ཚོགས་ཀྱི་ཞི་ལྷོད་བདེ་བའི་གནས་མཆོག་ཡིན།།
གངས་འདི་དྲང་བདེན་ཞི་བདེ་མཚོན་པའི་གོ་ལ་ཟླུམ་པོའི་བླ་སྲོག་ཡིན།།
གངས་འདི་སྤྲོས་ཀུན་རྣམ་པར་སེལ་པའི་དག་པ་འོད་གསལ་དཀར་པོ་ཡིན།།
གངས་འདི་བདག་ཡིད་ཞེ་ལ་ཐོགས་པའི་ཉི་གཞོན་འཆར་སའི་རེ་ལྟོས་ཡིན།།

ཞེས་པ་འདི་ནི་ཕྱི་ལོ་ཉིས་སྟོང་བཅོ་བརྒྱད་ལོར་ཡུན་ནན་བདེ་ཆེན་དུ་གནས་མཇལ་སྤྲོ་གསེང་དུ་སོང་སྐབས། གནས་ཆེན་རོང་བཙན་ཁ་བ་དཀར་པོའི་མཛེས་སྡུག་གཟི་ཉམས་མཐོང་ཕྲལ། རང་བློར་གང་ཤར་ཐམས་ཅད་སྙན་ཚིག་གི་འགྲོས་ཡིན་ཁུལ་གྱིས་སྦྱར་བའོ།།

༄༅། །ས་ག་ཟླ་བའི་དུས་ཚེས་ཁྱད་པར་ཅན་དང་འབྲེལ་ནས་ཡབ་རྗེ་བླ་མ་ཞྭ་དམར་རྡོ་རྗེ་འཆང་ཆེན་མོའི་བཀའ་འབུམ་ལེགས་པར་འགྲེམ་སྤེལ་བྱེད་ཐུབ་པ་ལ་དགའ་བ་འབུམ་གྱིས་ཁེངས། དམ་པ་གང་གི་བཀའ་འབུམ་གྱི་ཞུ་དག་དཔུང་རོགས་སུ་ཉན་པ་ནི་རང་ལ་མཚོན་ན་ཚོགས་བསགས་རླབས་ཆེན་ཞིག་ཏུ་བསམ་ཡོད།

#微博[超话]# ༄༅།།རྩྭ་དང་རྩི་ཤིང་ལང་ཚོ་འབུས་པར་འཚང་། །
བྱ་དང་བྱེའུ་སྐད་སྙན་བསྒྲགས་པར་བྲེལ། །
ཐམས་ཅད་གསོན་ཤུགས་རྒྱས་པའི་དུས་བཟང་ལ། །
ཁྱེད་ཀྱང་སྐྱོ་བ་མ་འཕྱུར་ཞལ་འཛུམ་སྟོན། །